من روائع الشاعر جلجلي جحلول

[avant centre9]

من روائع الشاعر المبدع جلجلي جلول هي مقتطفات من قصيدة جميلة


" سربيلي كاس"

سربيلي كاس بالنعنــاع بنين------------- زيد اعطيني ڨـــارو نتونس بيه

واسمح لي نحدثك على الوقت الشين------------- ذا الوقت لي كهمومــه كي غاشيه
ضاع الوعد وماتلا للناس يمين------------- ولى العلـــم الجهـــل يقود فيه
وعم الظلم وشاع ياويح المسكين------------- وياويح لي بلا اكتاف وطاحت بيه
وتلف الحيا ومابقا للغاشي دين------------- غي دين الهدرة بـــــلا فعل يزكيه
وجار الفسق وجاهرو بيه الشينين------------- وبار الصدق وبار من يتحدث بيه
مول العلم بين الناس أحزين ------------- والجاهــــــل مبسوط لا من ينويه
واحد عايش عيشة أهنا وتسلطين ------------- ولآخر غي هم الزمان يكاوح فيه
واحد حاير في عشاه يجيه منين------------- ولآخر طامع في السما باغي يشريه
واحد الصحة التامة والعظم متين------------- ولآخــــــر ذبانة تخاف تحط عليه
واحد زهره وين يصد يصيب عوين ------------- ولآخر زاهد سعده مالقى لمن يعطيه
واحد كامل في العقل ثابت ورزين------------- ولآخـــر صوفة طايرة عقله خاطيه
واحد حاصل في الصلا يبداه منين------------- ولآخـــر يعرف للكتاب وسامح فيه
واحد مرته جامعة للحيا والزين------------- ولآخر عـــــواوة وثاني تحكم فيه
هـــالاه الدفلة تولي عسل ابنين------------- ويولــــي شهـــــد النحل لمن يشريه
ولد البية يطيح في القيمة ويهين------------- وديره الكـــــلاب صيد وتنبح بيه
والدين لي كان عند اصحاب الدين ------------- ولات الفســـــاق تشري الدنيا بيه
سربيلي كاس بالنعنــاع بنين------------- زيـــد اعطيني ڨارو نتونس بيه


من يريد القصيدة كاملةأو قصائد أخرى ولديه إهتمام بهذا النوع من الشعر ولديه قصائد لفطاحل شعراء الملحون..نحن هنا للتواصل