ضع بصماك في رمضان

ريم الفلى · 2013-07-10, 11:54

البسملة1
صباح الخير حبيباتي واش راكم في اول ايام الشهر الفضيل ربي يقدرنا جميعا باش نصموه كيما يحب ربي

بما انني خدامة ومنخرجش حتى لل4.30 منوصلش للدار بكري

وكي نوصل نكون ميتة بالعيا

منقدرش ندخل للكوزينة

لكن هدا شهر رمضان وين تلقى اجتماع الاسرة كامل في الكوزينة وكل وحدة من البنات تقول بابا شوف انا درت هادي ولخر وانا اللي درت هادي
والسي بابا غير يقول صحيتو صحيتو ههههه

وانا؟؟؟؟؟؟؟؟؟؟؟؟؟؟؟؟؟؟؟؟؟؟
ميقوليش
ملا شمرت على ذرعيا وقررت باش نشارك يا لوكان في الحلوى من اجل السهرة وهكذا رايحة تكون سوربيريز ههههههههه

مربعات المكسرات بالخبز اليابس
هذه الوصفة تشبه قلب اللوز وتجي هايلة في سهراتنا الرمضانية
المقادير مع طريقة التحضير في نفس الوقت:
3 حبات بيض نفقسهم وندربهم مليح بالفوي او الخلاط اليدوي نزيدلهم كاس سكر كرستاليزي (عادي) وندربهم مليح نزيدلهم كاس زيت وندربهم مليح ونزيدلهم 2 مغارف كبار ككاو (غربليهم قبل ما تزيديهم) ونحركهم مليح
الان يخلاص دور الفوي ويجي دور الملعقة الخشبية
نزيدو للخليط السابق كاس من اي مكسرات موجودة بالبيت انا خلطت لوز وكوكاو محمصين ومرحيين خشان ونزيدو باطا صغيرة كاكابيشو (حسب الرغبة تقدري متزيديش) ونخلطوهم جيدا ثم نزيدولهم 4 كيسان خبز يابس مرحي ومحمص
ومغرفة كبيرة فاني تاع الميزان وباكي خميرة كيميائية ونعجنوهم جيدا
ملاحظات:
1- الكاس المستعمل هو نفسه لجميع المقادير
2- الخليط يكون يابس مش جاري
بعدها نغلفو قالب الفرن العادي بورق الزبدة ونفرشو بيدينا العجينة في القالب ونحاولو نوزعوها في كامل القالب ونضغطو عليها مليييييييييييح والى الفرن المسخن مسبقا من تحت باش تطلع ثم لما نشوفوها طلعت في الفرن نشعلولها من فوق ومن تحت
راهي متديش وقت بزاف لما تبداي تشمي رائحتها الطيبة وتشوفي بللي طابت شقي الفرن وطفي عليها وخليها بداخل الفرن حتى تبرد تماما.
هاهي لما جبدها من الفرن

اعتذر على الصور كنا في الليل وهي كلش كحل في كحل متبانش ملييييييح

وهادي اقرب:

في هداك الوقت نحضو شاربات خفيفة لسقي البسبوسة متكونة من 4 كيسان ماء وكاس نصف سكر وعود قرفة تعطيلنا بنة رمضان وعصير شوية قارص ونخليها على نار تطيب مليح لما تبرد البسبوسة جيدا نسقيها بالشاربات السااااااااااااخنة جدا ونغلفها بالفيلم اليمونتاغ ونخلها في مكان معين ترتاح وتتشرب كل الشاربات في غرضها انا خليتها نصف ساعة بالاك او اكثر:

من بعد نذوبو الشوكولا انا استعملت شوكولا العملاق ذوبتها في بان ماغي مع شويا زيت يمدلنا لمعان للشكولا وشويا حليب ونفرغها فوق المسكوتة ونرشها باللوز ايفيلي وهاهي جاهزة:

وهادي:

وللتعذيييييييييييب مع الواحد صايم:

من بعد خليها حتى تجمد طبقة الشكولا وقطعيها مربعات انا حبيتها كبيرة كيما قلب اللوز دارتلي 24 مربع:

واش رايكم:

ملاحضة تقدري تزيدي ماء زهر في الشاربات او نقطة منو في الشوكولا يجيييي

وهادي عند الهجوم:

ملاحظة الحلوى هادي راهي تتفتت شوية على هاديك للي قلتلكم في اللول كيما قلب اللوز لذا من الاحسن ترفديها بحاجة مسطحة انا هادا واش لقيت قدامي هههههه

وفي الاخير نقولكم راهي

ملا جربوها ورجعولي الجواب

كيما شفتو انا منتقلش ما والو محطيتهاش مان با في طبسييييي
وهادي هدية مني لكل حبيباتي اللي شجعوني وردو وقيمو مواضيعي

صح فطوركم
وصح سحوركم يا خفاشات المنتدى
هههههههه

ريم الفلى · 2013-07-10, 12:04

واش معجبكمش موضوعوعي؟؟؟؟؟؟؟؟؟؟؟؟؟؟؟؟؟؟؟؟؟

الصور مبنتش مليح لكن الطبق مليح والكتبة هادي كامل مع الواحد صااااااايم تستاهل التقييم لالا
؟؟؟؟؟؟؟؟؟؟؟؟؟؟؟؟؟

منزعفش عليكم خاطر رانا في رمضان بصح كون متردوش منزيد نحط والو
وناكل كلش وحدي