لوجه الله ساعدوه هــو لا أنـــا

[مشكلتي]

السلام عليكم و رحمة الله و بركاته ...
راح نحاول نختصر و يا ليت نلق على الاقل هنا واحد يفهمني
انا كنت عاقدة قبل 3 سنوات على شخص تعلقت بيه و تعلق بيا لدرجة الجنون لكن صرات مشاكل من اهلو ضغطو عليه و اهلي ضغطو عليا لانهم كانو رافضين °(اهلنا بينهم صلة و يعرفو بعضاهم)
و كل واحد يشك في الاخر يقلو حبـني بقدر ما نحبك و كاننا نحاسبو بعضانا على احساسنا و و و تضغطنا و أصبح هو عدواني و انا ساكتة و ساكتة و ساكتة حتى تـمادى هو و عمري ما لمت و الا واجهت الا قليل و بسبب الضغوطات المختلفة غلط في حقي ما اصبرتش و طلبت الطلاق و فعلا تـعـبـنا الاثنين و تطلـقـنابحثا على الراحة و فقط و أنا مرضـت نفـسـيا و عانيـت و تعـذبت مرتين معاه و بعيدة عليه و وصلت لـجأت حتى لطبيب نفسي بسبب الضغوطات من كل الجـهات
هو ايضا تعب و عانى و كرد فعل راح خطب و تزوج و سلمت امري لله و قلت مكتوب و الحمد الله
المشكل انو عندو قريب عام متزوج و مازال يسألني لليوم علاه تسرعتي و طلبتي الطلاق فهمتو مرة و مرتين و طلب السماح و قالي فعلا حتى انا ظلمتك معاهم مي كان لازم حتى انتي توقفي معايا لانو حتى هو كان مضغوط كثير من اهلو و من كل الجهات
حكينا في اللي صرا و انتهت لحكاية لكن .....فاجأني من فترة يطلب مكالمتي رفضت و اصريت على الرفض صار يقلي اقسم بالله راح تعيشي كل عمرك وحدك و في الهم و ظلمتيني و حطمتيني وحقرتيـني و راح نخلص حقي و و و و
تفاجأت لانو كان فاهم لحكاية ؟؟؟؟؟و ما رديتش و صــراحة تـشوكيـــــت

تلاقينا في مرض احد اقاربنا قالي سؤال الله يخليك تمنيت عفو على اللفظ نطيحلو على واش قالي
لقيتو يقلي سؤال واحد و تكوني صريحة : انا واش نعـنيـلك ؟؟ انا واش بالنسبة ليك ؟؟
حرت و قتلو خاف ربي في زوجتك اصر جاوبيني و الله ما نزيد نكلمك
و اقسم انو ما هوش مرتاح و لازم نجاوبو و اقسم انو حاب يمشي في حياة و أنا فيها و السؤال هدا ما بغاش يروح من راسه و قالي الله يخليك جاوبيني هدا و برك

خاوتي تمنيت نقلو ما نسيتكش لكن ضغطت على قلبي و قتلو ماضي و راح جن جنونو و صار يقلي متاكدة جاوبي جاوبيني برك ستر ربي تمالك اعصابو و رحت و خليتو

انا اليوم ما نروحش للاقارب اللي ممكن يروحلهم و تفاديتو ؟و ما عنديش حتى تلفون باه ما يجيبش رقمي و لو احتمال؟
قولولي هل بيـدي حل نخليه ينسى ؟؟؟
هو نهار يلومني نهار يطلب السماح ؟؟ تصرى هادي فهموني ؟
صارحوني كرجال و كنساء هل هو فعلا يتعذب ؟ و هل بيدي نقـنـعو اني ما ظلمتوش ؟
أم ماذا افعل مانيش حابة نغضب ربي سبحانه و مانيش قادرة نشوفه هكذا و خايفة يكون يـمثل و في بالو اني ظلمته ؟
و خايفة يكون يتعذب فعلا ؟
و هل من حل
سلام الله على الجميع و كنصيحة لكل واحدة قبل ما تتزوجي خمي مليح و قبل الطلاق خمي مليح مليح
و لا اله الا الله

[يونس معبدي]

وعليكم السلام ورحمة الله

المشكل انو عندو قريب عام متزوج

مانيش حابة نغضب ربي سبحانه و مانيش قادرة نشوفه هكذا و خايفة يكون يـمثل و في بالو اني ظلمته ؟
و خايفة يكون يتعذب فعلا ؟

ويتعذب ومن بعد ؟؟
السيد متزوج وانتِ تخمي عليه
..

