هل الطلاق هو الحل ؟!! ارشدوني تعبت

[مشكلتي]

السلام عليكم
انا امراة متزوجة منذ 4 سنوات أم لطفل 3 سنوات
كنت بنت طموحة متفوقة دراسيا حتى تعرفت على زوجي سمحت في طموحاتي احلامي قبلت بكامل شروطو اني مانخدمش (عندي ماستر ) لبست العجار المهر كان قليييل العرس مكانش مع هذا كنت راضية وسعيدة لاني كنت شارية راجل مثقف متدين لي يخاف ربي فيا
بعد زواجي باقل من شهر قال انو مديون مديتلو خاتمي يبيعو بعدها دخلتلي لابورس نتاع الماستر سلفتهالو بعدها قال مديون لخويا عطيتلو سلسلتي لي شاريهالي بابا كادو على اساس يرجعها بعد 3 اشهر بعدها جا وقت زيادتي قال الشهرية مادخلتش بعت مناقشي وشريت بيهم لباس لأبني هو حاجة ما شراهالو
مع هذا والله كنت نحبو ونقول غير ظرووف وتمر مع انو مترسم ويخلص اكثر من 3 ملاين
بعد نفاسي خرجلي بخرجة جديدة قالي نرقد في غرفة وحدي ابننا يبكي في ليل ونصبح خدام
من وقتها كبر الجفاء بيننا
ومن اول يوم بزواجي بيه اذا انا ما بادرتش بالعلاقة مستحيل هو يبادر
لكن بعد ما عاد يرقد وحدو عدت نحس روحي جاارية انا نروح ليه في غرفتو يقضي حاجتو ونرجع لغرفتي !!!
لما نجي ناقشو في موضوع مستحيييل يتناقش يخرج ولا يروح لغرفتويغلق على روحو
وعلى اتفه سبب كي نختلفو يروح يبات في دارهم ويخليني وحدي !!!
مع هذا ولا مرة نايفتو ديما نعقب
حتى مصاريفي الخاصة واغلب مصاريف ابني انا نشريها بدراهمي حتى الاواني المنزلية ونص لكرا ...الخ لاني عدت نخيط في داري وماشيتلي الحمد لله
لبارح ضربني منها خلاااص كرهتووو نتاع الصح حياتي معاه اصبحت مستحيييلة
مع هذا ابني كاسرلي ظهري مش حابة نظلمو
انصحوني جيتكم بجاه ربي

[مراد سابقا10]

لم توضحي مشكلتك بالضبط هل زوجك يعاني من ضعف جنسي ام لا ؟؟؟؟
اذا كان يعاني من ضعف جنسي هناك اطباء ذكورة ونفسانيون يعالجون مثل هذه الأمور .
اما اذا كان بصراحة بدا بالملل منك فتلك مشكلة اخرى

[toulay]

وعليكم السلام ورحمة الله وبركاته
قالك المثل الطفل كيما ربيتيه والرجل كيما ولفتيه
انت ولفتيه بيع بيع بيع وهو عجبوا الحال
هذا لصار كامل نتيجة التنازلات تاعك وهو دارهمو وين راحوا وين قاعد يديرهم
المفروض هو ليكسي ولده ويشريله
جرب احكي معاه حاول تفهم واشبيه ومرة اخرى حتى لو يكون حاصل مكلاه تبيع ذهبك صح لحدايد للشدايد بصح بيعهم نهار تكون ضرورة قصوى يعني الله غالب لازم
بالتوفيق

[صمت الرجوله]

لصاحبة الموضوع ارجوك لا تتسرعي ردي بالك لا تفرطي في زواجك...لا تتركي بابا للشيطان و ابغض الحلائل عند الله الطلاق
...و حقيقة الله يهدي زوجك هدا...الظاهر انه بخيل و اناني و مازال ماشدش عقلو مليح
يعني كان من المفروض انه يشوف لتضحياتك لي ضحتيهم من اجله و لطيبتك و يردلك الجميل موش يبخل و يبعد عنك لاعذار اقل ما يقال عنها انها تافهة و موش حق عليه ايضا يرفد يدو عليك و انت عملت لحاجة كان يجب عليه هو ان يوفرها لك ,و في الاخير لا اظن ان اجر اكثر من 3 ملايين مع عائلة صغيرة راح يخليكم تحتاجو يعني الحكاية انه مجرد بخل....
.
.
لكن هذا لا يعني انك تطلبي الطلاق فهاته الصفات كلها يمكن ان تقوم بالذكاء الذي لا ينقصك

[زبدة ذايبة]

ماكرهتيه ما والو

مازال يزيد يضربك وانت تحبيه.

