مستحيل تعمليها مرة ومتعاوديهاش

[اميرة في دنيا حقيرة]

سلام

حبوباتي توحشتكم واش راكم بعد سبات ونوم عميق راني رجعتلكم كي عادتي عاقلة هههههه

حبيت نحطلكم هادي الحلوي تهبل تهبل للاولاد وانا شخصيا نموت عليها بناتي مساكن ميلحوش علاها مني

شوفي حنونتي هادي الحلوى عبارة عن كراميل مغلفة بالشوكولاطة سهلة وسريعة واولادك اكيد راح يستغناو على شوكولاطة الشارع المهم نخليكم مع المقادير

كاس سكر

ربع كاس زبدة

ملعقة صغير بيكاربونات

للتزين شوكولاطة هنا الشوكولاطة لازمة متقدريش تشتغناي عليها تبعيني درك نقولك علاه

نبداو بسم الله

تحطي كاس السكر في كاسرول و تخليه حتى يذوب ويولي لونوا كراميل متخليهش يغماق بزاف بلاكي

و زيديلوا هاديك الزبدة و خلطي حتى تدخل الزبدة في الكارامال و نحيه من فوق النار مباشرة ضفيلها مالبيكاربانات و مباشرة صبيها فوق ورف الزبدة او بابي المنيوم ولي فضلها البابي المنيوم كي حالتي فوق الرخامة تدهنها بشوي زبدة و تصبيها وتخليها تبرد

ومن بعد قطعيها بيدك و غطسيها في الشوكولاطة هنا تبعيني

متقدريش مدريلهاش الشوكولاطة لانها الكارامل بالبيكاربونات صعمها راح يجي شوي حامض كي ديريلها الشوكولاطة راح تختفي هيك الحموضة

تاني حاجة لازم كي دوبي الشوكولاطة متجريهاش بزاف ذوبيها كيما راهي بدون اضافة لا حليب ولا زبدة

و تمتعي نتي واولادك باحلى كرامال دقتيها تجي مقرمشة وخفيفة هواء ممممممممممم

نخليكم مع الصور اسمعوا شوفوا ماشي تقروها و تهربوا الكاميرا راهي محطوطة لي تدخل وتهرب نحكمها


ههههههههههههه غلط حطيلكم المحجوبة تاع الكسرة معليش احكموا بيها يديكم حتى تلحق الصور خخخ



هنا بعد ما نشفت قمتها هي خفيفة بزاف ردوا بالكم

هادي الشوكولاطة دايبة

هنا حطيطها فوق البلاستيك لي نغلفو بيه الموائد في الاعراس معندكش حطي صاشية ههه

هنا بنتي اروى حبت تزينهم بالشوكولاطة كنت راح نزينهم انا وليت قلتلها ابدعي و تفنني هه
هنا مزال منشفتش مليح الشوكولاطة بناتي مصبروش وليت صورتها

الشكل النهائي وهي محطوطة في صحن مزال على خاطر مزالها في الثلاجة







و خيرا وبعد اكلها عليكم بزيارة طبيب الاسنان