اريد الطلاق

مشكلتي · 2013-08-30, 00:05

السلام عليكم
لم اعد اتحمل الجو الدي اعيشه
انا متزوجة مند 3 سنوات و نصف زوجي ملتحي صلواته كلها في المسجد لنل ام لطفلين و حامل بالثالث مند تزوجت ما كسانيش راجلي بحكم اني قارية ندير ليكور لدراري الصغار ف الدار و منهم نتكسا هو الابن الوحيد لامه تغار عليه بزاف و نهار يزعف معاي و لا يضربني تفرح و تولي تقصر معاه ملي تزوجت ما هدانيش ولا حتى باكي شيكولا مرة جا و قالي انو جابلي كادو فرحت و جاو الدموع في عينيا مع اللخر ضهر يتمسخر بيا و جابلي كاشف الحمل
عييت ونهار داوسنا قلت جامي هديتني هدية قالي انا عامل هكدا هادي هي عقليتي بالرغم اني ديما نهديه روايح وكيما يكونش عندي نشريلو شيكولا في رمضان برك شريتلو بليغة كي نشوف الازواج نغير
حتى حقي كامراة نحسلو يعفني و لا ما يحملنيش صدقوني اماشي كزوج يجي يحسن لزوجته ومام كي نتزاعفو جامي يجي ليا و لا كي يدربني انا ديما لي نروح ليه هو جامي يولي ليا انا مراة ضعيفة وديما نحس لروحي محتاجاتو لو كان مانعرفوش مليح وعلابالي بجميع خطواته هو اصلا من الخدمة لدار و من الدار للخدمة كون قلت عندو واحد اخرى بصراحة محتاجة نحس لروحي انثى صدقوني حوايجي لي نلبسهم معاه و صدقتهم كامل نلبس ولا ما نلبسش كيفكيف تشهيتو شي نهار يجي يقولي هاد ليوم ليك خطرة سقسيتو قتلو عمرك خممت تخصصلي عشية ليا قالي جامييييييييييييييييي لما شتو ملتحي قلت هاد الانسان ادا حبني اكرمني و ادا كرهني لم يضلمني مي السبان تسبيت التعاير تعايرت الضرب نضربت واش مازلي غير التحويز هدرة زوج يقولي دورك نضربك هو سريع الغضب نهار لول قوتلو الحاجة لي مانحبهاش ما تحشمنيش قدام الغاشي مي في الصح ديما يحشمني قدام الي يسوا و الي ما يسواش
حماتي خرجت فيا لعيب السبعة مع الناس حتى انو حياتي الشخصية كامل عند الجيران حتى كي يضربني حاولت نكسبها بجميع الطرق ما فاد فبها والو هي يتيمه و انانية بزاف المهم دارت فيا منكر كبير حتي انو والديا ما يجوش عندي منها خطراش كي يجيو تولي تخبط و تعيط و تخبي في الماكلة و هي واعره بزاف الناس قاع حايرة كيفاش راني عايشة معاها
علابلكم تقطعتلي بليغة قولتلو شريلي قالي ما نشريش و دراهمك تاع ليكور وين راحو و هو شرا ليه صندال ب 6000 دينار و تفاهمو عليا يبطلولي لي كور خطراش عجوزتي ما تحبميش كي نلبس و نتكسا و ما تحبش كي يجيو عندي الناس مال قولتلو نبطل مي كل شهر تمدلي 2000 ديالي قالي باش نمدلك لازم نمد لياما تاني و باش نمدلكم بينزوش ما نقدرش مالا ما نمدش علما شيخي خدام و الحاجة الي تطلبها عجوزتي تكون حاضرة
وانا نروح بين الرجلين صباطي و راه مقطع
لوكان جاتني غير من عجوزتي نصبر مي زوجي اناني و ما يهتمش بيا قاع البنات قاع يحسدوني على زوجي مي كون يجيو يعيشو عيشتي يهبلو كاين نهار ما قدرتش نحمل بلعت 3 طابليتات تاع الدوا واش يقولي زوجي العزيز علاه جيتي لعندي كون بليتي روحك في دار والديك
ربي حبني ما موتش كافرة كي نخمم نولي للدار ما نقدرش بابا واعر ماشي الي تطلق بنتو و تولي لعندو
نقعد في داري و نصبر صبرت بزاف و حاسة لروحي حنهبل
اليوم ديسيديت نطلب الطلاق نبيع دهبي نكري دار و نقري لكور و منا العام الجاي ندير مسابقة تاع الساتدة انا مهندسة دولة في الاعلام الالي و عمري 27 سنة يعني مازالني شافية على القراية راني عايشة مدلولة بزاااااااااااااااااااف هدا الي حكيت ومازااااااااااال
عاونوني مانيش قادرة كثر