اختصرت نفسك في بضع كلمات.

أنت جارية وفقط.

بعتي ذهبك

وبعتي روحك.

مازال هو يبيعك بشكل رسمي.

كملي هكذا والتالية في النسا تديلك بلاصتك.

واخرجي بشهادة الطلاق.

البارح زغردتنا قلنا تزوجتي

وغدوة أرجعي لدار باباك بصغير في يدك

وهو يروح يتزوج بأخرى تمسح بيه الارض ويقولها اسمحيلي راني مقصر.

ردي بالك يا اختي

كلما كنت متنازلة كلما كان العيب فيك....

خرج من الغرفة الله لايردو علاه تبعي فيه.

وعلاه تبيعي ذهبك.

وعلاه تتنازلي.

كاش عيب فيك. او عاهة.

كل تصرفاتك تدل على أنك ماتصلحيش تكملي معاه.

(هذا ليس كلامي أنا أترجم تصرفاته)

الحالة اللي راكي فيها معاه تسمى بالطلاق العاطفي.

ما خص تفكري تطلبي الطلاق.

راكي مطلقة عاطفيا و.......

بفاتلو خطوة وحدة يديرها معاك

أنه يحولك للمحكمة وينتهي زواجك.

ديري لقيمة لروحك.

ذليتي روحك لأبعد الحدود

حتى أصبح مايهموش وماعلابالوش بيك

مجرد جارية ل.......

يهينك ويحتقرك لأنك احتقرتي نفسك وذليتيها

كيفاش حبيتيه يدي لك قيمة وانت اصلا رخستي روحك.

علاجك في الأسطر الأولى اللي كتبتيها.

هو تقدملك على أساس انك متعلمة (عندك شخصية) وجد أنك لاتساوي شيئا.

ضرباتو الغمة منك لهذا اصبح يتفنن في الهروب منك.

وحتىن أنه يفكر يصرف عليك يستخسرها فيك.

شدي لحزام وشمري على سواعدك

وغيري من تصرفاتك.

وكوني حازمة.

وماتخلطيش الأمور

الأشياء اللي لازم هو اللي يديريهم

ماكالاه تدريهم انت (من الشيح ديري ركايز)

وأنك على كل شيء قديرة.

من ولا شي تصنعي المعجزات.

هذا اللي جابلك المشاكل.

تضني أنك إنسانة مضحية وتقومي بواجباتك.

عرفك رخيصة وماديري والو أو أقلها إنسانة ماعندكش إحساس

على هذا ضربك وتكملي هكذا يزيد يضربك ضرب مبرح

تظني في نفسك أنك رايحة تكوني في نظره رااااائعة وما في أحسن منك

بالعكس أنت إنسانة مبتذلة ويسهل الاستغناء عنك.

كلما حسستيه أنك مطيعة كلما جبتيلو الملل والكآبة.

كوني مختلفة وغامضة

حتى مايعرف من راسك من رجليك.

وجددي في أسلوب تعاملك معه.

ونقصي من التضحيات اللي راكي ديري فيها ضد نفسك لأنها ماتجيب غير الويلات.

مرة ثانية إذا سبك أو ضربك ديريلو مشكلة

حتى يعرف أنه عندك أهل وأنه عندك قيمة

ياعجبا !!!!!!!!!!!!!

راني حايرة فيك

مارانيش نخرب لك في دارك

أو نقولك أطلقي

أبدا أبدا أبدا

راني نساعدك حتى تسترجعي زوجك وأبو إبنك

وما ينتهيش بيك الحال رقم في إحصائيات الطلاق

حافظي على بيتك من خلال محافظتك على نفسك

المرأة الضعيفة لايحبها الرجال

ربي يوفقك.

