امي و تصرفاتها

[مشكلتي]

السلام عليكم و رحمة الله و بركاته
ما لقيتش لمن نحكي قلبي معمر نتمنى تقراو موضوعي و تفهموني و الاهم تقولولي كيفاش نتصرف
مشكلتي ماما و خالتي او بالاحرى ماما برك لان خالتي هي الاخرى ضحية ،، ماما يا جماعة مسيطرة كليييااااا على عقل و تصرفات اختها درك نقلكم كيفاش !! الساعة عندي 10:30 صباحا و استيقظت حوالي 09:30 في هذا الساعة من الزمن امي اتصلت بخالتي على الاقل على الاقل 5 مرات
داخلة في ادق تفاصيل حياتها ،، تصوروا مرة في رمضان ( و علابالي درك تحيرو ) دخلت للغرفة نلقاها تقلها : امضغي مليح مليح ، و مبعد ابلعي ، ايه امضغي ، و اشربي الماء مليح ،، كولي هك و هك و مبعد هك و هك رااااسي حبس ما تحملتش سنيتها حتى كملت قتلها ياااو بزاف واش راكي ديري مع المخلوقة قاتلي اي تعاني من سوء الهضم قتلها لاه هي bébé ؟؟
درك تتساءلوا تقولو شحال في عمرها هادي خالتها ،، الفرق في السن بيناتهم سنة و 5 اشهر لاكون دقيقة و لكن الفرق في العقلية كبيرو كبير جدا
خالتي هذه غير متزوجة رغم انها قاربت الـ 40 سنة اما امي فتزوجت صغيرة و انا ابنتها الكبرى ( 21 سنة ) احتاجها كثيرا لكني لا اجدها معي :'( يريد احدهم خطبتي و هو انسااااان قمة في التدين و الاخلاق و حسن المعاملة ذنبه الوحيد انف فقير و لا يزال يدرس .. امي ترفض مناقشتي في هذا الموضوع حاكمة غير كلمة ( مازلتي مازلتي حتى نتهنى على خالتك ) ... اردت منها مفاتحة ابي بالامر تشوف رايو مبدئيا رفضت قاتلي دبري راسك احكي معاه انتي لاكان حابة :/
هداك النهار اتصل بي و ارادت امه ان تتحدث مع امي علما اني لا اخبره شيء عن ماما ،، فقط ارادات ان تتكلم معها فوجئت برفضها القاطع و اضطريت نكذب نقولو ماكانهاش ،، في نفس اليوم رحنا لدار جدي ( دار خالتي ) حنا قاعدين و كالعادة امي تنصح و تنصح و تنصح صونا بورتابل خالتي و قاتلها هذا واحد يحكي معايا ،، قاتلها ماما قولي لامو تعيطلي و الا هاتي نحكي معاه ،، جات تحكي معاه كوبا عليهااااا تعيط تعيط ما يهزش و يكوبي ( باين واش حاب هذا ) و اللي قابل يعمل كلش باش ترضى و يجي يخطبني تتهرب منو
ابنة عمتي تخطبت و و الله تشوفوها كيفاش معاها خطوة ب خطوة غير انا تقول عندها مشكل معايا ،، اصلا طفولتي كاملة جازت و انا حاطة بلي مانيش بينتها كانت تحكي مع بنت عمي و كي نحكي انا ما تعيرنيش الانتباه حتى كونت عندي عقدة انو " كلامي تافه " لكن الحمد لله الان في الجامعة و حتى في حياتي اليومية كل الناس تحبني و هذا من انعم الله علي ماعدا اغلى انسان و هي أمي
لا اعرف ماذا افعل معها و لا كيف اقنعها بان خالتي تملك حياة خاصة بها فهي تعيش مع جدي و جدتي حياة طبيعية كبقية الخلق ، كيف اقنعها اني و خالتي مختلفتان كما هو الحال مع جميع البشر فما البسه ليس بالضرورة ما ينبغي ان تلبسه خالتي و العكس صحيح
الآن تخطط لبناء منزلقريب من بيت جدي و انا لا ارغب في ذلك ،، انا هكذا و لست مرتاحة صدقوني مادابيا نشوف 2 خاوة قراب لبعضاهم بصح امي باااااااااالغت ،، شركة جيزي رابحة غير منها و الفيكس وخدة اكبر و اكبر
نروحو لمكان لاااااازم تجي معانا و يا ربت جات هنا مرحبا بيها ،، كي نكونو قاعدين و تهدر كلمة تخرجلها عينيها تولي خالتي تبان مرتبكة قدام الناس .. تصوروا معايا نجي رايحة لدار جدي نلبس robe تع خرجة و خيمار يطلع معاها عااادي كيما مالفة تقولي وعلاه هذا روحي بقندورة الدار برك وليت نحس بلي دير فيها بالعاني مرضتني و الله
كي نقلها ماما احكي معايا اني ما عنديش مع من نحكي و نفرغ واش في قلبي تقولي هيه وش حابة ؟ هاداك نهار قتلها راو حاب يجي يخطبني ماهوش راضي يحكي معايا هك !!! قاتلي مش درك قتلها العام الجاي كي يكمل قرايتو ؟؟؟ وش قاتي و الله ما نزيد عليها ؟ قاتلي ؟ مسكينة خالتك اقل منها ب 18 سنة و تتخطبي قبلها ؟؟؟ هنا فعلا كانت صدمة بالنسبة ليا و النقطة التي افاضت الكاس كيما يقولو قتلها وش يهمني فيها راكي راح تخليني نكرها دخلتيها فوق اللازم لحياتنا تعطيلها على الاقل 15 مرة في النهار مين نحوس عليك نلقاك تحكي معااااها و ما نهدرش بصح هاكا لا زعفت مني و ما ولاتش تحب تحكي معي
يا ناس خالتي لي يجيها يكون ناوي للحلال تقولو نتعرفو تقعد مدة مبعد لالا ابيض بزاف - لالا قصير بزاف - لالا عينيه ما عجبونيش ااااااوووو !!! نقعد نسنى انا حتان يجي مهند لخالتي باش نخلي لوخر يجي و ماما تكون راضية و الله حتى مهند و ما يعجبهاش تقلك ابيض بزاف

