المشكلة اني كرهت الدراسة

مشكلتي · 2011-11-19, 18:32

السلام عليكم ورحمة الله وبركاته
انا طالبة جامعية سنة ثانية جامعي، راني كرهت القراية ماعلاباليش علاش لانو راني دايرة في راسي بلي نقرا ومانلقاش الخدمة (نخدم قبل الزواج لاني مانحبش نخدم بعد الزواج)لانو درك مين راني نقرا المواد اللي راني نقراهم غير شكيل ومافيهمش فايدة حتى اني مين ندخل للمحاضرة قلبي يولي مزير والله كرهت ، للعلم اني كنت ممتازة ومجتهدة عندما كنت في الثانوي وتحصلت على معدل جيد وحبيت نقرا مدرسة عليا للاساتذة وماعطاوهاليش راكم عارفين قبلوها بمعدل 16، بصح على حساب ماسمعت كاين جابومعدل 10 ودخلولها يعني بالعرف، لاعلينا راني نبغي نقعد في الدار بزاف حتى وصلت نقول لماما كرهت لقراية وحابة نبلوووكي العام بصح راني خايفة نندم اذا ماكملتش، للعلم اني كل يوم نروح للدار يعني مانباتش في الاقامة، الجامعة بعيدة علينا ب35 كلم، حبيت ندير كونكور تاع مساعد تربوي لكن ماداروهش، حتى وصل علي الحال وقلت لماما راني حابة نتعلم خياطة لانو الخياطة تلهيني وتعمر الفراغ بصح على القراية واااااااالو
مين كنت في الثانوي كنت نعرف كل اللغات ونتحدث بهم بكل طلاقة ومين طلعت للجامعة تبلعت يعني راني مانعرف والو
سمحولي طولت عليكم
اتمنى انكم تنصحوووووني
جزاكم الله عنا كل خير

انثى المطر · 2011-11-19, 21:11

ربي يهديك

اهم شئ هو الشهادة الي راح تحتاجيها لا محالة

ان ماكان في خدمة

في اغراض اخرى تاكدي من ذلك

موفقة

جوهرة العدالة · 2011-11-19, 21:21

ايه فحلة من طالبة جامعية الى خياطة ؟ راكي تسالي لكان تندمي كون تبلوكي ، انا انقولك تندمي اكيد ، لقراية هي كلش يا اختي لازم تتحصلي على الشهادة و منبعد يرحمها ربي .لكان انت تخمي تبلوكي لاني راهم كاين ناس ماقدروش حتى يتحصلو على الباك مساكن .امالة احمدي ربي على النعمة لي عطاهالك . و اقراي لمعودتين و سورة البقرة يوميا وربي ينجحك ان شاء الله و يبعد عليك بنات السوء

اللؤلؤة مريم · 2011-11-20, 11:42

السلام عليك أختي شوفي أختي لوكان تتخلي على دراستك الجامعية راكي رح تندمي السبب لي خلاك تخمي باش تخلي قرايتك هو أنك حاطة بيلي مش راح تلقاي خدمة يعني راكي تثبطي عزيمتك على الدراسة بنفسك أصلا وش يهمك تلقاي خدمة ولالا الخدمة خليها على ربي كي تكون مكتبتلك تجيك لباب دارك المهم هي الشهادة و أحمدي ربي علا خاطر مشي الناس كل قدرو يدخلوا للجامعة بالتوفيق أختي

naima2011 · 2011-11-20, 17:47

السلام عليكم............يا اختي العزيزة اتمنى لو تفكري بعقلانية..........انت الان سنة ثانية وعلاش راكي تخمي من دوكا في الخدمةمازالك مشوار كبير وعلا ش ماتقوليش انا ندرس ما نتحصل على دكتوراه اسمعي الرزق او الخدمة بيد ربي سحانه وتعالى.....انت درسي من اجل الدراسة.......فقط والباقي خليه على ربي......اسمحيلي هذا تفكير تاع واحد جامي تعلم.........اسفة ارجو ان تغيري افكارك وتوكل على الله.......وعلمي اذاكنت متحصلة على شهادة الدكتوراه وربي ماكتبلكش الخدمة.........واش راكي رايحة تعملي؟؟؟؟؟؟

نورالهدى** · 2011-11-20, 18:45

راكي تحكي من عقلك ؟؟؟

اصلا السنة الجامعية راهي غير وين بدات حنا درك عادا وين قلنا بسم الله ونتي بديتي تقلقي

تبانلي عين وصابتك غير اجري ارقي روحك واقرى البقرة

ربي معاك ختي

سحر الغروب · 2011-11-20, 18:55

لا حول ولا قوة الا بالله

العني ابليس

مام حتى لو ديتي الديبلوم و ما خدمتيش راكي ربحتيه

انا قريت وراني متزوجة والحمد لله مي كي نتفكر التخرج وووو

نفرح ونطمئن نحس تحتي سلاح

ما ديريش في بالك الديبلوم = عمل

لا ...يمكن اليوم ما خدمتيش بيه في المستقبل تحتاجيه

ديري ربي في بالك...

