صور وصفي الخاصة بالبيتزا 1

kakinova · 2012-09-13, 16:21

بسم الله الرحمن الرحيم

كما وعدتكن عزيزاتي اليوم عملت البيتزا للغداء و صورت مراحلها بالتفصيل الممل باه تفهمو مليح و تشوفو شحال هشوشة و رااااااااااااااااائعة

الجزء الأول 1 الصلصة و الزينة

لازم نبداو بالصلصة لأنو مراحلها طويلة شوية لازم تعمليها و تتركيها تبرد باه ما تعجنلكش عجينة البيتزا

ممكن تعمليها قبل بيوم او تعملي كمية كبيرة من الصلصة و خصوصا الطماطم متوفرة و رخيسة و تحطيها في علب صغيرة ، و توضعيها فالثلاجة تجمد ، و كلما احتجت خرجيها و عاودي سخنيها قيلا على النار و ضيفي شوية ثوم طازج و استعمليها عادي

نحطوها في قدر مع القليل من الزيت و ملعقة كبيرة صلصة طماطم ، ملح و فلفل اسود تغلى على نار قوية باه تتبخر السوائل لي فالصلصة

و هادي الصلصة بعد ما نشفت

نرحيها في مطحنة يدوية باه يبقاو القشور فوق
و تقولو علاه ما طحنتهاش من الاول
نقولكم السر في نكهة الطماطم هو القشور لي تتركز فيها البنة
على قول لحبيبة امي الله يذكرها بالخير البنة كامل فالقشور

و هاذي الصلصة بعد ما خلصت الطحن و رجعتها على النار نشفت مليح مع التحريك المستمر

و هاذو القشور و خيوط البصل لي بقاو ملعقة فقط كامل نزل مع الطحن ما بقا إلا القشور لي تضر المصران

و شوفو الآن حبيباتي الصلصة لي بقاتلي واش راح نعمل بيها

لأنها كمية قليلة عملتها بالطريقة التالية و حطيتها فالثلاجة باه تجمد مليح

لما تجمد ننزعها من المول و نحطها في اكياس صغيرة ، كل مرة لما نطبخ نحط مكعب ولا اثنان او ثلاثة على حسب الطبخة واش تحتاج طماطم

و هاذي الطريقة ممكن نستعملها بكميات كبيرة من الصلصة ، لانو الطماطم فالصيف رخيسة ، نحطها في اكياس كل كيس فيه كمية تاع شهر تقريبا ، و نستعملها طول العام ، بما انو الطماطم فالشتاء يزيد سعرها كثيرا

المهم و هادي الزينة : انا استعملت المايونيز ، الجبن ، التونة ، البيض المسلوق ،
و شرائح البصل مع الفلفل الأخضر الحلو مذبلين في قليل من الملح و الزيت و الماء حتان يطراو

المايونيز نعملها بورق بلاستيكي الرولو راهو يتباع و نغلق الكيس باحكام و نثقبها بالسكين ثقبة صغيرة نعمل بيها تموجات

و هادي سلطة فواكه بسيطة عملتها لغدائنا اليوم بالعنب و البطيخ الأصفر ط الفقوس "

طحنت الماء تاع البطيخ مع ملعقة سكر و بعض القطع و القليل من ماء زهر
ضفتلهم قطع الفقوس و العنب و خلطت مليح

الباقي واش عملت ما كملتش صورتو كان عندي الضياف ما كفانيش الوقت

هدايات26 · 2012-09-13, 16:45

راااااااااائع يعطيك الصحة

jia-smile · 2012-09-13, 17:34

يعطيك الصحة

linat · 2012-09-13, 17:49

بارك الله فيك

kakinova · 2012-09-14, 16:49

شكرا لكل من مرت بموضوعي

بارك الله فيكن و ربي يعافيكن

نورتن بوجودكن

remadna · 2012-09-15, 06:11

الله يبارك فيك
يعطيك الصحة على المجهود و الصور
صح البنة كامل في القشور و زيد الفايدة
انا طماطم البيتزا نديرها نيئة و تطبخ مع العجين في الفرن
كنت قبل نطبخها اما الآن افضل الحفاظ على الفيتامينات

kakinova · 2012-09-16, 16:56

شكرا لمرورك اختي رماضنة

انا العكس منك الطماطم نحبها مطبوخة و خصوصا فالمحجوبة و البيتزا

خخخخخخخخخخخ خلي الفيتامينات ناخذوها من اكلات اخرى المهم البنة