لكل من تريد تعلم القلب اللوز.....حصري مع لؤلؤة الفردوس - الصفحة 12

لؤلؤة الفردوس · 2012-09-08, 02:08

السلام عليكم
ان شاء الله تكونو بخير
راني نشوف بلي البعض خرجلو ماشي كامل
الاخت muslimone طيحتيلي المورال كي قلتيلي المرة الثانية و ماخرجليش و من الصوة راهي باينة الغلطة ديالك وشنو هاذي الصورة بعد مابات ولا هاكدا

أمبووووووووووسيبل راكي تباني هنا فورتيه و فرغتيه قبالا من الكسكاااس علاه راه يابس هاكدا درك نقولك علاه الغلطة تاك في اللول أولا ماطبقتيش المقادير بالتفصيل كيما قلتلك ثانيا عجنتيه بزاف و شمختيه اكثر هنا تعرفي بلي غلطتي بلا ماتطيبيه العجين يجي مبسس كي الكسكس و مفروش مايجيش يابس هاكدا

و الصراااااحة كي شفت هاذي الصورة تشووووكيت

راهي تبان الرغوة ولا الثلج طالع من الفوق راهي باينة شربلك بزااف و شمختيه أكثر ماقلتش عمريه بالماء كي تخدمي قلت شمخي يدك و حطي باش يتسقملك حنا تبانيلي فرغتي الماء و خليتيه قعد شحااااال باش طيبتي و الصورة أحسن دليل بينت كل شيئ
كي شفتيه هاكدا كنتي ماتطيبيش كامل راه باين معجن هي صح العجينة تجي جارية بصح تكون فيها حبات الدقيق باينين

و هاذ الصورة يا سلالام راهي تبان خبز فطير خرج من الفرن

في هاذ الحالة من المفروض يخرج طري و باين طري كي تكوني تقطعي فيه و الطبقة راهي رقيقة بزاف ممكن حجم السنيوة راه كبير
كي شفتي روحك اول مرة تطبقي كنتي تديري نصف المقادير تطبقي برك في حالتك هاذي يلزم تجربي دقيق متوسط

و باذن الله رايحة نخدمو على جالك و نرويلك التصاور و التطبيق الممل ملي نخدمو حتى نطيبو و تشوفي بعينيك و اذا قدرني ربي نديرلك فيديو كامل تشوفيه
و الله العظيم غير بهاذ المقادير يخرجلي رووعة و درتو 4 مرات في رمضان

و لي خرجلهم نقولكم بصحتكم
أنتظر تطبيقاتكم

لؤلؤة الفردوس · 2012-09-08, 02:13

اقتباس:

المشاركة الأصلية كتبت بواسطة ام طيب

السلام عليكم ورحمة الله تعالى وبركاته

احسن طريقة لتحضير قلب اللوز

هذه أفضل وصفة مجربة وناجحة لتحضير حلوة قلب اللوز و التي تحلو للجميع بصناعتها أو شرائها خلال شهر رمضان المبارك للتحلية

المقادير اللازمة

نقدم لكم المقادير اللازمة للحصول على صينية بالحجم الذي يباع

معاينة الصورة

الكيلة المستخدمة = فنجان

4 كيلات دقيق خشن " سميد مغربل "
2 كيلات سكر عادي
نصف كيلة زيت
نصف كيلة ماء ورد، وأكملي الباقي بالماء
حبات لوز
التعسيلة ( الشاربات ): ربع كيلو سكر+ لتر ماء
طريقة التحضير

اخلطي المقادير الجافة ( السميد و السكر ) جيدا، ثم أضيفي الزيت وماء الورد، والماء
امزجي بأطراف الأصابع، أو بملعقة، ولا تضغطي كثيرا على الخليط
أفرغي نصف الكمية في صينية الطهي
وزعي عليها طبقة من اللوز المكسر
ثم أكملي الطبقة الثانية من العجين، سوي الوجه دون أن تضغطي كثيرا عليها
اتركيها لمدة يوم كامل، ثم اطهيها في فرن مسبق التسخين على درجة حرارة 200 درجة