"راجية الجنة" · 2013-08-30, 11:23

السلام عليكم

والله قلبي تقطع عليك اختي العزيزة ملقيت وش نقول
هو ملتحي و أبسط حقوقك في الدين نورمالموا يعرفها مليح بانه ملتحي
ولكن حسب وش راكي تحكي لحية نتع مظاهر برك حتى الذهاب الى مسجد مظاهر برك وما اكثرهم لعباد هذي تخافي حتى تزوجي تقولي نقعد في دار والديا خير
يضرب و ميصرفش عليك و طامع في دراهم لي كور ربي يهديه برك هذا مهوش نتع تصرف نتع انسان يعرف ربي
اما عجوزتك حاجة عادية تبقى عجوزتك و لازم تحمليها بعيوبها كامل و تحطيها فوق راسك مهما ادرللك

هذا ابتلاء اختي العزيزة لازم تقبليها تقربي الى الله عز وجل صلي كل يوم قيام الليل ادعي في السجود ربي يفك كربتك و يفرج عليك
والطلاق عمروا ماكان حل صدقيني مراحش تسلمي من كلام الناس راح يقولوا انت هي الظالمة ، و مسؤولية نتع الاولاد مهيش ساهلة خلاص خلاص وانت وحدك
ننصحك نصيحة انك تصبري و تحتسبي صبرك لله عز و جل كل ما يجيك اذى منهم روحي للبيتك واقراي القرآن و صلي ركعتين و اشكي لله في سجدة
كثري من الصدقة ، و كثري من الاستغفار ، وقيام ليل والفجر في وقتوا شيء مهم جدا جدا جدا

ربي يفرج عليك و يهدي زوجك يارب

رحمة من المولى · 2013-08-30, 11:29

الله يهديه و يفرج عليك يااااااااااااااااااااااااااااا رب

محب السلف الصالح · 2013-08-30, 11:29

لله رب المشتكى

نسأل الله العلي القدير أن يفرج همك

ويسعدك في الدارين

biti · 2013-08-30, 11:33

اختي صلي استخارة وجربي قيام الليل ربي يفرج عليك

wafa16 · 2013-08-30, 11:36

لوكان ما عندكش دراري ننصحك تطلقي بصح راكي حامل بالثالث
امبعد يقولك علاش لمرا ما تفرطش في قرايتها
راكي خرجتي غير بالديبلوم ديالك الحمد لله راكي قارية
انا نقولك حوسي على خدمة بالديبلوم ديالك و
و دراهم ليكور طبعي بيهم و انا منك ما نزيد نهديلو والو نصرفهم على روحي و اولادو هو يصرف عليهم ماشي نتي
قالك صندال بر 6000 دج و مرتو مقطعة
و زعما اخينا
انا قلتلك اذا صيبتي خدمة بالديبلوم ديالك ادخلي تخدمي عجبو الحال عجبو ما عجبوش العيب يخرج من عندو و الطلاق يجي من عندو ماشي من عندك
ما قلتيناش كيفاش تزوجتو على خاطر راني حاسة سيفوك عليه يعني ماشي هو اللي خيرك
على بيها ماراهش مقيمك
مزية اللي مازالك صغيرة و كملتي قرايتك تعيشي و تعيشي ولادك

ولد حمد الباتني · 2013-08-30, 11:43

شاورتي والديك ؟؟
شاوري والديك

سآجدْ للهْ · 2013-08-30, 11:49

اختي زيدي أصبري وجزاءك عند ربي كبيير كبيير جدا
وربّـي راهو يخبييلك الأجر الكبيير والثواب الكبيير عندو
آآصبري فقط آآصبري فقط نتي صبرتي كملي الصبر
علابالـي الصّبر طعمو مر كيما العلقم
..ولكن الحلاوة تع الجزاء تع ربي منبعد تنسيك كلش..
آآنساي الافكار هاذي تع نطلّق ونروح نكري ونقري ووووو...
ليس من أجل أي شخص !
ليس من اجل نفسك ولا من أجل راجلك ووو
فقط من أجل الأطفال برك ما تطّـلقيش..