[mira mira02]

ربي يكون معاك و الله سؤال صعب

[yousra14]

السلام عليكم
الزواج قسمة ونصيب أنت سلمت أمرك لله ورضيتي وهو لا .
مازال يتخبط ولم يصدّق بابتعادك عنه سيصدّق ومع الوقت سينسى فلا دواء يشفي مثل الوقت والزمن .
واصلي على ثباتك ورب يفرّج همّك وهمّه

[الحلم الجميل]

....و عليكم السلام
الرجل متزوج و يعيش حياته
و انت تخمي اذا ظلمتيه و لالا و اذا هو يعاني و لالا ...يعاني و لا يقعد الله يسهل عليه
نهار خلاك و نهار طلقك و نهار تعبك من المشاكل حتى وليتي تعالجي ..انت ما كنتيش تعاني
اول حاجة دارها راح تزوج و خلاك..(اسمحيلي اختي و الا بغيتي ربي ما تزعفيش مني علبالي الي راه يفوت عليك صعيب بزاف)
عيشي حياتك .. ماشي تعيشيها على جال واحد سمح فيك و جاي يحوس الا راكي مازال تخمي فيه و لالا
..نصيحتي لكي تجنبيه لو حسيتي انه في مكان لا تروحيه
حتى لو تلاقيتيه صدفة لا تحدثيه و كانه غير موجود...
ربي يفتح عليك و يرزقك زوج صالح طيب محب عاااااااااجلا غير اجلا
ينسيك همومك تمسكي بالله و ادعيه و استغفري
و سوف تفرج باذنه
عيشي حياتك اختي و انسي الهم ينساك
ما تضيعيش حياتك في التخمام في واحد ما هوش ليك
قيسي عليك الهم

[حرز الأماني]

أختي الكريمة ان الرجل اذا تطلق كي يخفي ألمه يسارع الى الزواج ومادام أنكم تطلقتم أنصحك حبيبتي بأن تنسيه ولا تجاريه أبدا فاذا كان حقا يحبكي لن يتزوج مباسسسسسسسسشرة بل ينتظر مسامحتك فلا ترهقي نفسكي به وتجاهليه

[Napia]

أختي خمي فروحك هو راح تزوج دك يجيب ولاد و ينسيوه دك هو واش يحوس عندك وكي مازلت تحبيه? و هاديك المخلوقة اللي حاطها الدار ؟ هو راح تزوج بسرعة زاعما باه يبينلك راهو أقوى منك
وقاعد يدّي فيك ويجيب على والوا!
هو اللي ظلم روحوا وظلمك معاه................. تعجل !
أختي ربي معاك وإن شاء الله يعوضك ربي بالأفضل

[naamane3]

الان هاذ الشخص متزوج
لا يحق له ولك ان تتكلما حتي ولو في الماضي
ما كان بينكما انتهي وسيحكم الله بينكما يوم القيامة
الاولى ان تستغفرا على ما مضي
وتتعلما منه في الحاضر والمستقبل
وان تقولا قدر الله وما شاء فعل
وان لم يفهم هذا الكلام فلا تردي عليه
ولا تكلميه ولا تجاوبيه الا جوابا واحدا
انت غريب عني ولا يحق لي الكلام معك
والله المستعان

[bonbon]

ان شاءالله ربي يبعتلك ولد الحلال

خممي على روحك اختي اما هو راه بنى حياته صايي

[محمد جديدي التبسي]

يبانلي أنت بحاجة لمساعدة ربي يصلح حالك
لا راه يتعذب لا والو طيشي وراك غالبية الرجال عواطفهم بالكلام برك كي يلقوا امرأة ضعيفة وحساسة مثلك
ما تعبيش قلبك وعقلك وخمي في روحك وفي والديك وفي سمعتك ربي يعوضك بخير منه

[lola22]

يااا اختي فيقي مع روحك
مدام طلقتو وثم ثم راح اتزوج .... اعرفي بلي بلا حب بلا بطيخ اللي يحب وحدة صح ياو ما يتزوجش ما انقولش ما يتزوجش خلاص مي مش بسرعة ... وزيد يحاول انو يرجع شريكتو اللي خلاها ........
ضرك خممي في رووووووحك وربي يسهلك واتكملي حياتك متهنية ومرتاحة....

[مياسم الصمت]

المشاركة الأصلية كتبت بواسطة مشكلتي

السلام عليكم و رحمة الله و بركاته ...

قولولي هل بيـدي حل نخليه ينسى ؟؟؟
هو نهار يلومني نهار يطلب السماح ؟؟ تصرى هادي فهموني ؟
صارحوني كرجال و كنساء هل هو فعلا يتعذب ؟ و هل بيدي نقـنـعو اني ما ظلمتوش ؟
أم ماذا افعل مانيش حابة نغضب ربي سبحانه و مانيش قادرة نشوفه هكذا و خايفة يكون يـمثل و في بالو اني ظلمته ؟
و خايفة يكون يتعذب فعلا ؟
و هل من حل
سلام الله على الجميع و كنصيحة لكل واحدة قبل ما تتزوجي خمي مليح و قبل الطلاق خمي مليح مليح
و لا اله الا الله