[محارب الحمق]

يضحكني ويحزنني تفكير النساء في آن واحد. أكره أنواعا من النساء يأمرهم الله عز وجل بستر أنفسهن فلايفعلن ولما يأتي عبد لله انسان قاصر يجب أن يقضي حاجته في المرحاض كل حين ويغسل جسمه من الاوساخ كل حين ويطب من المرأة التي أحبته أن تستر نفسها تستر نفسها طاعة له. انت لبست العجار ارضاءا لزوجك لا لربك. وماكي مدايرة مزية في حتى واحد كي لبستي لعجار. اصلا الستار والنقاب سنة نبوية ومن المؤسف أن من تفعله تعتقد أنه قامت بتضحية ومزية !!!! أما بخصوص طموحاتك...دعني أسألك...ماهي طموحاتك؟ أن تخرجي من البيت على الساعة الثامنة صباحا كالرجال لتزاحمي الرجال في المواصلات ثم تزاحميهم في مكان العمل ثم تزاحميهم في المواصلات الى أن تعودي الى منزلك في المساء وتقبضي راتبك في اخر الشهر؟ اه ربما تعلمي الأجيال أو تداوي المرضى؟ في عين الله امرأة التزمت بيتها وصانت فرجها وأطاعت ربها خير من ألف معلمة وخير من ألف طبيبة. أما بخصوص زوجك فلا هو متدين ولا هم يحزنون. لم أسمع أبدا عن متدين تنفق عليه زوجته أو متدين يخون الوعد والعهد. مشكلتك أنك قدمت زوجك على ربك في كثير من الحالات فعاقبك الله بمن تتيمت به. من تعلق بغير الله عذبه الله به. لا يمكنني أن أحكم على السبب الذي جعل زوجك ينفر منك. ما يمكن أن أنصحك به هو: أصلحي حالك مع الله يصلح الله حالك

[متفوقة بامتياز.]

غيري عقليتك
علميه يتحمل المسؤولية
و النفقة على الاسرة مهمته مكلاه تبيعي ذهبك و شهريته متبانش
اما الضرب ردي بالك بسكو ادا سكتي مرة غادي يوالف
و قضية الغرفة عندي وحدة لافامي صرالها نفس الموقف و قالتلو هدا ولدنا للزوج منخرجش من الغرفة و راهم غاية درك
نقلك حاجة متولفيهش بلي كل العبأ عليك و هو مريح
و الثانية عندك ولدك راه بيناتكم حاولي تنقدي زواجك مشي تخمي فالطلاق

[Om inesanis]

اختي الكريمة انا لا استطيع ان الومك كما لامك البعض فانا في نظري انت امرأة لم ترد شيئا إلا العيش في هناء مع عائلتها الصغيرة لكني الومك عن طريقتك في فعل ذلك ...على كل اللوم لن يفيد الان ...المهم كيف تتصرفين الان اول الشيء ابعدي فكرة الطلاق من راسك....فابنك اولا ليس ذنب له ليعيش حياة مظطربة بسبب اخطائك وأخطاء والده..ولكن عليك أن تغيري معاملتك معه فقبل كل شيء الضرب اياك واياك ان تسكتي عنه لأن سكوتك مرة سيؤدي إلى مرات أخرى...ومبيته في غرفة أخرى هذا قراره اتركيه يفعل ما يشاء لكن اياك واياك ان تبادري الى العلاقة لان هذا هو خطاك انت تعتقدين أنك بمبادرتك الى العلاقة ستتحسن الأمور ولكن هذا هو أكبر خطأ ارتكبته كيما نقولو خليه في الخل حتى. يقراس ويقعد شهر شهرين ثلاثة متروحيلوش انت ...ابدا وافهمي ماذا اقول لا تذهبي إليه ابدا وسترين كيف ستبدأ الأمور بالانقلاب ويا ختي ماشي يجي ليك اليوم على عدوا تروحي تجري عندو لا خليك ثابتة اذا أراد العلاقة هو يجي ليك...وعلى أمور البيت متشريش الأمور اللي لازم هو يشريها خليه لما يشوف النقص رح يعرف يشري انا اعلم ان.هذا صعب قليلا لانو حنا النسا نحبو كلش في مكانو خاصة بما يتعلق بالمنزل والأطفال لكن اتعلمي تضبطي يدك مجابش القضيان متطيبيش كي يقولك وين الماكلة قولو اشريلي انطيبلك...في البداية رح تجيك صعيبة لكن لازم تتعلمي تخليه يتحمل المسؤولية ...وقبل هذا كامل الجئي الى الله فلا ناصر لك غيره ادعي في أواخر الليل..وصلي وصومي دعاء الصائم مستجاب...وعسى الله أن يغيره لما ترضينه

