مشكلتي

[مشكلتي]

السلام عليكم

صراحة مشعرفا من نبدي حسا روحي مشوشة ريحا نحاول نوصل الفكرة ونعطلكم خلفية على واش حبا نهدر

انا خدامة و الحمد الله كاين يخدم معيا واحد ومن بعد نجح في كنكور راح هذا انسان في الفترة لي خدم معنا في نفس الادارة بصح ماشي في نفس المصلحة هدرت معاه 2 مرات الاولى كي طلبت وثيقة لوحدة تخدم معنا كانت عطلة و تانية كي قلتلوا مبروك عليك كي نجح في كنكور حبت نقلكم بلي منعرف عليه والوا ومعندي عليه اي خلفية رغم انوا كان يتردد على مصلحة تاعنا بزاف لانوا كان واحد يخدم معنا صاحبوا المهم هذا الانسان حاب يخطبني ارسلي مع مرسول ( هدا مرسول يخدم معنا محكا شمعيا انيا بصح كلف زوجة تاعوا تخبرني لاني نعرف زوجتوا وهدا مرسول هو تاني صاحبوا ورجل ماشاء الله عليه ) ان شاء الله تكون توضحت فكرة انوا انا منعرفوش بصح كي ندنق مع من يمشي نقول ماشاء الله المهم انا بعد ماصليت الاستخارة قبلت وهو سقساهم اذا كنت حبا نهدر معا هاو لا انا قتلهم ميهدرش معيا يهدر معا بابا و فعلا راح هدر مع بابا و نهار لخميس بربي ريح يجو يشوفوني (الرئية الشرعية ) قال لبابا دوك يجي هو و اموا و 2 خواتاتوا كي قلتلي يما قتلها واش محل باباه من كل هذا باباه مجاش طول يعني مهدرش مع بابا و لاحاول يتعرف بيه يعني خارج مجال التغطية صراحة توسوست و سقسيت طفلة اذا كان باباه رفض زواج ابنوا مني او لا لانوا تصرفوا غريب قلتلي مشكيتش قلتي تسقسي رجلها قتلها متسقسيهش و خلي هذا الامر بيني و بينك و كي روحت سقسيت يما اذا كانت سقسات بابا على بابات هدا راجل علاش مبانش قلتلي يما بابا كي سقسا قولوا باباه مكان مكان و كي سقسا راجل قلوا حنيا رنا شويا مع جيران و مقدروش نخليو الدار و حدها تم قلت ليما و هدا باباه ميخدمش و لا كيفاه قلتلي نهار كامل هو قاعد في الدار صراحة توسوست و صماطلي كلش مشعرفا اذا كان هذاوسوست الشيطان ولا واش لانوا حرت اول مرة نسمع بهدا الرجل هو يدير كلش و باباه خارج مجال التغطية حتى انوا ماولش يتعرف بنسابوا اذا كتب ربي

انتم واش رايكم علبالي ريحين تقولولي صلي استخارة انا صليت و مزال نصلي بصح حبت نعرف منكم اذا هذا شيئ طبيعي او لا وخاصة انوا شوفا تاعي نهار لخميس صراحة فشلت و مقدرا ندير والوا

[نورسين.داية]

الصراحة الموضوع يثير الشك و الأسئلة

و هي ماش صعيبة .....أنا لو كانتي في ولايتي نقدر نجيبلك السيفي نتاع جدو ههه نورمال و الله سهلة جدا هذه الأمور


اكتيفي شوية تلقاي لي يدلك على حيثيات الموضوع

[rose de sable s]

الاخت انت مكبر وموضوع
الخاطب تعرفين اخلاقه لما الشك
الاب ممكن يقلك نجي كي تقبلو
خلي امور تمشي عادي

[nihal159]

أنا ثاني صراتلي كيفك؛ باباه ماجاش خلاص حتى تفاهمنا على كل شيء مع راجلي و في الأخير جاء للفاتحة و قطع الشرط مع بابا؛و كي سقسيت زوجي قلتلو علاش باباك مايضهرش في الصورة حتى للأخير قالي هذا هو الكراكثير تاع بابا في زواجات خوتي لكل مش غير أنا؛وأنا كنت شاكة كيفك يعود مش قابل نتزوج ولدو؛ و كي تزوجت لقيتو الحمد لله أب ثاني ليّا حنين معايا و يسقسي عليا و في بداية زواجي كان يبعثلي القاطو و الحلوة تقول أنا طفلة صغيرة وهو يدلل فيها.

[محمد جديدي التبسي]

هناك الكثير من هذا النوع وهو حالتين يا إما يكون القرار بيده وحده ومن النوع الذي لا يحب اشراك والده في الامور وبينهما حساسيات وخلافات واما يكون من النوع الذي يقدر والده كثيرا ولا يأتي به الا لما تكون الأمورمحسومة والقبول تام بين الطرفين (لأنه يتحرج ان يأتي معه والده ثم يقابل بالرفض أو لا تعجبه الفتاة ويتحرج يرفض مادام دخل فيها والده) وهذه عقليات على كل حال ..شخصيا أتمنى لو أقدر على حسم الأمور ثم اشراك الوالد في النهاية فقط ..الأمر بالنسبة لك لا يجب ان يكون محل حيرة كبيرة فالمهم هو من سترتبطين معه وليس والده والله أعلم..ربي يتمم على خير

[طيور الجنان]

اختي الكثير يديرو هكذا لانكم راح ديرو رؤية شرعية معناتها قادر يكون قبول و قادر رفض و بالاك هاذ الراجل ماحبش يدخل باباه حتى اذا كان قبول و تكون حاجة رسمية يجيب باباه هذا رأيي الشخصي و زيدي سقسي عليه عادي زوج صديقتك يسقسيه مباشرة مافيها والو هاذي حياتك و لازم تكوني مطمئة لهاذ الراجل من جميع الجوانب ربي يجيبلك اللي فيه الخير.

[حياتي نبع امل]

الاب يجي بعد القبول وبعد رضى اهل البنت مايجيش في الرؤية .هاذو هوما العادات والتقاليد

[سجل أنا جزائري]

الأب مش لازم يجي مع الولد في رؤية الشرعية كاين يجبو معاه كاين لا لا حتى يتفادي الأحراج لما ما يتمش القبول

أنا ثاني رحت انا و يما فقط لأني هذي رؤية فقط و ثاني عيب شوي كلما الرجل يروح يدير رؤية شرعية يكركر بابه معاه ما تنسياش كاين بزافرجال يدير بالاك 10 و 20 رؤية شرعية باش يخطب وحدة راكي تتخيلي 20 مرة و هو يدي باباه على جال رؤية الشرعية فقط و مبعد ما يقبلوش به !!

اذا تم القبول الطرفين صح هنا الاب لازم يحضر لخطوبة الرسمية

و هذي تع الأب يخدم و لا ما يخدمش و قاعد في الدار اولتهم نتي يهم الرجل اللي راح تتزوجي به مش الأب و ثاني شيء هذي الأمور يمكن ان تتحدثي معاه في رؤية الشرعية و ش يدير باباه و ين راح يسكنك اذا كتب ربي

اذا عجبك اللهم ما بارك و ادا ما عجبتكش عائلتو عادي قوليلهم ما كتبش المكتوب

علاش راكي تقلقي في روحك ذرك