حابة نكمل نفرغ قلبي بصح علابالي طولت عليكم سامحوني راني كاش نهار نطيح سقطة قلبية من واش راه يصير فيا

[The Architect]

أختي السلام عليكم
ان شاء الله تتقبلي مروري المهم هنا ماماك تحب خالتك بزاف او خليني نقولك متعصبة ليها بزاااااف و لو على حساب ابنتها .
المهم مادام الشاب ناوي الحلال و حاب يجي يخطبك و هذا امر مهم جدا جدا جدا كون ان الزواج نصف الدين خاصة اننا في زمن الفتن فهذه فرصة لا تعوض لذا لا تجعلي خطيبك يمل من القصص اللي راكي تحكيهم لازم يكون عندك القوة و الشجاعة باش توقفي امام ماماك مي بلا ما تعصيها حتى ماماك تفهم بلي انت لازم تكوني المستقبل تاعك و انت منفصلة على خالتك كل واحد واش كتبلو ربي و هاذي خالتك اللي تستني في مهند كيما قلتي راهي في 38 سنة يلا ماراهيش جايبة الخبر المهم سيي تقولي للشاب هذاك يحكي مع باباك في الشارع و اذا وافق ابوك حينها امك لن تستطيع شيئا . صدقيني الوقت اللي رانا فيه 16 سنة غير خلي البنت تتزوج الفتنة راهي كبيرة و الحل دائما و ابدا هو الدين و الحلال . ربي يوفقك ان شاء الله

[القمارية]

اوووووووووووووووووو اختي مقواااك عملي على ربي معندي منقلك

[مملكة الأحزان]

سلام عليكم
أنا نشوف من وش كتبتي بلي ماماك تحب بزااااااااااااااااااااف خالتك وهذا أمر عادي جدا وانتي ماتحبيش أختك وما تخافيش عليها؟؟
بصح نظن بلي راها مزودتها شوية سايريها يا أختي وحاولي تحشيلها و ساعفيها قد ماتقدري وهذا الشخص اللي حاب يخطبك واذا كنتي مقتنعة بيه قوليلو يجي لباباك وحطوها قدام الامر الواقع أكيد باباك راه يجي يشاورك في ذاك الوقت قوليلو بلي راكي موافقة وينتهي المشكل .. بصح ننصحك أختي لوجه الله أمك تهلاي فيها راها قيمتها كبيرة بزاف وعندك لا تعصيها لأي سبب من الاسباب ,, ربي يصلح بيناتكم ويجمع بينك وبينو في الحلال ويسهلك ياااااااااااااااااارب

[nacer74]

المشاركة الأصلية كتبت بواسطة مملكة الأحزان

سلام عليكم
أنا نشوف من وش كتبتي بلي ماماك تحب بزااااااااااااااااااااف خالتك وهذا أمر عادي جدا وانتي ماتحبيش أختك وما تخافيش عليها؟؟
بصح نظن بلي راها مزودتها شوية سايريها يا أختي وحاولي تحشيلها و ساعفيها قد ماتقدري وهذا الشخص اللي حاب يخطبك واذا كنتي مقتنعة بيه قوليلو يجي لباباك وحطوها قدام الامر الواقع أكيد باباك راه يجي يشاورك في ذاك الوقت قوليلو بلي راكي موافقة وينتهي المشكل .. بصح ننصحك أختي لوجه الله أمك تهلاي فيها راها قيمتها كبيرة بزاف وعندك لا تعصيها لأي سبب من الاسباب ,, ربي يصلح بيناتكم ويجمع بينك وبينو في الحلال ويسهلك ياااااااااااااااااارب