[noursm]

اولا قبل كل شيء استعيني بالله لانه هو الواحد القادر على فك كربتك.
درك اللي فات مات اطوي الصفحة و تحركي قبل ماتزيد تتعقد الامور اكثر و اكثر .
و الاخطاء اللي درتيها في حقك حاولي اتعلمي منها
قصدي من الآن فصاعدا ثقلي نفسك و زيري العقلية
و تاني في رايي لازم ديريلو ملمة يحضرو فيها كبار من عائلتك و كبار من عائلته و خاصة الرجال لان الراجل يخاف من الراجل و احكيلهم باش توقفيه عند حده ، خاطر كون تسكتي رايح يركب عليك (راهو اصلا راكب عليك و يزيد)
و قبل ما ديريها عندك برك تهدريلو عليها زعما تخبريه راكي اصلا دخستيه فوق اللازم ، حتى يلقاهم دخلوا عليكم هكاك باش يتسقم.
كون جيت في بلاصتك الجمعة الجاية ولا غدوة بعد لكان تضمني كامل ماش خدامين عيطي لماليك و لماليه و ان شاء الله فيها خير و ما تقوليش رايحة نكبر الحكاية ، لا بالعكس ماهمش برانية و لازم اصلا يسمعوا .
ربي يسهلك اختي .

[sidali1988]

ربي قال : والعصر ان الانسان لفي خسر..ايي جميع الناس خاسرين...ثم استنى فقال : إلا الذين آمنوا وعملوا الصالحات وتواصوا بالحق وتواصوا بالصبر...اوصيك بالصبر..واياك ان تسمعي لي يقولك راهي ذليتي روحك...اصبري .تؤجري ..صبر لله اولا ..ثم صبر لنفسك في مجتمع لا يرحم المطلقة..ثم صبر من اجل ابنك...كلها مرحلة وتفوت ..ادعي ربي يصلحلك زوجك..فهو الهادي..اياك والطلاق مهما صار الا اذا امرك بالحرام..نصيحة من اخ مشفق...

[الواثق]

الردود كارثة والله..........وما الضير من ان تكوني جارية زوجك .....الاتعلمين انه جنتك ونارك....تقربكي اليه طاعة وفيها اجر عظيم ....قد يمر الرجل بنفسية تجعله يكره روتين حياته فيسيء التصرف...........هذا زوجك ابو اولادك فقدمي نفسك له فانت حلاله وليس لهذا علاقة بكرامتك فانت واياه واحد وكرامتكم كرامة واحدة.......اما قضية المال فمن العيب ان تذكري هذا وعليك بان تجدي سبب عزلته مرضاة لله لا لاحد.اخر..........الشيء الذي لاتفهمينه ربما ....ان الرجل يحب زوجته ولكنه لايستطيع الافصاح عن ذلك بل يتصرف بالعكس تماما وهذا لعقلية الرجل الجزائري المتوارثة وثانيا تلبيس من الشيطان حتى يفرق بينهما...............والله المستعان

[المشتاق لجنة النعيم]

