كسكس الشعير من مطبخي روووووعة

Nada perla · 2014-01-31, 17:00

لسلام عليكم ورحمة الله تعالى وبركاته
اليوم جبتلكم وصفة كسكس الشعير من مطبخي ان شاء الله تعجبكم
نبدا بسم الله بالمقادير

كيلو كسكس الشعير
رطل قرعة
رطل زرودية
ثلاث حبات بطاطا
حبة بصل
ملح فلفل اسود قرفة زيت
مغيرفة ونص طماطم مصبرة
شوية زبدة للدهن

التحضير
نغسلو الكسكس بالماء مليح ونعصروه باليد ونحطولو شوية زيت وانخلوه ينشف

نحكمو حبة بصل نقطعوها ونتبلوها وانديرولها شوية زيت وانحطوها تتجمر ف نار هادية

انضيفولها الطماطم المصبرة وانخلوها تتجمر ايضا

ثم نضيف مقدار كاس ماء وانخلوها حتى تغلي

في هذه الاثناء نكونو قشرنا الخضرة ديالنا وقطعناها بالطول

كي تغلي المرقة انحطو الزرودية والقرعة وانخلوها تتجمر فيها

وكي تنشف المرقة انمرقوها عادي وكي تغلي انحطو البطاطا

وانحطو كسكاس من فوق وانحطو الكسكس تاع الشعير يفور التفويرة الاولى

كي يفور الكسكس انحوه وانديرولو الملح وانشمخوه بالماء وانحطوه ينشف

كي ينشف انحطوه يتفور للمرة الثانية

وكي يتفور انحوه وندهنوه بالزبدة انا استعملت ماتينة

ان شاء الله تكون عجبتكم الوصفة ديالي تاع اليوم
بالهنا والشفاء
نتمنى تعطوني رايكم اخواتي العزيزات

انحبكم بزاف [/SIZE][/FONT]

ام محمد78 · 2014-01-31, 17:08

امممممممممممممممممم اللهم ادمها نعمة

محمد نسومة · 2014-01-31, 17:30

شهتينا في هدا البرد

بنت الحاج · 2014-01-31, 17:41

وعليكم السلام ورحمة الله وبركاته
يعطيك الصحة اختي
حنا اكثر شيء ناكلوه باللبن ولاّ بالرايب
بصح اللي نديروهم اكثر شيء مع المرق: التشيشة تاع الزرع يعني الشعير، ولا المرمز - الشعير يحصد قبل نضجه - نوجدوهم بنفس الطريقة ونفوروهم 3 مرات وندهنوهم إمّا بالزبدة الحقيقية ولا بزيت الزيتون وراه يوالم بزاف للزرع.
بصحتكم

ام امجد14 · 2014-01-31, 18:12

بصحتكم نموووووووووووووووووووووت عليه

idron0 · 2014-01-31, 18:42

يعطيك الصحة

ام ولي · 2014-01-31, 22:44

بصحتكم اختي يشهي

**وحدها غريبة ** · 2014-01-31, 23:50

مممم يشهي بصحتكم اختي

Nada perla · 2014-02-01, 11:02

ربي يحفظكم كامل وربي يسلمكم ان شاء اللهاخواتي انسيت انقوللكم بلي نقدرو ناكلوه باللبن ولا الرايب بصح ف البرد امليح المرقة خير واللي اتحب اتدير اللحم ولا الجاج تاني يجي بنين
ان شاء الله اتجربوه ويعجبكم

~~bouchra ahlam26~~ · 2014-02-02, 14:14

ياسمين1990 · 2014-02-02, 14:37

شكرا على الوصفة
احنا منقليوش البصل طريقتنا هي نضع مباشرة الماء في القدرة مع الحمص والبصل ثم نغسل الكسكس نتاع الشعير نقطرو مليح وونخليه ينشف ثم نحضر الخضرة ونضيفها للقدرة ومن بعد نفور الكسكس المرة الاولى نرشو بشوية ماء بارد مع الملح ومنبعد ما ينشف نضيفلو شوية زيت زيتونة ونرجعو يفور والمرة الثانية ندهنو ب زيت الزيتون ونسقي ونضع الخضرة فوقه نفس الطريقة مع اللحم او الدجاج
يعني منستعملوش خلاااااااااااص الزبدة هذا طبق صحي نحاول اننا نبتعد عن الكلسترول سواء في القليان او في وضع الزبدة في الاخير
وشكرا مرة اخرى على إحياء الاكلات التقليدية