صلاة الاستخارة

[مشكلتي]

و الله حبيت نطرح مشكلتي هنا نظرا لاهتمام الاعضاء الكرماء بمشاكل بعضهم البعض و اللي نشكرهم على هدا
المهم انا عندي ثلاث سنوات و انا مع واحد لعب دور كبير في حياتي المهم راهو يحسن في روحو باه يتقدملي رسمي . المشكل انه تقدم لخطبتي شخص عرفته معرفة سطحية لا تفوق شهرين انا ما كلمتش الاول عن الامر قلت نقول لالة لهدا اللي جاني بلا ما يسمع هو.
و قعدت انا في حيرة على خاطر صراو حوايج بزااف نصحوني بصلاة الاستخارة صليتها على هاد الخاطب على خاطر قالولي لوكان مكتبلك تديه ربي راح يسهلك و تفرا بينك وبين هدا اللي راني معاه المهم
نهضت الصباح ماعلاباليش كيفاش حاسة روحي ريحت بزااف كي صليتها و لكن المشكل واش معنى هاد الراحة و في قولكم نزيد نصليها بصح علمن على هاداك ولا على الاخر المهم راني حايرة واش ندير حبيتكم تنصحوني و ماتقولوليش اقبلي بهداك الخاطب على اساس انو الاخر ماجاش خطبك على خاطر هاد العبد انسان صادق لابعد حدود و لوكان يسمع رايح يهبل المهم انا قلت الحل تاعي هو صلاة الاستخارة. وزيدو قولولي نتوما واش رايكم في الحكاية كاملة .وربي يجازيكم الف خير

[houda_jijel]

السلام عليكم اختي صلاة الاستخارة تصليها و تتوكلي على ربي في الامر تاعك و لكان راهو خير لك راح يوفقك فيك و لكان لا راح يبعدك
و انتي هذا اللي كنتي معاه صارحيه احسن قوليلو على الاقل يجي يطلبك من اهلك باه تطمني و متخبيش عليه مالقري نضن بلي راح يزعف .هكا تعرفي لكان راهو جدي و لكان تردد اقبلي بالتاني و متخليش روحك تتعلقي باوهام .
هذا رايي

[samar89]

ياختي كيفاش راكي مع واحد من 3 سنين وتحبيه زعمة....وتزيدي تهدري مع اخر شهرييين.........(والله عجب)...مافهمت والوووووو...
اختي تعيشي ممكن تقوليلنا السبب اللي خلاك تزيدي تتعرفي على شخص اخر...وانت واعدة الشخص الاول وراكي تقولي بلي ناس ملاح وزعمة جايي يخطبك.....ممكن تجاوبي

[اسعى لرضى الله]

اختي متتمسخريش بولاد الناس

[مريم الصابرة]

السلام عليكم اختي
انا ما نقولكش غلطت لانو خدعتي وخنت اللي راكي معاه 3 سنوات يعني حاجة كبيرة لكن خليني نقولك
من المفروض صارحيه قوليلو شخص تقدملي واش رايك ؟ وما تقوليلوش نعرفو لانو اكيد راح يخليك والثقة راحت نهائيا من الاحسن قوليلو وهو يعرف كيفاه يتصرف وما نقولكش أقبلي بالآخر فقط إنت إختاري منهما اللي حابة تعيشي معاه
بالنسبة للإستخارة يا اختي عاودي إستخيري على اللي تعرفيه وشوفي وإنت تعرفي موفقة

[sali-sali]

انت اصلا راكي غالطة ،وتاني مراكيش عارفة توزني الامور ممكن تحبي هداك الشخص و تاني ممكن راكي تخمي انك تتزوجي من تقدم لك
اول حاجة فهمي روحك مليح

ولي فيها الخير ربي يجيبها

[sabounimanal0]