في هذه الأثناء، حضري الشاربات، وذلك بغلي السكر مع الماء، مع إضافة قشرة ليمون

فور إخراج الصينية من الفرن، اسقيها بالشاربات الساخنة
واتركيها حتى تتشرب

شهية طيبة للجميع

شكرا أختي على الاضافة

نعرفها طريقتك و كنت نخدمها قبل مانعرف هاذي الطريقة بصح الافضل طريقتي يخرج كيما تاع الحوانت طريقتك كنت نديرها يخرجلي كي البسبوسة

بما أنك طباخة جربي طريقتي و رجعيلي الخبر

muslimone · 2012-09-08, 08:45

هاديك الصورة يا أختي من بعد ما بات كنت دايراتو فالصاشي وكي جيت نعاود نحله لقيته يابس وبثيت نحل فيه مستحيل نفوره علاش راهو طاعم، والصورة الأخرى درت المقادير كيما قلتي وبيان سير تتشوكي على خاطر حطيته فوق السنيوة وبقا ماشي مسقم من الفوق وماشي رغوة هاذيك هاذاك السميد مشقق ومين خرج راكي تشوف خبز فطير خير منو ب 10000000000000000000 مرة والمشكل راني عارفة روحي بلي ماشي فالطريقة بالاك فالكاس لي عبرت بيه بصح الطريقة راني درتها وعاودتها مرتين والدقيق المتوسط مستحيل يخرج لازم دقيق أخشن من مولا وما لازمش كامل كمية الماء لي عطيتيهالنا راها بزاف وكذلك من المفروض نبسسوه غير بالسمن وماء زهر وما نضيفوش الماء حتى نخلوه يبات على خاطر الماء يكوره كيما شفتي وحسبتيه مفور ويكشف باش تحليه
وانت تقولي الصورة أحسن دليل سبحان الله راكي كاتبة بيدك بلي ما تخلوهش برا مالا كنت حميت الفور من قبل وما قعدش برا أبدا وأنا حسيت الغلطة راهي كي شمختيه بالماء قبل ما يبات تما ما نديروش الماء ونقصو كمية الماء أنت راكي مكثرة والسميد هادا ما يخرجش هو خشين بصح ما شي خشين كيما تاع الشامية لأني درتو مبرجة وخرج فيها عادي وراني نحكي لأنني متأكدة من روحي مليح وطبقت الشامية قداه من مرة كانت تصلح بصح ماشي كيما تاع الحانوت ولكن السميد كنت ندير الخشين وما نشمخش قاع بالماء لي أنت قلتي عليه
أنا ما عيبتش في طريقتك ولكن تشجعت ووريتلكم الطريقة ولي ما عجبوش الحال ما كان لاه ينتقد انتقادات لا أساس لها ولبلا ما تشوف عينه ويخمن بدون تركيز

ام طيب · 2012-09-08, 13:52

اختي حنا هنا باش نتعلم و نعلم و نتعاون السيدة زعفت هذا شي طبيعي لانها خسرة. درهما . السيدة معدورة معليش نتعاون كاملين السيدة بقات ليها 9 كيلو مالو هذ قلب اللوز بالسلامة ميسدقش حنا وراه وراه حتا يتقاد. أختي عامي الطريقة ب التفصيل

ام اماني77 · 2012-09-08, 14:07

اهلا غالياتي نتمنى اخواتي مسلمون ولؤلؤة الفردوس ما تزعفوش رانا كامل نتعلمو مع بعض رانا كامل عندنا ثقة مطلقة في وصفاتك اختي لؤلؤة الفردوس والحلويات نتاعك اكبر دليل على انك متمكنة لاني ما شفتاش اروع منها رانا نستناو في الطريقة بالصور ان شاء الله وراح نطبقو وان شاء الله ننجحو كامل خاصة مسلمون في تطبيقها وربي يجازيك كل خير

ام طيب · 2012-09-08, 14:09

سيدتي ها الحل تاع المشكلة تمعني و طبقي والله معكي انها طريقة سيدة مختصة أيضاً و كتبتها خصيصا لسيدة لأني لا استطيع تحميل الصور بهاتفي. https://www.4bladi.net/vb/showthread.php?t=2403

ام طيب · 2012-09-08, 14:14

ياربي تفلحي فيها رني ندعي معاك منهناش تتصدق ليك شوفي الملح مزيان ف الصورة و الكأس باش دار العبار وشوفي مزيان السميد فالمغرف. و متنسايش بسم الله