ربى يكون معاك والاخت هاذى نصحاتك نصيحة هايلة الوالدين سايريهم وما تخليهمش يدعو عليك تحايلى فى تصرفاتك معاهم وما تخليش ماماك تزعف عليك حتى وتكون ظالمة راكى تضرى روحك كى تصافحيها ربى معاك ويهنيك ويوفقك ويعطيك واش تتمناى

[oumhana]

السلام عليكم ورحمة الله وبركاته
أختي يماك راهي مقرعتها ولازم تتوقف على هذا التصرفات مع خالتك خاطر لو كان غدوه خالتك تتزوج من السبعيام العريس راح يحرملها يماك هذي باينه .المهم أنتي احكي معها بلطف و يذا محبتش تسمع احكي مع باباك و كوني صريحة معاه ويذا حشمتي خلي السيد يهدر معاه برا .نا نفضل تهدري انت مع باباك قبل و ربي يفرج عليك وعلى كل مهموم آمين

[الجميلة انا]

انتي متقدريش تعاندي يماك اذا راكي تقراي كملي قرايتك الساعة و من بعد كلش بالاصول ولي امر الشاب يهدر مع بوك

يماك راهي خايفة عليك تقول راكي صغيرة و متعرفيش مصلحتك و هاد حقها و واجبها

[رثاآء]

شر البلية ما يضحك
عزيزتي دعيني أسألك سؤال واحد ما هو وضع أبيك من كل هذا؟ ماهو رأيه ،ألم يلاحظ إهتمام زوجته الزائد عن حده لأختها على حساب ابنتها فلذة كبدها؟
راها زودتها بزاف لكن
الأم تبقى أما ولاتحاولي المشاحنة معها ولا حتى قول كلمة " أف "
بالنسبة للخاطب تكلمي مع والدك فلا حياء في ما يرضي الله
أم قولي لهذا الشاب أن يتكلم مع والدك فيبقى الأمر بين الرجال وهكذا لن يكون لوالدتك سلطة على زواجك على ماأعتقد
موفقة عزيزتي
أكثري من الدعاء والإستغفار
وبالنسبة لخالتك انصحيها لوجه الله .... الشي اللي راها تدير فيه حرررررااااام ولازم الوالدة تاعك ما تتعجبش إذا لم ترى أختها متزوجة برجل يليق بها المفروض أن تنصحها وتنهيها عن فعل ما حرمه الله عز وجل
لا حول ولا قوة إلا بالله
السلام عليكم

[{زهراء}]

اختي الكريمة اذا انت متأكدة من اخلاق الشاب وتشوفي بلي يناسبك قوليلوا يبعث باباه او خالوا او عموا ويتفاهموا مع الاب تاعك
واللي فيه الخير ربي يقدموا

[ailemak]

ya hanouna, ham ydahek w ham ybeki,
3ajbetni roh te3ek welah , dkhalti fi galbi
bref, mamak chwiya fedhet machi ga3 haka, w yla mabghatch khaltek tetzawej daber rasha w nti 3lech m3atlinek
w gouli lelmakhlou9 yroh yahder m3a bebek, w lghalba lekbira yla mamak kelmetha hiya li tfout hahahaha, rahet 3lik
nchallah rabbi ysahelhalek hanounti , w ed3i rabbi bezaaaaaaaaf w staghafri, w wa3d menni ghadi ned3ilek nchallah
rabbi yhanik w yzawej khaltek bientot nchallah w haka tertehi

choufi taw9i3 te3 l okht ZAHRAINO

[cranknet]

ربي يفرح عليكم.

[رندة نهاد]

ان شاء الله ياااااااااااااااربي يجي عرييييييس لخالتك ضرك ضرك في هذي الدقيقة وتتهنننننننناي يااااااااااارب ما لقيت ما نقول اكثر

[*نسرين]

ربي يكون معاك

[خالد عنابي]

امك انسانة متسلطة ومسيطرة بطبعها ولا اعرف السبب في ذلك واكيد لكل شيئ اسباب ولكن ماذا عن الوالد تاعك ؟ ما جبتيش سيرة الوالد تاعك تماما في الموضوع فهمينا اين هو ام تراه خاضع لها ؟

[ALGDZ]

انا نضن الوقت شوي مبكر عن الخطبة بالرغم الشاب لم يكمل دراسته بعد و هل سيتلقى عمل حينها لتسديد حاجيات و المسؤليات و هذا واجب بطبيعة الحال و انا نظرت في هذه الحالة في مكان ابوكِ اما عن امك و خالتك فهذا الشيء طبيعي تصرى لجميع الناس او اقل او اكثر هذه النساء ولا تلومينها فهي الحاكمة الثانية بعد ابوك وكلهم يحبون مصلحتك بلا منازع هذا الشيء واجب اذن الامور واضحة وزبدة موضوعنا هي لا تعجلي في اتخاذ قرارتك الملحة وهذا حسب ما ذكرتيه يا الاخت عن الشاب الذي ينوي بخطبتك و نتمنى ان يجمع الله بينكما بالخير و المقبلين عن ذلك و للجميع و وانا شخصيا ما زلت و بارك الله فيكم جميعا