ياااااااااا اعضاء الطفلة راهي بايتة بلي عرفتو قبل هدا تاع 3 سنين بصح معرفة سطحية فقط و شبيكم زدتو طيحتولها المورال انا نقولك اختي صلي صلاة الاستخارة و عاوديها لكان ما خرجلك والو على خاطر ربي عمرو ما يضيع عبدو

[ranou gigi]

اختي العزيزة لا يوجد حب قبل الزواج الحب يأتي بعد الزواج فقط
اذا كنت تري ان الشخص الذي تقدم لخطبتك قادر على تحمل المسؤولية و ذات خلق و دين فأقبلي به لان السترة و الحلال هما الشيئان الي راح ادومولك
و انت ادرى بمصلحتك و لا تنسي صلاة الاستخارة

[حلة ملاك الجنة]

يا اخت كلشي بيد ربي وصلاة الاستخارة هي الحل الوحيد اللي يفكك من هدي المشكلة
و الســـــــــــــــــــــــــــــــــــــــــــــــ ـــــــلام عليـــــــــــــــــــــــكم

[loulou02]

شوفي أختي إذا هذا الشخص لي تقدملك ولد فاميلية و خدام علاه ترفضيه ؟ أقبلي بيه ، هذا على الأقل بانت نيته إتجاهك و جاكم للدار ، ماشي كيما صديقك لي راكي معاه في ثلاث سنين و مدارش خطوة رسمية ، قاعد يجيب في الوقت ، حتى تلقي روحك كبرتي و فرص الزواج تقل ، خمي بعقلك .

[imiouss]

السلام عليكم
اختي درك راكي مخطوبة لواحد وادا خممتي في غيرو خنتيه
و راكي مع واحد 3 سنين وتخطبتي لغيرو من دون علمه سما راكي خنتيه
راكي ندبتي للدنيا ازربي شوفي لي ليستاهل وكملي معاه وصلي على جالو صلاة الاستخارة

[جميلة جميلة تبسة]

السلام عليكم.
اختي انا نقلك الحقيقة اللي ممكن ما تعجبكش ....انتي راكي تقولي عرفت واحد منذ 3سنوات يعني تعرفيه وتحكي معاه وتختلي بيه وبيك وصاحبكم الثالث (العياذ بالله منو) راهو يزينلكم في هاذ العلاقة .
اختي الابتلاء اللي عملهولك ربي انو خيرك بين انكي تختاري الحلال او تفضلي الحرام ومع الاسف انتي ما زلتي مصممة على الخطا اللي مشيتي فيه 3سنوات .....يا اختي حابة نعرف حاجة برك من وين تجيبو في هاذ الافكار تاع المعيشة في الحرام وبعدها الزواج واي عرف او مبدا ؟؟؟؟وهل يوجد شيء من هذا القبيل في قانون الحياة ومن اين تستمدون هذه القناعات ؟؟؟ انتي تبحثين عن الزواج وهو شرع الله والله لم يوجهنا في كتابه العزيز ولا حتى السنة النبوية لهذا النهج الذي اصبح لازم في حياة الشباب ...والغريب من جعله لازم ؟؟؟؟؟؟؟؟ الغرب ؟؟؟؟؟ العرب غير المسلمين؟؟؟؟؟ اجيبي وستعرفي انكي تقفين امام الله وتتحدي ما حلله بالحرام وبالمقابل تبحثين عن الراحة والسعادة احب ان اقول لكي انكي تستخيرين الله في امر بامكانكي ان تعرفيه دون استخارة وهو ان تختاري الحلال والحلال هو ما اكرمكي به الله وبعثه لكي طارقا بابكي ........علاه كي يكرمكم ربي ويراف بيكم ويبعثلكم الحلال؟؟؟؟؟؟؟؟؟؟؟؟؟؟؟؟ اختي اسمحيلي اذا ما عجبتكش مداخلتي لكن تاكدي انها حقيقة واكيد راهي مرة عليك بصح في الاصل حلوة اذا رجعتي للدين تاعنا راهو نعمة واللي راكي فيه راهو نقمة

