العرايش و التشاراك من مطبخي

[kakinova]

بسم الله الرحمن الرحيم

البارح كنت رح نعمل العرايش و التشاراك و طلبت من اختي ام هداية نحطهم

عملتهم فالليل و صورتهم


نبدأ على بركة الله

المقادير :

للعجينة :

كيلة زبدة او مرغرين
كيلة زيت
كيلة حليب دافئ
نصف كيلة ماء زهر
ملعقة كبيرة او 2 سكر رطب حسب الذوق انا استعملت 1 فقط
ملح
ملعقة صغيرة خميرة الحلوى

انا العجينة هاذي نستعملها حتى في مول الكرافات و القنيدلات و نستعملها حتى في مكان لابات بريزي للتارتولات و ممكن الاستغناء عن الخميرة

للحشو :

3 كيلات كوكاو مرحي و مغربل يكون متوسك
كمشة جوز مرحي
عطر او مستخلص الجوز
كيلة ماش معمرة سكر نصف نخلطو مع الكوكاو لما نرحيه و النصف لما نخلط المكونات
2 سكر فاني
زاست حبة ليمون اصفر كبيرة او 2 صغار
2 بيضات
ماء زهر


الكوكاو انا فورتو بيه بالقشور تقولولي و علاش : نقولكم حتى ينقص من طعم الكوكاو الحاد و لما نعملوه حشوة رح يبقى طري ما ييبسش من الطياب و الحاجة الاهم انو لما يتفور بالقشور رح يتلون الكوكاو باللون الاحمر و البني و لما تخلطيلو عطر الجوز و حفنة من الجوز يظهر و كأنو كامل جوز هادي خدعة الجوز
عكس لما تقشريه و تفوريه و تضيفي عطر اللوز باش تعمليه خدعة اللوز
و لما يفور 15 دقيقة او اكثر حسب الكمية تخليه يبرد و تحطيه في فرن ساخن و تخليه ينشف على درجة حرارة جد منخفضة 100 عدة ساعات حتى يبقى لونو ابيض مائل للاصفر و يشيح مليح









نخلط الكل و نضيف ماء الزهر 3 مغارف تقريبا حتى نتحصل على حشوة طرية ماشي ناشفة و ماي طرية بزاف نغطيها و نتركها ربع ساعة نلقاوها ناشفة مليح و تتشكل بسهولة دون ان تتفتت





نخلط الكل مع بعض و نخلط مثل ما نعمل الغريبية رح تكون المقادير فالاول سائلة و من بعد تتماسك نوعا ما مثل المايونيز و العملية لا تأخذ اكثر من ربع ساعة



و نشيح بالفرينة



حتى نتحصل على عجينة طرية و متماسكة



نقسمها كويرات و نعجنها فالميكسور دقيقة او اثنين و نغطيها و ندخلها الثلاجة ترتاح نصف ساعة او ممكن تعمليها و الغد تخدمي بيها

و ممكن تعملي كمية قليلة و تخبي الباقي فالكونجيلاتور و لما تحبي تعملي كمية اخري تجبدي و تستعمليها

نحلها فوق الطاولة لا داعي لرش الطاولة او العجينة لانها ما تلصقش و نطبعها دوائر انا نفضل نستعمل القنوط " الرولو " فالحلان حتى نعمل كمية كبيرة في وقت قصير





ثم نشكل العرايش



و نفس الشيء بالنسبة للتشاراك نحط نطبع دائرة و نحط الحشو على الحاشية و نلف هلال


و نحطها في بلاطو ناشف لا مدهون لا مرشوش لانها فيها كمية كبيرة من الدسم ما تلصقت

و نطهيها في فرن ساخن على حرارة ما تتعداش 170 درجة من الافضل نحطها من الاسفل و نشعل من تحت و من فوق حتى تطهى مع بعض و تكون نفس اللون و لازم نراقبها حتى ما تحمارش بزاف و تيبس

لما تطهى ننزعها من البلاطو الساخن حتى ما تكملش الطياب و تيبس من تحت و نزينوها

للتشاراك عملت نص كاس سكر مع نص كاس ماء خليتهم يغليو 5 د و لما برد السيرو غطست الحبات قطرتهم ثم حطيتهم فالسكر الرطب

القلاساج كانت الواحدة نتاع الليل ما قدرتش نستخدم الخلاط هاداك الوقت استعملت قلاساج سريع بالخفاقة اليديوية
فنجال حليل زائد فنجال ماء زهر و نخلطهم و نضيف القليل من الشكر و نخفق حتى يبيض نوعا ما ضفت عصير نصف حبة ليمون و الملون و السكر و خملت خفقت حتى تحصلت على قلاساج لا هو خفيف و لا هو ثقيل
غطست الحبات و قطرتهم و عملت الزهرات قبل ما ينشف و لصقتهم









و بمناسبة عيد المرأة انا بدوري نتقدم باحر التحيات الاخوية لكل الاخوات المهات و البنات في المنتدى و بكل شبر من الارض

ربي يحفظ الجزائر و اهل الجزائر

ربي يسترنا دنيا و آخرة و ربي يبعد علينا ولاد لحرام

احبكن في الله

تحياتي