مسابقة كيكتي الاجمل ***

[ام ملاك.]

يعطيك الصحة اختي ام رامي
صباح الخير عليكم لبنات وين وصلتو في الكيكات
اختي ام رامي نحطو غدوة ان شالله ولا نحطو اليوم نورمال؟

[nour inasse]

صباح الخيررر حبيبتي مونية وشراكي انشاء الله لاباس
واااااااع راكي تسقسي على الكيكة انا والله هذا وين راهي طيب صبحت عليها مالحقتش الله غالب يخي قالتنا ام رامي حتان نهار لخميس باه نحطو الصور ؟

[ام ملاك.]

هههههه راني دايرة اليوم لخميس مافقتس بللي رانا لاربعاء
راني متقدمة بنهار
ربي يعينك والله صعيبة انا اول مرة تصرالي هكذا تعذبت فيها 3 ايام وانا نخدم فيها خاطرش كان عيد ميلاذ زوجي وكي يدخل للدار نخبيها وغير يخرج نرجع نكملها ههههه درتهالو سوربريز حتى البارح باش درتهالو

[oum radja]

صباح الخير البنات
ياك قالت ام رامي نحطو الصور نهار الجمعة و لا راني غالطة؟؟؟

[ilbeldelmondo]

يا جماعة انا في مكانكم راني متحمسة ههههههههه يبالي تقدرو تحطو و اخر اجل الجمعة و لا لالا؟؟؟؟
المهم ربي يوفقكم لوكان نقدر نصوت عليكم الكل لانه عمل شاق و تستاهلو

[أم إناس]

طومه حنونة راكي تشجعي فينا كامل الله يحفظك راني كملته مزال كتابة الموضوع هذا هو الشغل الشاق ربي معاكم اخوتي وبالتوفيق. سلامي لكم

[ام ملاك.]

مافهمتش نورمالمون نحطو يوم الجمعة هكذا فهمت؟؟
ام رامي تدخلي نحن في ورطة هههه
انا راني مافونسيا بنهار حسبتها اليوم الخميس هههههههههه

[•~ندية الجوري~•]

السلام عليكم ورحمة الله وبركاته...~



صباح الجمال على الجميلات ...


أختي ام انس طهوراً إن شاء الله .... عسى ان تكوني اليوم بخير و ربّي يشافيك و يبعد عليك كل مرض و تعب


الجميلة مونيّـــة ....ربي يحفظك يا غالية شكراً على عرض المُساعدة ...ربي يسعدك

الحقيقة تصرّفت من عندي و ما كانتش النّتيجة لي حبيت نوصل ليها و لكن رغم كل شيء المهم اني بين مُبدعات
و هذا شرف ليا و يكفيني ذلك ....


حالياً اكملت كل شيء و إنتقمتْ من الكيكـة أكلت منها و أرسلتْ بعضها لـ ....
لأنو غير انا و زوجي ... و في زوج ما نحبوش الحـلو بزاف



و اليوم عدّلت الصّور و حمّلتهم على موقع تحميل ... باش نلقاهم جاهزين مرّة خلاف .... لأنّي نكره تحميل الصّور ...فنيانة



و ممكن جداً نفتح صفحة في مُدونتي الخاصة بـ الخواطر .... و نكتب فيها بعض الشّرح باش نلقا كل شيء واجد
و يبقا لي فقط إدراج الموضوع ..... لأنو النت تنقطع بـ إستمرار و الكهرباء يوم الجمعــة غالبا ما تنقطع غلى بعد الظّهر

ما عارفاش كيفاش نديــر




المهم ربّي يوفق الجميع و إن شاء الله كل شيء يكون ســاهل علياَ و عليكم


بالتوفيق حبيباتي


فقط يا ريت تصغــرو الصور بعض الشيء
باش يسهل علينــا تصفح مواضيعكم الجميلة



.

[djaouida dd]

اوووو فلة خسارة خرجت والله نستنى فيها بفارغ الصبر خسارة خرجت علابالي لوكان كملت ديرنا حاجة فوووور

[ام ملاك.]

اختي ندية الحمدلله والله راني كيفك خدمت ومانعرف كيفاش خرجت هههه
انا ثاني صغرت الصور وحملت شوية باش يجوني ساهلين نهار الجمعة وان شالله ماتروحليش النت على خاطر عندي موبيليس ربي يستر برك
انا ثاني صغرتهم باش يسهلو للمتصفحين يشوفو بدون مشاكل
بارك الله فيك على التذكير
وان شالله تكوني ناجحة
انا كتبت في بلوك نوت نتاع الوينداوس واونروجيستريت باش ندير غير كوبي كولي ومانتعبش بزاف

[nour inasse]

ام رامي تعيشي قولينا اذا زدتينا نهار الجمعة او لا من فضللك

[oum radja]

سلاااااااااااام
انا راني كيما ريتاج درت وحد الخالوطة ههههههههههه الله يستر برك
وباغيا نقول انو ماشي حاجة ساهلة باش تحولو افكاركم الى حقيقة و يكونو ناجحين
صعيب الحال سيرتو كي تكون فكرة رايحة طبقيها لاول مرة
المهم حنا درنا لي قدرنا عليه
وجدت الكيكة تاعي و راها في الفريجيدار تبرد و العشية نقطعها

[c_souha]

mssa el khir habibati
rani nchouf el kole rah methamess hata ana
raweht men elkhadma nejri beche nchouf les gateaux enta3koum rah men bali beli el youm lareb3a malgres elyoum kamel wa ana nekteb fi tarikh


betawfik ll jami3

[ابداع جزائرية]

السلام عليكم ورحمة الله وبركاته
ماحقكمش يا بنات
هههههههههه
والله هذا وين شفت اعلان المسابقة
علاه ماقلتولييييييييش
ههههههههه
وش نكره نوصل بعد الحفلة


ربي يوفقكم
وان شاء الله نشوفو الابداع
متشوقة نشوف النتيجة
بلييييييييييز وحدة تبعثلي رابط الاستفتاء
بالتوفييييييييييييييق

[*ام رامي*]

سلاام على الاحبة
وش راكم ؟ ان شاء الله تكونوا بخير
راني قلت لكم الموضيع كلها تنزل يوم الجمعة
عندكم نهار طويل من الصباح حتى المساء حملوا براحتكم وياريت تصغروا الصور بليييييييييييييز
حظ موفق للجمييييييع