تراتيـل صبــح · 2013-08-30, 11:56

كلّ المشكلة تكمن في كون زوجك هو الابن الوحيد لامه،
فهو انسان مدلل غير متحمّل للمسؤولية،
وهذا سببه طريقة تربية والدته له،
واسمحي لي انْ أقول أنْ والدته عرفت تختار له المرأة التي تناسبه وتناسبها،
فهو يريدها زوجة دون تكاليف ووجع رأس،
وهي تريدها انسانة طيعة تستطيع التحكم فيها دون أنْ تنبس ببنت شفة،
وفعلاً وجدوا ما أرادوا،
يا أختي هذا رأيي ولكِ أنْ تردّيه،
رجلٌ كهذا لنْ يكون والداً صالحاً لأولادك،
سيترك كلّ المسؤولية لكِ،
ومع الوقت سيكبر الأولاد وتكبر مسؤولياتهم،
وسترين كيف ستتعبين معهم،
هنا لا أطلب منكِ الطلاق فوجوده وعدم وجوده سواء،
لكنْ وجوده على الأقل سيجعل الأبناء يحسبون له حساب،
إنْ لمْ يكن كبيراً على الأقل ما يساعدكِ على التحكم فيهم وتربيتهم،
وشيء آخر،
لو لمْ يجدكِ زوجكِ فريسة سهلة لما استمر بمعاملتك بكل هذه القسوة،
فيبدو أنّكِ من البداية تعاملتِ معه على التنازلات،
خصوصاً وأنّه انسان سريع الغضب،
وعوّدته على الهدايا رغم حاجتك أنتِ للضروريات وهو لا يوفرها أصلاً،
فلا تنسي أنه انسان مدلل ،
والانسان المدلل متعوّد على الأخذ فقط،
لا يحبّ أنْ يقدّم شيئاً،
فهو انسان أناني،
لذلك انتبهي لهذا الأمر،
لدي تساؤل :
واولاده؟ هل هو واقف على طلباتهم؟
أنتِ الآن بين خيارين،
ربما ثلاثة،
الطلاق والعودة لبيت أهلك،
وقد قلتِ بأنّ ذلك غير ممكن.
أو الطلاق واستئجار منزل،
وهذا أيضا ربما سيشكل لكِ مشاكل،
وربما يلومك أولادك فيما بعد.
والاخير هو انْ تصبري،
وتحاولي تغيير طريقتك مع زوجك،
فعليه أن يتعلّم أنّ لك حقوق عليه، وأنه يجب عليه احترامك،
وربما المفتاح كله بيد والدته،
فلو تمكّنتِ من التقرب منها واستعملتِ معها أسلوب الهدايا بدل زوجك،
ربما لوجدتِ نتيجة،
وحاولي التخلص من كل تلك المشاعر السلبية التي بداخلك،
فالمشاعر التي نحملها تجاه شخص يشعر بها ولو عن بعد اميال،
انظري في امر الدروس التي تقدمينها،
إن كان استمرارك بها أحسن،
أو التوقف أحسن،
وقرري،
كل ذلك حسب المعطيات عندك،
و هنالك امر آخر،
يجب أنْ يشعر بأنك تحبين أمه،
وعليكِ نصحه بالبرّ بها حتى ولو كان يفعل،
ولو أردتِ شيئاً
جربي أن تتحايلي عليه،
واطلبي غرضاً لكِ واقترحي مثله لامه،
ربما يحرّك ذلك مشاعره،
فزوجك ولد أمه.
في الاخير لا ألعم مدى نفع ما قلت،
فليست لي تجربة لكن قلتُ ما رأيته صواباً
وكلامي يحتمل الخطأ،
لا تنسي الاستغفار أختي،
وأرجو أن يتغير حالك للأفضل بحول الله.

TOKYO · 2013-08-30, 11:58

يا اختي ادا كان عنده اخته مليحه و عاقله و تتفاهم معاك اجبدي الموضوع و احكي معاها تعاونك +و ادا مكاش قولى امك و باباك يفهموم يا يغيير طريقة تعامل معاك او يكري لك حوش او الدار وحدك باش تنحو المشاكل و الطلاق اختي ماهوش الحل الخلاص و زيد الله يبارك 3 راه قريب كثري من الصلاة و الصدقة و الدعاء
الله يهديه و يهدينا اجمعين ان شاء الله

wafwaf8471 · 2013-08-30, 12:03

istakhiri c mieu

~~ أغيلاس ~~ · 2013-08-30, 12:29

و عليكم السلام و رحمة الله و بركاته،

زوجك تفكيره غير طبيعي، كيف لا يصرف على زوجته بحجة أنها تعمل في المنزل و تدخل المال ؟ !!!!!

شرعا يجب أن يكسيك مما اكتسى، اشترى صندالا بـ 6000 دينارا فيجب عليه أيضا أن يشتري لك صندالا بـ 6000 دينارا أيضا،

ثم كيف يضربك في كل صغيرة و كبيرة ؟ !!!!