عليدرة عبد الحفيظ · 2012-09-08, 14:21

أني زوجة عبد الحفيظ ثاني حايبة نتعلمو

muslimone · 2012-09-08, 17:17

اقتباس:

المشاركة الأصلية كتبت بواسطة ام طيب

ياربي تفلحي فيها رني ندعي معاك منهناش تتصدق ليك شوفي الملح مزيان ف الصورة و الكأس باش دار العبار وشوفي مزيان السميد فالمغرف. و متنسايش بسم الله

يعطيك الصحو إن شاء الله نجربها يا رب بسم الله رايح نجرب ونردلك الخبر وخواتاتي متزعفوش مني غير الضغط تاع الكوزينة خلاني مقلقة وزيد الضغط تاع البيت والاحباط والله ما نشكك في وصفاتكم بالعكس روعة والدليل تطبيقاتكم ولكن تكون فيها حية تكون الله يعطيك الخير أم طيب يا طيبة يا حلوة وشكرااااااا لؤلؤة الفردوس الله يرزقك الفردوس عندكي تدعي عليا قلبي بيض

لؤلؤة الفردوس · 2012-09-08, 22:27

اقتباس:

المشاركة الأصلية كتبت بواسطة muslimone

يعطيك الصحو إن شاء الله نجربها يا رب بسم الله رايح نجرب ونردلك الخبر وخواتاتي متزعفوش مني غير الضغط تاع الكوزينة خلاني مقلقة وزيد الضغط تاع البيت والاحباط والله ما نشكك في وصفاتكم بالعكس روعة والدليل تطبيقاتكم ولكن تكون فيها حية تكون الله يعطيك الخير أم طيب يا طيبة يا حلوة وشكرااااااا لؤلؤة الفردوس الله يرزقك الفردوس عندكي تدعي عليا قلبي بيض

خسارة عليك حنونة نزعف عليك و الله غير قلبي بيض غظتيني بزااااف هذا مكان و راني حاسة بيك برك راني حايرة علاه كي خليتيه بات خرجلك يابس هاذي راهي محيرتني بزاف بزاف من المفروض تلقايه مبسس كي شفت الصورة طاحلي المورال و على جالك باذن الله رايحة نخدمو و نحطلك تشوفي الصور و الطريقة حبة بحبة و نوقف معاك حتى يخرجلك

muslimone · 2012-09-08, 22:58

اقتباس:

المشاركة الأصلية كتبت بواسطة لؤلؤة الفردوس

خسارة عليك حنونة نزعف عليك و الله غير قلبي بيض غظتيني بزااااف هذا مكان و راني حاسة بيك برك راني حايرة علاه كي خليتيه بات خرجلك يابس هاذي راهي محيرتني بزاف بزاف من المفروض تلقايه مبسس كي شفت الصورة طاحلي المورال و على جالك باذن الله رايحة نخدمو و نحطلك تشوفي الصور و الطريقة حبة بحبة و نوقف معاك حتى يخرجلك

يعطيك الصحة والله والو ما يطيحلكش المورال تعرفي كل وحدة ويديها وزيد راكي كريمة بزاف يعطيك الخير والهناء وراني هنا نستنا ودائما نتابع الموضوع وغير قلب اللوز لي نديره بإذن الله راني نستنا في تطبيقك غير بعقلك وحطينا التصاور ورايحة نعاود نجربه للمرة الثالثة بصح غادي نشري أخشن سميد ونشوف يا رب تصلح

TOUTA23 · 2012-09-09, 09:50

هدا هو تطبيقي لبنات
https://www.djelfa.info/vb/showthread...0#post11526730

زهرة حموية · 2012-09-14, 23:07

بصحتك حنونة

أم ياسين الزهراء · 2012-09-16, 07:53

حبيت نقلك بارك الله فيك خرجلي هايل وبنين كيما اللي يتباع بوه خير منو الله يسلمك حنونة وان شاء الله نصورو نحط التطبيق هذا اذا بقى منو ههههههههههه شكراا

hayette82 · 2012-09-29, 21:07

راني ديما نديرو ميصلحش يجي معجن يابس ميتكلش تول