[منهاج]

السلام العليكم

الله يجيب الخير والله يدوم العقل والدين


ختي خليتي لي راه جا للدار ومازلتي تحوسي على لي راه عادا يخمم تزوجي وانستري

[anfal hannah]

شوفي يا الاخت انت غلطتي كي دخلتي واحد في النص يعني انت واحد وعدك و راكي تقولي اخلاق يعني كنت قادرة تصبريه مفهمتش علاش تعرفتي على الثاني اصلا
الخطا الثاني خبيتي على لي وعدك
مام كون تقبلي بالخاطب يعني رايحة تنساي الاول بشكل عادي كانك لم تعرفيه و كيفاش تواجهيه راكي تقولي كون يسمع يدير حالة ما ادراك تخليه و تتزوجي و هذا الخاطب علابالو في حكاية 3 سنين ؟؟
متظلميش الناس و روحك
هي من رايي صلي الاستخارة على الاول ماش الثاني و زيدي صارحيه علو حساب هدرتك راهو يدير مستحيل و يوجد في روحو باش يجي للدار يعني بالاك صغير و قدك عليها و الثاني باين يكون لحق و وجد و انت ممكن عندك رغبة في الاستقرار
المهم انت لازمك قبل تفرزي روحك و كيما يقولو امراة راجل ما يديها راجل و الدنيا مكاتيب

[كريم عربي]

الأخت الفاضلة صاحبة الموضوع

أسمحيلي، مي راني نشوف في بعض البنات يهدرو برك بدون منطق، وكل وحدة تهدرلك على هواها، وراكي تعرفي راي البنات.

أسمعيلي مليح أختي الفاضلة.

صلاة الإستخارة ممكن تجيك النتيجة في ليلة ممكن في أسبوع ممكن شهر كل واحد كيفاه حسب الظروف.

لكن شروطها تاني لازمك تكوني تصلي، ماكش توصليها لصلاة الإستخارة وتصليها ومبعدا تحبسي صلاة.

ثانيا: للبنات برك الي راهم يحكيو على الشاب لي عندك علاقة بيه، الأخت يا جماعة ماقالتش أنها على علاقة غير شرعية بيه، ممكن علاقتها بيه نظيفة وفي حدود الأدب والإحترام، علاه يعني كل وحدة تغني على هواها ؟؟ الاخت أدرى بعلاقتها منكن !!

والأخت ماقالتش بلي تحبو إطلاقا، قالت بلي الأخ هذا حاطها في بالها ويدير في مجهودو باه يكون نفسه مليح ويجي يخطبها وهي أدرى بيه.

والأخ الخاطب تاني ربي يبارك فيه كي جا دار خطوة شرعية.


لكن أختي ربي سبحانه برك هو لي يقدر يحددلك شكون تختاري، لا أنا لا غيري، الناس راهي داخلة لموضوعك تعفس وترفس، كل وحدة تحكيلك حسب عقليتها هي، يعني كل وحدة تحط نفسها مكانك وتبدا تحكيلك، وهم ماهمش فاهمينك أصلا.


شوفي أختي، تقربي لله عز وجل، واعتزلي شوية الأيام هادو وحاولي يكون كل وقتك للعبادة، والتقرب من الله، وابقاي ترقبي في النتيجة بإذن الله يكون فيها خير، رح تجيك بحول الله، صدقيني نعرف أخت دارت استخارة في نفس الموضوع وجاتها نتيجة إيجابية جدا في المنام، ومانقدرش نحكيها حفاظا على خصوصية الأخت.


وان شاء الله فيها خير أختي، وإذا عجبك ردي أعطيني دعوة تع خير برك وقولي ربي يفرج أمرك وييسر أمورك، وإذا ماعجبكش الرد ادعيلي بالهداية وربي يوفقك في مسعاك.