ممكن طرييقة لحفظ الفلفل الحلو الطرشي

nari21 · 2012-04-06, 16:03

عندي كمية كبيرة وخفت تخسر مشكورون

majda archi · 2012-04-06, 16:18

اشويه ونقيه وحطيه فاكياس الحفظ او علب وضعيه فالمجمد.راح تستحقيه كي يجيك ضيف على غفلا تزكي بيه مائدتك ولا في رمضان تلقايه قاضي حاجة باه تحضري سلاطة مشوية .

goumar · 2012-04-06, 17:17

اشويه شي خفيف قيس ما يتنحى الغشاء الفوقاني من بعد نقيه و حطيه في بلاره زجاج مغسوله مليح مليح ومعه حبات ثوم و عوميه بزيت المايده واغلقي البلاره باحكام شديد وحطيه في الثلاجه اجبدي مين تحتاجي وتم تم رجعيه للثلاجه هذه الطريقه تحكملك شهرين اما لمده اكثر لازم المجمد

geroise · 2012-04-06, 18:02

انا نعمل مثل ماجدة تتاجيه خاصة ادا عمليتى بيه شكشوكة وتحطيها فى الفريزر ونهار تحتاجى تجبدى

wafa.wafa · 2012-04-07, 18:22

أنا أيضا نشويه قليلا ونحطو في كيس بلاستيكي باه يتقشر بسهوله ثم نقيه من القشور والزريعة وأنصحك تحطي في الفريزر ورق بلاستيك وستفي الفلفل الطرشي فوقه واحدة واحدة باش ما يتلاسقوش بعد يوم نحيهم وحطي مجموعة أخرى ولما تكملي حطيهم في علب أو أكياس وكل ما احتاجتي نحي بالوحدة موفقة

nouna-12 · 2012-04-07, 18:45

انا ثاني نشوية و نحي القشرة و نمرسه بكاس نتاع حديد يلا عندك احسن من تقطعييه بالسكين يدي الوقت
و نديروه في اكياس بلاستيكية غير كمية قيس ما تحبي ما تكثريش فيها بزااف
و ديريه في المجمد كي تحبي تستعمليه مرري الساشي في الماء تتنحي و طيبيه عادي
هاد الطريقة تشدلك اكثر من عام بلا ما تفسد

ادرارية · 2012-04-09, 12:57

من الاحسن ان تشويه غير شوية وتنقيه لانو في المجمد يزيد يطرى ونهار تخرجيه من المجمد خليه حتى يدوب وحدوا وتكوني موجدة لاصوص طوماط تحطيه فيها وتخلطي غير شوية فوق النار لانو ادا طاب بزاف يطلق المرورة

ام محمد ميدو · 2012-04-12, 10:44

كاينة طريقة انا مجربتها نقيه كانك رايحة تحشيه دولمة ودخلي حبة في حبة باش يشد لافورم اي الشكل نتاعو اذا كان كبير واذا كان عندك اصاشي نتاع الجلبانة الكونجيلي ستفي فيها الفلفل ودسيه في الكونجيلاتور وكي تسحقي دولمة اجبدي الحبات لي تحتاجي واحشيهم وهوما مجمدين واقليهم ونحي القشرة وطيبيه في لاصوص نتاعك ان شاء الله نكون افدتك

nari21 · 2012-04-12, 14:13

اقتباس:

المشاركة الأصلية كتبت بواسطة ام محمد ميدو

كاينة طريقة انا مجربتها نقيه كانك رايحة تحشيه دولمة ودخلي حبة في حبة باش يشد لافورم اي الشكل نتاعو اذا كان كبير واذا كان عندك اصاشي نتاع الجلبانة الكونجيلي ستفي فيها الفلفل ودسيه في الكونجيلاتور وكي تسحقي دولمة اجبدي الحبات لي تحتاجي واحشيهم وهوما مجمدين واقليهم ونحي القشرة وطيبيه في لاصوص نتاعك ان شاء الله نكون افدتك

الف شكر افدتيني بزاف

نيفرتيتي. · 2012-04-15, 13:36

يعطيكم الصحة افدتم الجميع