لقراءتي لبعض الردود و التي طبعا كالعادة كانت من النساء و كيف ينصحنك بالطلاق سواء بطريقة مباشرة أو غير مباشرة و أظنهن في غالب الأحوال لسن حتى متزوجات أقول لك ركزي معي أختي جيدا و كوني واقعية معي : الزواج نعمة من عند الله فهناك من تفعل المستحيلات من أجل أن تجد زوجا و أنت الحمد لله لك هذا و ولد ربي يخليهملك أنت فكري فالمستقبل لو تطلقت هل تظنين أنك ستعيشين بتلك السعادة التي تتصورينها إذهبي و اسألي إحدى اللمطلقات التي مر زمن على طلاقهن و ستعرفين الإجابة . أما بالنسبة لمشكلتك معه إعلمي أن المال ليس كل شيء بل بالعكس إذا عاونت زوجك فلا أعظم من هذا و إذا كان زوجك بدون عمل حاولي أن تحفزيه دون أن تثيري قلقه أو تجرحي مشاعره و استغلي في ذلك ابنك فلا أظنه يهمل إبنه و إن كنت قادرة على مساعدته و لو بإنشاء مشروع صغير تكونين تفضلت عليه و هو مع الوقت سيفهم و يتحمل المسؤوليه ، أما مسألة الفراش فأظنه تعود بمبادرتك أنت الأولى و إذا ترغبين بمبادرته هو فأنت امررأة و لا أظن أنه تنقصك الحيلة أتركيه في حاله مدة و كوني دائما بشوشة أمامه و متزينة مع بعض الحركات و بالتأكيد هو رجل و لن يصبر على ماهو مقدر له ، أما مسألة العجار و عدم سماحه لك بالعمل و غيره فأي رجل غيور على عرضه و امرأته سيطلب منها ذلك و لك أن تفتخري بغيرته و حرصه عليك و لا تري بعض الأمور من ناحية سلبية كقولك أصبحت جارية بل بالعكس أنت خدامة لراجلك و هذا يجعلك مرا و نص و هذا ما يحلم به كل رجل و حتى لو لم يصرح بذلك .

[عادل عبد الله]

الأخت عطي روحك قيمة ماشي كل مرة يقولك عطيني نبيع حاجة تعطيهالوا ، وزيادة متقربيش منه بزاف عامليه بالمثل ليعرف قيمتك اختي مابك ؟؟؟

[عسجدة]

ياحوجي يانا
كلش ....كلش .
يقتلني ومنمدش ذهبي .
معليش اختي اللي فات مات .
درك لازم نديماروا من الاول .
في خاطر الطفل 3 سنوات لازم :
الحاجة الاولى لازم ترقي وترقيلوا معاك في الماء لاماكان حتى سحر ولا مس ولاعين .
نروحوا للخطوة الثانية :
بدلي العقلية نتاعك سورتوا تاع نسرف على الراجل .
كي يكونوا عندك متخرجيهمش خبيهم .
قوليلوا معنديش .
خليه يتحمل المسؤولية نتاع وليدوا .
خليه يتلهي شوية با وليدوا .
ابداي بالحوايج الصغار .
قربي الطفل من باباه .
اكذبي عليه قوليلوا وليدك قالي توحشت بابا ومبعد قوليلوا قالي راني حاب بابا يشريلي حوايج .
كي يدخل زوجك قولي وليدك اجري
باباك جى .
كي تعرفي ان الولد سيطر على الاب الان دورك انتي .
يارحم والديك متبقايش تخمي في
صرفت عليه وبعت ذهبي و...و....
بدلي العقلية غير تشوفيه اهدري بالعقل كلخيلوا اكذبي عليه المهم
هذا شغلك ومزيديش تقولي جارية
هذا واجب لازم تقومي بيه ولكن
يا اختي انتي ماكيش تستغلي
مكانتك كالجارية كما ينبغي .
اعيدي النظر خاصة في هذه النقطة .
حاولي التغير من نفسك ومن افكارك ....وهناك سيتغير زوجك .
انتي ولفتيه بعقلية لازم تعملي جهد مكثف بعقلية ودخرة .

علابابك والله مجاش الطفل في الطريق لوكان راني قتلك طلاقك
افضل بكثير من حياتك مع هذا الزوج .

في خاطر الطفل حاولي وحاولي وحاولي ولا تيأسي .

اصعب شيىء يعيش طفل بدون اب
رغم وجود اباه على الواقع .

سلام

[yasmine700]

حسبنا الله ونعم الوكيل مشي قادر على الزواج علاش يتزوج ويغبن بنت الناس