كل شدة لزوال

[فتاة الورود]

كل شدّة لزْوال وتعقبها رحمه
والشدّة في ذاتها عْطية ونْوال
يا نفسي وعلاش تعيشي في ظلمه ؟؟
أستحيي من خالقك غيرُه محال !!!


***


أشحال لو تقّدري ، تحصي نعمه
وانعام الخالق ما يحصيها بال
تنساي الأنوار وتمشي في العتمه
من هاذاك الجهل ضياق عليك الحال


***


يا نفسي بركاي من هاذ الخدمه
تشكي من لهموم لغيرُه ، للأمثال
تجّهري بشْكاتك عند مْلـــمــــــّــه
وتغرقي في بحر تضخيم وتهوال


***


تنساي التسليم تبادري بخصومه
وفي عوض الرضا تجري للشقلال
" علاش انا بالذات من دون الأمة
ديما همي حاضر وكْسيف البال "


***


يا ويحك يا نفس واش هاذ الهمّه
واش هذا الجُحود ، عليك الأمد طال
يا دراه الايمان صحيح يسكن الحْمى
والا غير قشور تنطق بيه اقـــــــوال ؟؟


***


وين هو اصطبار عند اول صدمه
ورجوعك لله في ضعف وتدلال
ونار الابتلا ليها ألف حكمــــــه
علاه يفتن بالنار مول الذهب المال


***


يا نفسي بركاي قلعي ذا السّخمه
وارضي بالقضا ، مهما صال وجال
وديما بادري ليك بآلف ْ تهمــــــــه
ما يصيب الانسان الا سوء أعمال