عندي جريوات قولوي واش نعمل بها ؟

[joumana1]

لو سمحمتم من عندها وصفات وأفكار جديدة لعمل طبق بالجريوات courgettes

[azlmimi]

ديريهم غراتان ،، ديريهم في بلاطو تاع فور فيه المنيوم وخليهم حتى يولوا مشويين مليح ،، تقدري ديري معاهم بطاطا مثلا ،، ( افضل طريقة انك تقصيها كي الشيبس بالروبو ، وديري بصل يتشوح مليييح ، واضيفي البطاطا بعد ما تكوني غلتيها شوية ،،) يخلط الكل مع صلصة جبن .................الخ

[ام ايمان 11]

يالنسبة لي أحسن حاجة أنك ديريها دولمة مع البطاطا صوص حمص ،ولا بغيتي شي ساهل تم تم رابيها وديريها في مقلى تشيح من الماء تاعها بعدها زيديلها ملح و فلفل اكحل و توم رابي و زيتون مقطع دوائر قليها تم ضيفيلها بيض مخفوق و طيبيها تخرجلك بنينة تهبل ، ولا بغيتيها غراتان ديري نفس المقادير لي قبلها برك البيض خلطيها و ديريها نية في الفرن و تقدري ترابي معاها بطاطا . ان شاء الله نكون افدتك .

[shaydiaa]

أعملي حساء القرعة بالجبن ... تقلي بصلة في الزيت نضيف القرعة 4 أو 5 حبات قرعة متوسطة الحجم قطع نمرق و نضيف حبة بطاطا مكعبات نضيف حبة جامبو دجاج فلفل أسود شوي ملح لما تطيب نرحي بالمكساغ و نرحى معاها 4 أو 5 قطع جبن أبيض . هذا الحساء لذيذ و يحبوه الأطفال . لما تمرقي ما تكثريش الماء.

[ماريا زيكو]

عندي وصفة ساهلة بصح معلاباليش ادا جديدة شفي شدي لقورجات تاعك اسكرفجيها مع شوية طماطم في مقلة زيدي لملح و فلفل كحل والزيت شوية بزاف كشغل راكي تقلي فيها اومبعد طيبيها على نار هادية كي الطيب و تنشف ديريلها البيض و بصحتك ان شاء الله تعجبك

[imma2009]

الجريوات قطعي كل واحدة على 04 ثم فوريهم بعد ما دريهم بالملح كي يطيبو خوذي شوكة وعبزيهم + فرماج لفاش كيري ولاّ تاع الميزان + لحم مرحي ولا عندك ولا معندكش ما فيش مشكل خلطي الكل شكلي أقراص قيش لفم تاع الكاس يكون العرض تاعهم متوسط دريهم في الفرينة ثم في البيض المخفوق ثم في الخبز المرحي وقليهم
ملاحظة كمية الجبن تكون كبيرة ومليحة بزاف للصغار
انشاء الله تعجبك ورجعلي بالخبر

[awladi]

شوفي هذا الرابط راني مجربتها ماتامنيش بلي قرعة
https://www.djelfa.info/vb/showthread.php?t=1301806

[joumana1]

شكرااا لكن عزيزاتي
ان شاء الله نجرب كل الوصفات كل مرة واحدة
يعطيكم الصحة

[lilii7179]

ديريها سوفلي: فوريها و ارمسيها بفرشيطة وزيديلها فرماج و معدنوس ملح فلفل اسود و حبة بصلة تكوني رحيتيها و ذبلتيها في شوي زبدة, اذا عندك لحم مرحي ذبليه مع البصلة و زيديه يمكن الاستغناء عنه. ثم زيدي صفار البيض خلطي و زيدي بياض البيض تكوني طلعتيه en neige وحطيها في مول يذهب للفرن, خفيفة و صحية