تنويت من زوجي

[مشكلتي]

السلام عليكم اليوم طلبت من زوجي يديني بنت خالتي ولدت نروح نطل عليها لانها مقطوعة من شجرة راهي نافسة و عيانة في طريقنا نجوزو عند يما نشوفها طاحت من الدروج ناض يعيط علي وحب يدير الدواس كل مرة نكون رايحة كاش مضرب يدير هك اذا عرس حتى يبكيني والله نخرج بلا احساس ولا طعم وانا ما نيش من النسا الي يخرجو بزاف االا للضرورة اليوم شديت كوان و بكيت لانو يعاملني كانني غريبة عمري ما حسيت بحنية من جهتي والله صدقوني اني ديرتلو جنة فوق لرض والله انا زوجة مطيعة والله حتى سباطو نحيهولو واذا قاستو شوكة نبكي معاه لكن هو بعيد علي حتى اسمي يقعد باليومين باش ينطقو نحسو بعيد علي ما يمدليش الحنانة الي نمدهالو هو طيب و ما يخالطش و حدو حد روحو مصلي والورد ما يفوتوش لكن العواطف ماكاش اتصورو انو ولا مرة حكملي يدي او لعب معاي كما وصانا سيدنا النبي صلى الله عليه و سلم والله راني نكتب و نبكي في نفس الوقت .هو راح للمسجد وانا ما لقيت لمن نفرغ قلبي على بالي رح يقراها لانو يدخل للمنتدى و يحب يشوف وش فيه بالك يزعزع و يفهم بلي هذي المشكلة تع الزوجة تاعو الي تطلب من ربي يهديه و يكون لي كما كان النبي مع امنا عائشة.

[ام هند]

اللهم اصلح حال زوجها ليكون لها كما كان رسولنا عليه الصلاة و السلام لامنا عائشة عليك بالدعاء اولا وان تصارحيه ثانيا احكي معاه كيما راكي تحكي معانا عبري على مشاعرك ابكي ربي يحنن قلبو ان شاء الله ويفرج عليك

[sabrina.nia]

الحمد لله كي عاد مصلي و خطيه لحوايج لخرين احمدي ربي على هذي النعمة وما كانش انسان كامل من كلش

[الراغبة فى رضا الرحمن‎]

أنا نحس بيك للأسف مام بابا يدير لماما هكا
كتجي تروح للأهل تاعها وهوما دوركا كبار ومازلت عقليتوا هكذا
لجيهو تاع عمومي برحب والسرور والجهة تاع خولي نو وصح تبكي قبل ماتخرج لعرس ولا خرجة تفكرت ماما
إيـــــــــــه ربي يهدي ما خلق
صح ضغط كبير
ربي يصلح لحوال ويهديه و ترجعوا إن شاء الله كي سمن على لعسل كيما نقولوا

[ROUBI.dz]

ربي يهديه زوجك ينقصه توجيه فقط الا اذا كانت عقليته هكذا متسلط ساعفيه واتخذي اسباب ليتعلم اعرضي عليه مواقع اسلامية فديوهات خطب احاديث نبوية كيف يجب ان تكون الحياة زوجية اكيد يوجد حل لمشكلتك شوي صبر فقط سبحان الله بعض الازواج لا يدرون بان زوجاتهم نعمة انعم بها الله عليهم ليصلح حالهم

[faty05]

ربي يسخرلك زوجك

[mrmilano1984]

يااختي والله نعطيك نصيحة من القلب نحس بيك دك نفهمك حالة زوجك مليح مليح واسمعيني مليح ودري بنصائحيبلاكي تسمعي للنساء لي يحرضوك اولا حداري جدا يخربولك دارك لو جا تاع شراب ومخدرات ونساء ربما نعطك امور اخري وحلول اخري اوك لكن هدا زوجك مايضربك مايسرب مايدخن مايخدر مايتبه النساء ابدا طيب عاقل شوفي دك نفسرلك حالتو واضنها الاقرب هدا كما واحد نعرفو مزوج من احد الاصدقاء حكالي عليه واحد جاف عاطفيا نغرفي جاف جاف يعني مش يلعاني يديرها هو تربي هاك اللع اعلم باباه كان قاسي جدا وكان يعاملهم بعنف شديد وضرب وووو كان مش حنين عليهم هادي تاثر بزاف علي الاولاد اوك ربما راهو خرج لااحد والديه او وراثي صدقيني اختي انتي امراة صح طيبة القلب وحنينة ماعليش خليه بلعقل وحدو يتبدل او ربي والله هو لي يهدي هو صعب جدا حالات كما هادو يتبدلو خصوصا في العواطف مايعدرش كلام معسول للمراة او لزوجته وشريكة حياته هدا يكون طول حياتو هاك ولادار علاقة ولاخالط نسوة او عندو عواطف جياشة واحاسيس كاين رجال عكسو تماما هو لي يشبع مرتو اوك داخلة في شخصيته
نعرف قتلك هدا السيد مرتو عمرو ولاقبلها او شد يدها او حضنها ومانعرف صراحة علاقتهم الحميمية كيف تحدث ربي يهديه هدا واش ندعيلك انتي ماعليش اعطيه اللازم تاعك وربي هو لي ياجرك الا ماديتيش مقابل في الدنيا تديه في الاخرة صدقيني وبرافو علي صبركانتي مراة فحلة ومتدينة باينة
ادعي ربي اليوم الجمعة يهدي عقلو

