اشقر و سمراء

[مشكلتي]

السلام عليكم ورحمة الله و بركاته


المشكلة حساسة جدا وهذا يدخل في الامور الشخصية جدا

المشكلة انه تقدم لخطبتي شاب احبني حبا شديدا رآني في الجامعة و منذ ذلك اليوم وهو يختبئ من ورائي و يتتبع اثري بدون ما يقول لي اي شيء ( يشوفني كيفاش ندخل من الدار و كيفاش نخرج و مع من اتكلم و مع من اقف ووو يراقبني دائما ) و عندما تأكد بأني انسانة متخلقة و محترمة و من الدراسة للبيت و مستورة بحجابي الشرعي و سأل عني في القسم وجاءه الخبر على اني انسانة ادرس جيدا ..وأول مرة تكلم معي و كانت اخر مرة ايضا قال لي : تدرسن سنة اولى ماستر؟ قلت له نعم . وفقط تلك اول مرة واخر مرة و اصبح يلمح لي من يومها على انه يود خطبتي ..المشكلة هي انه انسان اشقر و جميل و انا سمراء ( جميلة جمال السمراوات )..هذه هي المشكلة الوحيدة ...ايعقل اني اقبل ؟ ارشدوني

[pharma-93]

ايه ياختى انا مفهمتش وين راه المشكل نعرف شحال من واحد اشقر وتزوج سمرا مافهمتش علاه راكي تخممي بعقلية العنصريه وزيد احمدي ربي جاك واحد اشقر وجميل كيما قلتي مشي تتوسوسي وربي يوفقكم ويجمعكم في الحلال

[اﻻء الرحمن]

واين المشكل في هذا اهو عيب خلقي مثﻻ على كل حال صل صﻻة الاستخارة

[selin cobbra]

اختي هذي العقدة راك انت ديري فيها عادي وادا اشقر تزوج سمرة مافيها والو
ا

[محمد الخامس]

(المشكلة حساسة جدا وهذا يدخل في الامور الشخصية جدا )

=====================================
بما أنّها مشكلة شخصية جدّا لماذا طرحتها في المنتدى على عامة النّاس
المفروض تعرض على أقرب النّاس اليك
وشكرا

[amoros]

ما دخل اللون هنا ابنتي الزواج اكبر واعمق من ذلك

[jiji17]

والله ضحكتيني من قريت موضوعك وانا نضحك ركي نورمال أختي وركي في وقت الزواج هذي مشكل توقفي عندو
وكي تزوجي وتلقاي مشكل أكبر كفاه رايحة تحليه
كبري عقلك وروحي استخيري ربي وخليك من الزعاقة

[بنت لبحر]

صراحة سوالك غريب جدا وتخمامك اغرب

يعني هل هدا مشكل في انك متقبليش بيه

المهم صلي استخارة

[الواثقة بالله 23]

أختي خلينا من حكاية اشقر و سمراء ما عندها حتى معنى أصلا أغلب الناس تميل لعكسها يعني انا بيضاء يعجبني الأسمر من الناس أنا سمراء يعجبني الأبيض ....... . اذا كنت رح تقبلي بيه او بغيره لازم تكون عندك ثقة في جمالك و شكلك باه متتعبيش من بعد . المهم حوسي فيه على الأمور الأكثر أهمية و مش انت لي تجوسي أهلك بعد ما يتقدملك رسميا لأنك حسب ما قلت ملتزمة متعطيهوش فرصة لا يلمحلك و لا يقلك و لا تقوليلوا خليه يجي لداركم مباشرة

[nilly]

ههههه اغرب مشكلة في العالم واقيلا معندكمش واش تحكيو عادي جدا اختاه انا شقراء زوجي اسمر عادي وين راه المشكل

[knives66]

انا سمراء ( جميلة جمال السمراوات ) -_-

بالله عليكم بالله عليكم

يخي هدرة تهدروا فيها هو أسمر هو أسود انا ما نقبلش بوحد أشقر

تتمسخروا برجال أقبلي ولا خلي راجل يروح يشوف مرأة أخري

كي عاد موش عاجبك من أول خبريه وهنيه موش نهار عول يخطبك

تجبدي بيه بساط

على جال لون تاعو

وذكري ربي هو لي يمد ونحي

[ساجدة لرب العزة]

ياختي ما فهمتش واش حابة بالظبط المشكلة غير واضحة

[طالبة علم شرعي]

سلام عليكم
اختي ارى ان المشكل الحقيقي هو هل هذا الشاب ينوي فعلا خطبتك وهل تلميحه يدل على انه يود خطبتك ؟ هل اتى الى بيتك ام النظرات فقط جعلتك تستنتجين ؟
اذا كان فعلا كذلك واتى فلا ارى مشكل غير هذا
بما انك اثرت اعجابه فاكيد لا مشكل عنده بخصو ص لونك
والبياض بياض القلوب وليس الوجوه اختي
والجمال جمال الاخلاق
دعيك من هاته الافكار فلا فرق بين عباد الله الا بالاعمال والنيات تذكري هذا جيدا
ونصيحة اخرى ادا هدا الشاب بقي مدة طويلة وهو ينظر اليك فقط دون ان يقوم باي خطوة كطلبك من والديك فانسي امره واهتمي بدراسته ولا تضيعي وقتك بالتفكير فيه

بالتوفيق
سلام

[عبد الله 22]

إذا كنت تري النقص فيك فلا تتزوجه فاكيد سيعني من عقدة النقص لديك التي لا معنى لها وإذا كنت تري أن النقص فيه فتركه لمن لا ترى هذا في كل الاحوال هي وساوس لا معنى لها

[نسيم ابن الجزائر]

فهمت من كلامك أنك فتاة ملتزمة بالدين لكن سؤالك العنصري يتناقض مع ذلك
قالَ رسولُ اللهِ "صـلى اللهُ عليهِ و سلـم " : ( لا فرق بين عربي و لا أعجمي و لا أبيض ولا أسود إلا بالتقوى )