هذه صفات اللئام و ضعيفي الشخصية من الرجال، فالرجل الذي يضرب زوجته من دون سبب أو لأسباب تافهة إما أنه وقح لا مشاعر له و إما أنه يحس بالدونية أمامها فيلجأ إلى الضرب لعله يملأ النقص الذي يحس به، و الإحساس بالدونية يرجع إلى أسباب كثيرة منها كون المرأة جميلة جدا و زوجها ذميم أو مستواها العلمي جيد بخلاف مستواه إلى غير ذلك، هذه الفروق يختلف تأثيرها على الرجال، فمن نفسه كريمة و قوي الشخصية لا تؤثر فيه بخلاف اللئام و ضعاف الشخصية،

العبرة ليست باللحية و الصلاة في المسجد، زوجك توفر فيه الدين، لكن هل توفرت فيه الأخلاق ؟ في الحديث إذا جاءكم من ترضون دينه و خلقه فزوجوه،

حاولي تذكير زوجك بوجوب الإنفاق في حقه و أمامك الأنترنت اختاري من المواعظ ما تشائين،

المهم، تبقى أمه كما يقول من الأسباب التي تمنعه من الإنفاق عليك، اعذريني على هذا الكلام لكن أمه يطول الزمن أو يقصر سوف تفارقكم و سوف يخلو لك الجو في منزلك،

أنصحك بأن تتوقفي عن تقديم الدروس الخصوصية و دعي زوجك يتحمل مسؤوليته، و بعد زواجك لو لم تقدمي هذه الدروس لكان خيرا لأن زوجك الآن يعلم أنه إن لم ينفق عليك فستتدبرين أمورك كما يفعل أحد أقاربي، يسافر و يترك زوجته و أبناءه الخمسة الصغار دون دينار واحد و لما يسأله الأقارب عن السبب يقول : زوجتي أفضل من الرجال و ستتدبر أمورها، يقول هذا الكلام في الغيب، لكن في المنزل يشتمها و يسبها و يشبعها ضربا و يحسسها أنها بلا قيمة،

بالنسبة للطلاق فإياك ثم إياك ثم إياك من طلب الطلاق،

سوف تندمين أيما ندم،

كما تقول جدتي، دار بعتبة أفضل من دار دون عتبة،

اعلمي أنه لصبرك على أذى زوجك الأجر الكبير عند الله،

اصبري من أجل أبنائك و أكثري من الدعاء،

الدعاء الدعاء،

و عليك أن تعلمي أن بعض الطباع يصعب تغييرها، فلا تحلمي أن يتحول زوجك بين عشية و ضحاها إلى ألفريدو تع قوادالوبي، أو اليخاندرو تع كاساندرا ( إن لم تخني الذاكرة في الأسماء )،

عليك أن تتكيفي مع زوجك كما هو،

أنت متعلمة،

سوف يكبر أبناؤك قرة عينك و ستجدين متعة كبيرة في الاهتمام بهم و تربيتهم و تدريسهم،

و زوجك له السنون لتعيده إلى رشده، فكم رجلا تكبر و تجبر لكن زال كل هذا لما كبر الأبناء و انتقلت السلطة إلى الأم،

مرة أخرى؛ إياك ثم إياك من الطلاق، ستندمين و هيهات ينفع الندم .

imane bela · 2013-08-30, 12:39

rebi yferedj 3lik
lwahed ychouf ham enass yensa hamou

abdel02 · 2013-08-30, 12:43

( يا أيها النبي قل لأزواجك إن كنتن تردن الحياة الدنيا وزينتها فتعالين أمتعكن وأسرحكن سراحا جميلا ( 28 ) وإن كنتن تردن الله ورسوله والدار الآخرة فإن الله أعد للمحسنات منكن أجرا عظيما ( 29 ) ) .الأحزاب.

~~ أغيلاس ~~ · 2013-08-30, 12:52

اقتباس:

المشاركة الأصلية كتبت بواسطة abdel02

( يا أيها النبي قل لأزواجك إن كنتن تردن الحياة الدنيا وزينتها فتعالين أمتعكن وأسرحكن سراحا جميلا ( 28 ) وإن كنتن تردن الله ورسوله والدار الآخرة فإن الله أعد للمحسنات منكن أجرا عظيما ( 29 ) ) .الأحزاب.

الرسول عليه الصلاة و السلام عاش فقيرا و حث زوجاته على الصبر معه،

أما السائلة فزوجها بصندال بستة آلاف دينار و هي بصندال ممزق،

استدلالك بالآيتين في غير محله .