[mrmilano1984]

اختي مش مايمدلكش الحنانة مش هاك هو عامل هاك كاين رجال كل واحد ونفسيتو لازم تدرها في راسك مليح مليح وماتبقايش تتوسوسي منو هو هاك عامل حتي قبل زواجو اسالي وتشوفي عقليتو تلقايه كدلك انتي اعطلو الحنان تاعك بلاك يتغير شوية لانك نتي كل شيء عندو وبلاك هو في داخلو يحبك ومايقلكش كاين نوع رجال هاك صدقيني نعرفهم هو في الداحل يموت علي مرتو بصح العواطف والكلام والحركات والو حاولي تديريلو امور باش يتبدل
علي فكرة واحد ايضا اين خالي ايضا مرتو تقولنا عاقل ووو بصح مش رومانسي يعني فهمنا كل شيء رغم انو يوفرلها كل شيء ولكن العواطف مدفونة ومرتو حساسة سونتمونتال قراف وعطاه ربي مراة حنونة جدا ومشبعاتو الحنان والعاطفة

[نصير24]

ربي يعدل احوالكم ...

[محمد جديدي التبسي]

انا مع الرجل الذي يمنع زوجته من الذهاب للاعراس اما صلة الرحم فلابد منها لكن بشكل معقول زيارة مرة في الشهر تكفي وتزيد اما الذهاب في كل مناسبة ختان ولادة زفاف هذا مبالغ فيه لأنه تترتب عليه مسؤوليات اضافية يعني هدايا مادية وربما زوجك لا يطيق هذه المصاريف وما يحبكش تخرجي كثيرا وهذا من حقو ...
اما قضية المشاعر فهذه طبيعة اغلب الرجال بسبب طريقة نشأتهن ونوعية التربية التي تلقوها ..لكن اظن ان للمراة القدرة على تغيير طباع زوجها كل ما عليها هو الصبر والدعاء والعطاء دون حدود وستجد النتيجة يوما ما...ربي يفتح عليك

[akhismail]

كلما ارتفع الإنسان , تكاثفت حوله الغيوم والمحن

أنصحك بهذا الموضوع، إضغط على الكلمة.

كيف تكسبين زوجك ؟

[akhismail]

من العظماء من يشعر المرء بحضرته أنه صغير
ولكن العظيم بحق هو من يُشعر الجميع في حضرته بأنهم عظماء

[akhismail]

إنك تخطو نحو الشيخوخة يوماً مقابل كل دقيقة من الغضب

[طاعة زوجي ..]

السلام عليكم ورحمة الله وبركاته
وسعي خاطرك حنونة وديري في بالك أنو هاذي عقلية زوجك تفاهمي معاه بالعقلية وساعفيه مع الوقت راح يتبدل للأحسن. لكن الصبر ثم الصبر. ماتتوقعيش بكبسة زر راح يتغير
انا تقريبا كيفك. عرس بنت خالتي عرضوني ومارحتش وحاليا راهي نافسة تاني ومتاكدة مئة بالمئة بللي ما يخلينيش نروح. شحال من مرة رحت لدارنا نبكي. لكن مع الصبر والسياسة الحمد لله الآن أحسن. لبيت أهلي وليت نروح أكثر. أما الزيارات الأخرى نادرا. وتعودت اصلا ما يدوملي غير هو وأنا المتضررة الوحيدة اذا بكيت ودرت في قلبي. نمرض روحي في الباطل. وحاجة ماتتبدل بالبكا بالعكس ماتربحي والو من غير الهم والغم
شوفي انتي على داركم ألحي واقنعيه بكل الوسائل المهم بلا عياط ودواس وفي لحظات يكون فيها هادئ. ماشي هو مقلق وعيان وانتي تناقشيه اكيد هنا ماراح تستفادي والو. وأقاربك لخرين اذا رضى اللهم بارك واذا مارضاش طاعة زوجك أولى وادعيلو مع الوقت يتبدل

