ريحوني

[مشكلتي]

السلام عليكم جميعا.

انا فتاة نقرا في الجامعة..ومرة كنت قاعدة وحدي نريفيزي في دروسي..جا طفل وقعد معايا قالي معليش نهدر معاك..أنا حسبتو عادي جاني كشما يحتاج حاجة ولا يسقسيني في مجال الدراسة ..بالصح فاجأني كي قالي معليش نحكي معالك في موضوع ..وبدا يقولي راكي عجبتيني قتلو خويا انا ماشي تاع هادي لحوايج خاطيتني
قالي علاه ماتكونيش معقدة..وبدا يحكي في هادا الموضوع..وممبعد انا نوظت وقتلو انا نروح دركا..وبدا يمشي معايا..مشا معايا مسافة طويلة شويا وانا قاعدة نقنع فيه باللي انا خاطيتني هادي الامور وكنت نهدر معاه وانا نتبسم شويا ماشي لأنو الكلام تاعو عاجبني ولا.. لا انا طبيعتي هكدا كي نحكي مع اي واحد نتبسم.. يعني مانحبش نحشمهم ونحب نكون طيبة معاهم..والمشكلة دركا انو الطلبة اللي في الجامعة خايفة ايلا يدو عليا نظرة ماشي مليحة وانا والله مانحب ندير هذا الشي خايفة على سمعتي بزاااف وانتم واش رأيكم؟؟ممكن يشوفو ليا بنظرة اني بنت ماشي مليحة؟؟؟؟ريحوووني

[- بصمة خير -]

السلام عليكم و رحمة الله تعالى و بركاته

نظن انت سنة اولى في الجامعة و الله اعلم

الجامعة مختلطة و في الدراسة تاعك تحكي تحكي مع الجنس الاخر بسيف عليك

ولكن

ماتحكيش معاهم و انت وحدك يعني لازم تكون معاك وحدة صحابتك و الا تكونو في جماعة في بزاف
و تاني شي احكي معاهم غير في الدراسة بس بس بس

و هذوك الجماعة اللي يجمعو و يحكيو على البنات و الزواج و ... كل شي اخطيك منهم

الندامة راهي جي في الاخر

و بالنسبة واش صرا معاك نطن هذا الطالب مايعرفكش يعني قال نجرب و نشوف زهري

اذا زاد صرا معاك حاجة هكذا ماتحكيش خلاص معاهم

يشفوك ماكيش بنت مليحة اذا كثرتي من الهدرة مع الجنس الاخر و لكن مانقدرش نظمنلك في حياتك الجامعية ماتهدريش خخخخلاص مع اي واحد من الجنس الاخر

و ربي يوفق

[مريم الصابرة]

السلام عليكم أختي ربي يبارك فيك ويخليك بعقليتك هذي خذي نصيحة مني ما تتعرفي على حتى واحد ولا تتبسمي كاين راجل ربي مكتبولك فالحلال هذاك هو الصح وكي تتبسمي حتى وبنيتك يقراوها حاجة اخرى خليك مع نفسك وما تقيمي حتى واحد نصيحة نتاع وحدة حبت وندمت والحمد لله ما صرا والو ربي يكون معاك

[محمد جديدي التبسي]

بارك الله فيك أختي وهذا الموضوع يدل على خير كثير فيك

عليك باجتناب الذكور قدر استطاعتك وأن تظهري الحزم والجدية في التعامل معهم ولا تخالطيهم أبدا

وعليك أيضا بالجلوس مع صديقاتك واجتنبي الأماكن التي يكثر فيها المارة أو أن تجلسي وحدك فهذا يجعلك فريسة للتحرش اللفظي

ثم انصحك باللباس المحتشم الذي يظهر احترامك وشخصيتك الملتزمة والمتدينة

وإياك والابتسامة مع الرجال فهناك مرضى القلوب الذين يفهمونها شيئا آخر

وفقك الله لك خير وجزاك الله خيرا على حسن أخلاقك

شكرا لك

[فارس الجزائري]

وعليكم السلام
يقولون فلانة معقدة ثم إن فكت عقدتها يعقدون الأمور، فيذهبون وتذهب رياحها معهم
يا أختي إجتنبي ما يسئ لسمعتك والتزمي بدينك تسكتي أفواه الغافلين
بالتوفيق إن شاء الله

[@[نســـــيم ♥ الجـــــود]@]

ههههههههههههه تمرضي بالناس ؟؟؟؟؟؟؟؟

[abdel02]

اوصيك باثنتين والله اعلم:
1-عمرك ما تقعدي وحدك يقول صلى الله عليه وسلم :ً عليك بالجماعة فإنما يأكل الذئب من الغنم القاصية
2-الابتسامة مليحة مع الناس اللي يحبوك ماشي مع الناس اللي دايينك لجهنم وانت تنظرين.

[دكتورة بإذن الله]

السلام عليكم اختي الكريمة ..

خليهم يقولو معقدة ...احسن من حاجة اخرى ..و ابقاي معقدة احسن

و اصلا الناس لي كيما هاذو و غيرهم لازمك تكوني stricte معاهم ..(صارمة)

واش راحلك في الطلبة لي معاك..يهمك رضاية ربي. .

الناس الواعيين تحكم من السلوكات ..و بالتالي يظهر الجيد من القبيح ..

لان الجوهر يعكس المظهر احيانا الذي هو متمثل في تصرفاتنا تجاه الاخرين ...

فالطلبة الذكور من صنف الرجال سيكنون لك الاحترام حين يعرفون معدنك الطيب..

اما المنسلخين من الرجولة سيصرفون النظر عنك ..لانك لست من متغاهم

وكي تفرضي احترامك هذاك هو الصح..

و من باعد يتحول كلشي لاخوة و احترام..بالنسبة لمن يدرسون معك

وبالله التوفيق..

مع التحية ..

[feloussa]

والله بارك الله فيك أخي في الله "فارس الجزائري" صراحة أي موضوع نقراه و نقرا الرد تاعك نلقاه كافي شافي جزاك الله خيرا . أختي صاحبة المشكل التزمي كما نصحك بالطريق السوي و "الصراط المستقيم" و حافظي على سمعتك و ربي ان شاء الله راهو ما يشوهش سمعتك لأنك أول مرة يصرالك موقف مشابه كما أنك باين عليك بنت عائلة شريفة و ماكيش تاع اللف و الدوران كي معظم بنوت هاد الأيام ربي يوفقك و يجازيك خير و بارك الله فيك. شكرا