هذا قريوش ختي اليوم اللي جبت من عندها لاروسات و درتو نمدلكم المقادير و الطريقة بالصور
3 كيلات فرينة + نصف كيلة زيت + قرصة ملح + مغرف كبيرة خل + حبة بيض + ماء الزهر باش تلمي بيه الفرينة + باكي خمارة كيميائية + جلجلان للتزيين + عسيلة للتعسيل
خلطي قاع المقادير و لمي بماء الزهر و خليها ترتاح شوية
للعلم أنا الخمارة مدرتهاش منحبش القريوش منفوخ
حلي العجينة رقيقة مليح ثم قطعي شريط طويل طولو 13 سم و عرضو 8 سم و إذا حبيتي نقصي الطول و العرض أنا نحب الحبة كبيرة ثم ديري فيها خطوط بزاف فالوسط كيما راكي تشوفي
ثم طبقيه على زوج
ثم زيدي طبقيه يعني يخرجو أربع طبقات
أحكمي الحبة تاعك و ديري فتحة في الوسط ثم الجهة العليا دخليها فالفتحة و خرجيها يعني تلفيها
ثم إقليه و تكون النار قليلة باش يطيبلك مليح ثم خليه يريح شوية و عسليه بعسيلة هافتة و ذرذريلو الجلجلان
بالصحة و الهنا عليكم و نشالله يعجبكم و متنساوش ادعو لختي