بالعكس انا نفكر في الماجستير و الدكتورا لما لا

وفي نفس الوقت ربة بيت

اخطيك و ماتعمريش راسك والتاي في قرايتك

الوالدين يجي نهار و يقدر عليهم ربي

و يروحو كل من عليها فان

تتزوجي ما قلنا والو ان شالله ربي يكتب

افرضي لا قدر ربي اتزوجتي وزوجك توفى

راح تخدمي بمستوى 2 جامعي؟

ياو الليسانس ويا ربي

موفقة اخية.

سحر الغروب · 2011-11-20, 18:57

لا حول ولا قوة الا بالله

العني ابليس

مام حتى لو ديتي الديبلوم و ما خدمتيش راكي ربحتيه

انا قريت وراني متزوجة والحمد لله مي كي نتفكر التخرج وووو

نفرح ونطمئن نحس تحتي سلاح

ما ديريش في بالك الديبلوم = عمل

لا ...يمكن اليوم ما خدمتيش بيه في المستقبل تحتاجيه

ديري ربي في بالك...

بالعكس انا نفكر في الماجستير و الدكتورا لما لا

وفي نفس الوقت ربة بيت

اخطيك و ماتعمريش راسك والتاي في قرايتك

الوالدين يجي نهار و يقدر عليهم ربي

و يروحو كل من عليها فان

تتزوجي ما قلنا والو ان شالله ربي يكتب

افرضي لا قدر ربي اتزوجتي وزوجك توفى

راح تخدمي بمستوى 2 جامعي؟

ياو الليسانس ويا ربي

موفقة اخية.

BAROUD · 2011-11-20, 19:10

يصبح عندك مشكل كبير لو تتوقفي علئ القراية ...حتئ انا كنت هاك و اليوم الحمد لله تخرجت بالليسانس من 2006 رغم المشاكل لكن ديبلوم في الجيب و مزال مشاكل الخدمة لكن ربي خير ...وهذا الوسواس انت فيه انا عرفت ناس حبوا يبطلوا من السنة الاولئ لكن شوي شوي اليوم و الله غير راهم فور ...

guettaoui imane · 2011-11-20, 23:18

اسمعي اختي ماتصيبي غير قرايتك و غير هي لي تنفعك انتي قراي وديري لي عليك و الباقي على ربي و علاه راكي كارهة القرايا كامل هكذا ماشكيتش السبة تاع ماتلقايش خدمة هي الكافية و الله غير تندمي اقراااااااااااي القراية هي الصح و ماراكي رايحة تخسري والو بالعكس تربحي صوالح بزااااااااااااااااااف و ربي يعاونك و يهديك.

الاقحوانة الحمراء · 2011-11-21, 00:32

slm sah kraytek hia assah
bitiwfik

moi* · 2011-11-21, 08:49

اختي الكريمة
اذا راكي تسقسي اذا تندمي كي تخلي قرايتك نقولك بالتاكيد
واذا على الخدمة جيبي الشهادة ومتخدميش بيه
راهم كاين بزاف ناس يخدمو خارج مجال قرايتهم
المهم متخليش قرايتك وشدي فيها بعشر يدين
لانو متحسيش بقيمتها غير اذا فقدتيها

سرب النحل · 2011-11-22, 08:46

نقولك الصح اختي انت انسانة ضعيفة بزاف صعيبة عليك الدنيا..

hilan · 2011-11-24, 19:19

هناك الكثير من قال أنني كرهت الدراسة و توقفوا لكن بعد مضي سنتين ندموا ندما شديدا لأن زملاءهم تخرجوا و هم يعملون بشهاداتهم بينما هم بدون شهادة و لا يستطيعون إكمال دراستهم لفشلهم أو لمعنوياتهم المنحطة ، أنصحك اهتمي بدراستك و أكمليها ، فأنا لم أحلم في حياتي أني سأعمل لكني الحمد لله أكملت دراستي ومنصبي معي الآن

تاج الوقار16 · 2011-11-24, 19:24

يا الحنونة ديري رقية ربما الشيطان راه يحرض فيك على قرايتك

وزيد اذا تقدري شوفي نفساني يساعدك ويوضحكلك الامور

وشوفي الناس وين راها بالعلم

ولازم تنحي من بالك الوسواس وتدعي ربي يريح قلبك للدراسة ويوفقك