شوفو عشايا البسيط في المحتوى و التقديم

السيدة كرمين · 2013-11-28, 08:23

لعشية لما نجي من الخدمة نحضر حاجة خفيفة مع القهوة بالأمس عملت مسكوتشو

هذي مزينة من لفوق بنوتيلا للأولاد

هذي بدون نوتيلا ليا و للأب

أول أمس عملت شربة وعملت بزايدة لأني من الناس لي يحبو لفريك لما يبات

وعملت معاه طاجين الشوفلور و البطاطا بالدجاج و الفرماج

ظفت البارح على الشربة

البوراك

و الدجاج

طبعا لا تخلو الطاولة من السلاطة المشوية

وهذي الطاولة شبه جاهزة خصو الكيسان و المغارف

الله غالب لبارح كنت تعبانة وعجزت نزين الطاولة خاصة مع لولاد

هبلوني

لي تعجبها تقلي ولي معجبهاش اكتفي بالشكر

تقبلن تحياتي

بريق الامل& · 2013-11-28, 08:33

كلشي عجبني سيددة كرمين الله يبارك خدامة وقدرت توجدي كل هذا
حطيلنا طريقتك في شربة فريك
والموسكوتشو
والدجاج
معليش نتعبك شوية بصح حسيتها بسيطة وبنينة حتى السلاطة
روعة يعطيك الصحة وربي يخليلك عائلتك الكريمة

بريق الامل& · 2013-11-28, 08:34

عجبتني وشكرتك لانك فعلا تستاهلي

السيدة كرمين · 2013-11-28, 08:46

اقتباس:

المشاركة الأصلية كتبت بواسطة بريق الامل&

كلشي عجبني سيددة كرمين الله يبارك خدامة وقدرت توجدي كل هذا
حطيلنا طريقتك في شربة فريك
والموسكوتشو
والدجاج
معليش نتعبك شوية بصح حسيتها بسيطة وبنينة حتى السلاطة
روعة يعطيك الصحة وربي يخليلك عائلتك الكريمة

شكرا اختي لردك الرائع و المشجع جدا

طريقتي في الشربة فريك

في البرمة نحط الزيت ونقلي اللحم
نحط عليه البصلة و الطماطم ونحط الفريك بعد مانغسلو و الثوم و الملح و التوابل و الدبشة
وكاس ماء دافي نخليهم يتقلاو لما يتقلاو مليح نحط طماطم العلب ونمرق بماء سخون بمجرد ما تغلى نقص على النار
لما تولي قريب تنضج بربع ساعة نكون مجهزة في صحن فلفل حار وشوي فاح وسنة ثوم ورند وكرفس
لما يمر الوقت نطفي ونحط الدبشة

besbes · 2013-11-28, 09:18

هداك البوراك عورني الله يعطيك الصحة وبارك الله فيك

marina2013 · 2013-11-28, 09:23

ربي يخليك لولادك

basmala farah · 2013-11-28, 09:24

كل شيءيشهي الله يعطيك الصحة

hindoucha02 · 2013-11-28, 09:43

يعطيك الصحة أختي من فضلك ممكن تعطينا طريقتك في تحضير الموسكوتشو عجبتني بزاف.

غزة في عيوني · 2013-11-28, 09:49

كلش فوووووووووووووور رغم انها بسيطة والله غير هايلة كوني عرضتيني بصحتكم

sidali 2007 · 2013-11-28, 10:39

روعة يعطيك الصحة

ساندي 28 · 2013-11-28, 10:47

كل شيء رائع اختى بصحتكم

scorpionoir · 2013-11-28, 11:44

سيدتي المحتومة ما كانش كيما البساطة انا عن نفسي عجبتني بصح راني زت شكرتك على تعبك ومجهوداتك
دمتي متالقة دائما

السيدة كرمين · 2013-11-28, 11:45

شكرا للاخوات على مروركن الرائع
وجزيتن خيرا على التشجيع

أما عن طريقة المسكوتشو

ناخذ 4 حبات بيض
كاس سكر
كاس ناقص زيت
كاس ياوورت - 2 بايط ياوورت نشري غير تع 10 د -
زاست أو فاني
2 خميرة
فرينة عينك ميزانك
لما نستعمل الكاكاو نبدا بيه لول مع شوي فرينة وخميرة ومبعد نظيف الفرينة شوي شو

بالنسبة لوصفة الدجاج كنت خصصت موضوع من قبل فقط الطريقة هاذي تختلف في الشكل
بحيث نفتح الدجاجة من جهة الظهر ونقلبها جيهة الصدر نضغط عليها بحيث تصبح مفتوحة
وماطولش في الفرن أما التتبيلة فهي نفسها

تقبلن حبي واحترامي