لم أفهم لم ترفضني البنات

[مشكلتي]

السلام عليكم
انا شاب عمري 29 سنة اعمل في روسيا
مشكلتي مع الزواج والله كل ما نرجع فاكونس للدزاير يقولولي لافامي نزوجوك فلانة راهي عاقلة و متربية و... نقولهم دبر راسكم و كل مرة ترفضني وحدة على جال سبب تافه وانا مانيش حاب ندي وحدة من برى حاب بنت البلاد اللي تفهمني و تقدر ظروفي و السهر و التأخير و تعيش معايا فالغربة خصوصا راني عايش وحدي و بزاف عليا والله عييت نفهم علاه بعد ماعنديش الزهر كرهت ازواج و كرهت نرجع للدزاير من لافامي اللي يقولولي علاه متتزوجش ....في بالهم لقيت و قلت لا ؟؟؟
مرة خطبولي وحدة رفض باباها ....انا بنتي ماتعيشش فالغربة وحدها
ووحدة اخرى ....مانتزوجش واحد مانعرفو ش خلاص
ووحدة اخرى ....ماتزوجش واحد يخدم فالاسلحة ..هاذي شرحتلها قلتلها راني نخدم فالمخابر عندي ماجستير صناعة الاسلحة قالتلي سما انت تخدملهم السلاح باش يقتلو العراقين و الفلسطينين ؟؟؟
يعني فالدنيا هاذي انا السبب في قتل الفلسطنين ؟ يعني الماريكان لالا و اسرائيل لالا و بريطانيا لا ...انا اللي نقتل فيهم ؟
الاخيرة هادي واش قالتلهم مانقدرش نتزوجو مبعد يقولولي الناس راجلك شباب عليك ؟؟؟
والله كرهت علابالي كل شيء بالمكتوب بصح مافهمتش علاه يصرالي هكدا ماني باشع ماني مهبول يعني الحمد لله
واحد ليجان يقولولي لبنات ذركا لازم حتى تمشي معاها باش تديها ....يعني لازم ندخل فالحرام باش نستقر
و راكم تعرفو فالغربة كثرو الحرامات و انا عايش وحدي و خايف من الحرام نتمنى تكونو فهمتو عليا

[sarl02]

جيبها روسية وريح راسك ...ياخي مراة مراة .

[/زهرة عصفور الجنة/]

أخي أنصحك ابحث عن شريكة لك في عائلتك اكيد لديك قريبات على الاقل وحدة من عائلتك تعرفك وتتفهم ظروف عملك وتقبل ان تعيش معك في الغربة وادعي الله في صلاتك ان يرزقك الزوجة الصالحة

[sara.info]

أنا لست ادري كيف يقول الشباب انهم لا يجدون الزوجة أنا في محيطي سهلة جدا لا توجد هده المشكلة إطلاقا ........ياو مراهوش خدام و تزوجوه نورمال
و لما تزوج وجد العمل و الأبناء ماشاء الله .............................ربي يرزقك بنت الحلال يا رب ..............و اكثر من الدعاء

[hodayena]

اخي شوف بنت خالتك ولا بنت عمتك لي قريبا ليك ولا واحدة من بنات او خوات صحابك وادعي ربي يسهلك ويرزقك الذرية الصالحة

[&حياتي بلا امل حطام&]

كاين بزاف لبنات اللي يحبو يبعدو على البلاد بلاك محوستش مليح برك.انا عندي صحبتي خطبها واحد عايش في فرنسا وقبلت بيه مالقغي هو اصلا مسوفري في حوايج بزاف كيما الخدمة....تخلات حتى على poste تاعها التي مجات تلقاه غير بسيف .ربي يوفقها.

[ياربي اني راضية]

اخي الكريم المشكلة ماشي في الغربة ولا في خدمتك ولا فيك انت المشكلة في البنات ال يختارهملك الاولى وفهمناها والثانية قالتلهم قاع اسكتوا
الزواج راه مكتوب ماتكسرش راسك ربي راه كتبلك الطفلة الي تديها والنهار الي يجمعكم ربي فيه كل شئ مكتوب وزيد اخي الكريم انت ماشاء الله عليك خدمة ومستوى تعليمي عالي يعني الف بنت تتمناك علاه تقلق في روحك انت راجل ودرت هاك مخلف المسكينة الي قاعدة في الدار وتستنى في مكتوبها وش تقول
ومن الاحسن اخي شوف انت كي تجي شوف البنت الي تناسبك وماشي شرط ادير معاها علاقة وكاين بزاف بنات لحلال

[laraa]

عليك بالإكثار من الدعاء خاصة في أوقات الإجابة والصدقة والمحافظة على الصلاة.
إن شاء الله ربي يفرج عليك.

[لمستغانمية]

ما تقطعش ليياس اللي مكتوب على الجبين راه تشوفو العين غير مكتوبك مابانش .....ربيي يلاقيك مع بنت الحلال

[abdel02]

دير اعلان في جريدة.........رايح الهاتف تاعك ما يسكتش حتى انت تقلهم بالعلى صوت...:"ما نزوجش"

[عُضو مُحترم]

و انت لماذا تعمل في صناعة الاسلحة؟؟؟؟

ارواح للبلاد تشبع ميزيرية و بطالة خير


نصيحتي

تزوج بجزائرية مقيمة في روسيا

كاين جزائريات هناك او تونسيات مغربيات ......

المهم عربية و مسلمة

[achwak.1993]

أظن أن بنات المنطقة التي تسكن فيها ما يعرفوش صلاحهم

[سجل أنا جزائري]

بنات أخر زمان اللي يكون ولد فامليا يخافو منو يقولك لزم نكون نعرفو ولا مشيت معاه يخي حالة يخي

ربي يسهل خويا بلاك أنا ثاني نولي في المشكل تاعك بسكو ما مشيت مع حتى طفلة !!

[كمال الاسلام]

وعليكم السلام

حوس حوس تلقى ان شاء الله.



اعرف برك السبب الحققي لرفضهن

ربما الخطأ فيك وانت تلقى باللوم على الاخرين

[romaysaa15]

يا أخي لبنات راهم بزااااااف ارفد وحط وراهم غي يلصقوا والله لا كاينة اللي هي راها تخطب ....... توجه لربي وابدا مايخيبكش وما تعجلش خويا لان بنات الحرام راهم بزااااف والخداع كذلك راه بزاف والزواج ليلة تدبيروا عام ...لازم تفكر وتحلل وتناقش ثم تتوكل على ربي....نتمنالك كل الخير ...ربي يرزقك بالزوجة اللي تسر قلبك وخاطرك