المهم أصبري وحبسي من البكا. صدقيني والله ماينفعك. راني نحكي عن تجربة
ربي يهنيك ويسرلك امورك يارب

[النجمة القطبية]

تصرفات زوجك والله اعلم تعكس اسباب نفسية او طريقة تفكير معينة وما عليك الا فهم نفسيته حتى تعرفي كيف تتعاملي معه
يعني رفض زوجك لزيارتك لاهلك وتصرفاته معك هو انعكاس لطريقة تفكير معينة وما عليك الا البحث للتوصل لفهم شخصية زوجك ومن ثم ايجاد مفتاح للتعامل معه
كمثال ممكن تكون الاسباب اما الحرص الزائد لدى الزوج يخاف يصرف بالعامية
او سوء في حسن التعامل من طرفك يعني بلهجتنا نكدتيه وكرهتيه دون ان تشعري
واحتمال اخر انه ليس اجتماعي ولا يحب الاختلاط وانتى تحمليه فوق طاقته
اول شئ توقفي عن البكاء والشكوى فلا تجدي نفعا فكلما بكيتي وشكيتي وزاد انفعالك بينتى له ضعفك من ناحية وشعر بعنادك ورفضك له وزاد عناده معك اكثر
ثانيا متقوليلوش نروح لمكانين في وقت واحد يعنى بنت خالتى مريضة وامى طاحت من الدروج حتى لو كانت تلك التزامات وواجبات عائلية لان هو يقراها بطريقته ويرى فيها مزيد من الضغوط اختارى مكان واحد كمثال زيارة والدتك وخلي الاخر لظروفه
ثالثا حاولي تفهمي سبب رفضه لزيارة اهلك فمثلا في حالة الزوج الحريص فهو يخشى الالتزامات المالية يعني في كل مرة تزوري فيها اهلك راح ينفق هو فيها مال وجهد وبالمقابل لا تقدمي له شئ بل احيانا تكون النتيجة عكسية تقدمي له شكوى ونكد
كان تعودي من بيت والدتك وتقولي زوج اختى اشترالها كدا وكدا
فلان اخد زوجته رحلة ووو
امي قالت كدا وكدا
يعني بدون شعور تنقلي له اخبار انتى من وجهة نظرك ايجابية وتحفيزية لتثيري فيه مزيد من الاهتمام لكن هو يشوفها بطريقته نكد ومزيد من المسؤوليات والالتزامات فيصبح تدريجيا بيت اهلك وكل بيت تروحيه من افراد اسرتك مصدر للمشاكل والالتزامات
امالا لما ترجعي من بيتكم احرصي على ان ترجعي متزينة وبشوشة وفرحانة وقولي له ان امك وكل افراد اسرتك يبلغوه السلام
وادا اديتي معاك حاجة اشكريه وبلغيه شكرهم ==لا يشكر الله من لا يشكر الناس ==
واقفلي فمك عن اي مشكلة او اي حدث في البيت ممكن ان يعكر مزاجه او مزاجك واكتفي بالقول انك فرحانة جدااا لان قضيتى يوم واطمئنيتى على اهلك والحمد لله
رابعا بالنسبة للزيارات حاولي قدر الامكان تدي معاك امور مصنوعة في بيتك كمثال حلويات او موالح حتى تتفادي تطلبي منه في كل مرة وروحي وانتى منشرحة النفس وبشوشة حتى وانتى صامتة كتقدير له مكالاه تشنفي حتى لو مشرالك والوا سهليها
خامسا لا تقدمي الكثير من التضحياتك حتى لا تطلبي المقابل يعنى مكالاه تبكي وتتغمي ادا دخلتلو شوكة لان لا فائدة من دلك فالشوكة ابدا لا تخرج بالبكاء قدمي المساعدة دون انتظار المقابل ودون مبالغة
ولا تبالغي في تقديم الحنانة لانو ممكن يقراها كنوع من انتظار المقابل المادي فلا تستغربي ولا تندهشي فالاشخاص الماديون يفكرون بهده الطريقة
واحتمال انه لا يحتاج لحنانتك المبالغة اصلا :d:d لانه يعرف انه سيدفع ثمنها من مشاعره وهو لا يملك مشاعر لان الزوج الحريص حريص في كل شئ حتى مشاعره وكيما قتلك لتحلي المشكلة قدمي له ما يحتاجه وليس ما تبحثين عنه انت
باختصار الدعم والتشجيع وعلميه المشاركة مع الصبر والمثابرة زتجنبي الغضب والعناد خط احمر
بدلي طريقة التعامل واحتسبي كل تعب لوجه الله
وربي يوفقك