السلام عليكم ورحمة الله بركاته

أختي الكريمة اولا ربي يعوضك بخير منه ان شاء الله يا رب

ثاني شيء
الرجل هذا لو كان يخمم فيك صح ما طلقكش اولا حتى واذا طلبتي
من المفروض يستنى حتى تهدا الامور
الشيء الثاني
نفرضه حضر ابليس وطلقك
الراجل هذا ما عندوش عقل يخمم به
يقول اني تسرعت كي طلقتها
لالا هو زاد كمل وزاد خطب وزاد تزوج
شفتي
طلق خطب زوج
قبل ما يزوج ما كانش عنده الوقت باه يفكر ويكتشف بلي راه تسرع وظلمك
ياخي ماشي طلقك اليوم غدوة من ذاك راح تزوج
نظن الوقت راه بشهور
لاه الشهور الكل هذوا ما كانوش كافيين با يستدرك

والسيد لما يزوج يظهر له آآآآآآآه راني ظلمتها آآآآآآآآآآه راني سرعت كي طلقتها

نقولك وحتى هو كان صادق انه مانساكش
خلاص راه متزوج واش بقى
راح يطلق على جالك ولا يديك ضرة
قولوا يخمم في هذي لكان فاتته

نقولك اختي شوفي حالك وانساي هذى القصة واطلبي ربي يعوضك

اللي راه فيه هو اللي دارها بيديه

ومشكون الليي قال راه صادق
تعرفي نقولك

بعض الرجال في الامور هذي يموتوا على التنيفيق ويحبوا يوقعوا المراة بالكلام الحنين والتمسكين تاع النفاق

وزيد ما كيش مسؤولة عليه
ينسي ولا جعله باش نسى
هو اللي دارها بيديه
يتحمل النتيجة

عندك اختي تضعفي قدامه
لأنه ضعفك راح يديك لمعصية ربك لا قدر الله
اقطعي أي علاقة معاه او سبب باه تتواصلي معا
ونطلب ربي يصبرك ويقدرك على طاعته
ويرزقك بالزوج الصالح والذرية الصالحة

تفكري مليح كلمة


كان....................

دمت بخير
سلام

[ايمان نور الجزائر]

الراجل زاهي متزوج وداير لافار
ونتيا تخمي فيه
جواب بسيط يا اختي ممكن راني قاسية عليك لكن وكان ما نقولكش راح تبقاي تلومي نفسك
وبالاك تروح حياتك قدامك خسارة
ولو تلاقيتو في مناسبة عائلية ...قولو ما تعنيلي والو من نهار تزوجت واحدة تانية
وكيما شفت لحياتك راح نشوف لحياتي
- - - - - - - - - - - - - - -- - - - -
اختي العزيزة...واش راح يفيد التحسر والندم وكلمة واش تعنيلي ونعنيلك
لي فات مات هو دار نقطة في حياتو وتزوج...باقيلو مجرد فواصل يمر عليها
اما نتي لحق الوقت لي تحبسي تخمي فيه وتخمي شكون الظالم واذا صح راه يتعذب؟؟؟ واش من فايدة
صفي قلبك وادعي يرزقك بالراجل اللي يعرفي بللي هو حياتك بلا ما يسأل

[نهى اسطاوالي]

[quote]

يااا اختي فيقي مع روحك
مدام طلقتو وثم ثم راح اتزوج .... اعرفي بلي بلا حب بلا بطيخ اللي يحب وحدة صح ياو ما يتزوجش ما انقولش ما يتزوجش خلاص مي مش بسرعة ... وزيد يحاول انو يرجع شريكتو اللي خلاها ........
ضرك خممي في رووووووحك وربي يسهلك واتكملي حياتك متهنية ومرتاحة....

/quote]

انت فووووووووووووووووووور ونعم الكلام
انا نحوس عليه بعد ما خلاني وزاد تزوج من الفوق والله ثم والله لن اتذكر منه ثانية قعدت فيها معاه
فكري في حياتك وابداي من جديد وكوني خير المراة التي تبحث عما يرضي الله واني اسال الله لك الزوج الصالح فزوجك اولى بحبك واخلاصك
اما عذاب وظلم ومانيش عارفة واشن و هذا خليك من الافلام المصرية وعيشي الواقع اذا بقيت تتكلمي معاه غدوا تلقاي الزوجة نتاعو اما على هاتفك او على باب بيتك تطلب منك الابتعاد عن زوجها وتصبحين انت الملامة
مثلما قالت الزميلات بلا حب بلا بطيخ الحب الحقيقي ياتي بعد الزواج

[samara lara]

c bn ansayeh wach b9alek m3ah !!!!!!!!!!!!!!!!!!!!!!!!!! siyed metzawej w balak w balak bewladou w nti tkhami fihh!!


ربي يهديــــــــك و اتمنى لك الخير