مشكلة مهنية

[مشكلتي]

السلام عليكم و رحمة الله
قبل ان اطرح مشكلتي، اشكر كل المشرفين و المراقبين الساهرين على هدا المنتدى، و جزاهم الله كل خير عنا، و ان شاء الله يلقاونها في ميزان حساناتهم يوم القيامة، كما لا يفوتني شكر الاعضاء المساهمين بارائهم و ردودهم.
هذه النافذة من اروع النوافذ، و ستلقى نجاحا كبيرا، لانه يوجد الكثير منا له اسرار و خاصيات لا يحبذ ان يعرفها الناس عنه، و انا واحد منهم.

مشكلتي في الحقيقة ليست بالسرية، لكن وضعتها هنا لانجاح هذه النافذة، كنت حاب ندير عضوية جديدة و نطرح سؤالي، لكن العملية تستقرق وقت.

ادخل في صلب الموضوع و اريد من عندهم خبرة في مجال العمل في الادارة خصوصا التدخل العاجل باراءهم.

انا اعمل في الشركة عامة منذ 4 سنوات، اعمل في مديرية فيها حوالي عشرين موظف من نفس مستواي. كانت علاقة العمل نتاعي جيدة، مع الزملاء و ايضا مع المديرة، في كثير من الاحيان مديرتي تشكرني في غيابي، و في واحد المرة شكرتني امام المدير العام نتاع الشركة (حنا عدنا باش يسمع بيك المدير العام حاجة كبيرة بزاف). يعني كنت متحفز، حتى العمل نتاعي كان دايما متقن و المديرة متشوفوش اصلا، دايرة في ثقة، حتى الزملاء يغيرو مني من هدي بزاف. هنا كل شيء عادي
درك عندها عام كلش تغير رأسا على عقب، و هذه هي المشكلة، كنت في اجتماع حولى عمل انجزته و انا انذاك بصدد شرحه للزملاء، و في اثناء الجلسة، قام احد من الزملاء و هو من المقربين نتاع المديرة، و هو يصف العمل نتاعي بان فيه اخطاء كارثية و و والخ، و هو و الله العظيم يا خاوتي ما يقدر يخدم واش درت، هو شاطر برك في التعليق، المهم انا في العمل نتاعي لي قدمتو كان صح هناك خطأ لكن كان مبني على خطأ اخرـ يعني انا درت على واحد القرار هو الغي من بعد، و انا مكنتش علابالي décision annulée و هذا راجع الى الوقت، حنا في الشركة الضغط نتاع العمل عالى جدا، و زيد ميعطوكش الوقت الكافي.
المهم انا قمت في تلك الجلسة مقلق لانو غاضتني التهجم نتاعو علي، مع انه خطأ عادي، و لا يترتب عنه اي شيء. وانا علابالي يحب يبان، مش الهدف نتاع العمل، قلت له، امام المديرة العمل نتاع 6 اشهر مش نتا لي دير فيه ملاحظات، لانه كبير عليك، و كانت الجلسة نتاع 3 ايام، و هذا صرا في اليوم الاول، يعني العرض نتاعي توقف في اليوم الاول، لاننا جبناها غير دواس، و كنا درنا روطار، يعني خرجت 7 مساءا من العمل. خرجت اليوم الاول مقلق بزاف، اليوم الثاني مرحتش، مع انها تنتظرني المديرة في الجلسة باش نكمل العمل نتاعي ولي هو كيما قتلكم يدوم 3 ايام اذا خرجنا على 7 مساءاـ يعني اذا خرجنا على 4 و نص يدوم مش محال اسبوع، لكن معليش حتى الساعات الاظافية منخلصوش فيهم، لاننا زعما اطارات، و في قانون الاطارات كي يكون عمل ما يروحوش حتى يكملوه.
نرجعو المشكل، انا مرحتش بلعاني، كانت قايضتني، واحد انا نعرف تقنيا خير منه بشهادة الزملاء و المديرة نفسها، و صبحت راقد حتى الساعة 10 صباحا، عيطولي على 9 سا و ان مرفعتش التليفون. يعني زدت عقدت الامور، و في اليوم الثالث، روحت للعمل، و كانت القلقة راحت شوية، خصوصا كي عيطولي بعض الزملاء مش كل، لانهم غيورين، ميحبوش واحد يعرف خير منهم، كملت العرض نتاعي بكل برودة اعصاب، يعني كانت هناك تدخلات خاطئة و انا محبيتش نجاوب عليها، باش تخلاص الجلسة تمتم
المهم كيما كملنا عيطتلي المديرة في المكتب نتاعها، و بذات التعرش علي وقالتلي شوكيتني باسلوبك، قتلها شوفي معاه اسلوبو هو مش انا ـ و هي تقلقت لدرجة ولات تعيط علي، و انا تما خرجت من عندها لانني خفت كشما نقول و لا نغلط.
و مبعد اصبحت هي تتجنبني لمدة شهر، يعني كي يكون عمل، تهدر مع chef d'équipe نتاعي و تقولو يخدمه
انا مكنتش نعمل جيدا، حتى بعد شهر، بدلت تبحثلي عن الاخطاء، و صح كانت اخطاء، لانني مكنتش محفز للعمل، و هي كل مرة تعيتلي و تجبدلي الاخطاء نتاوعي، واحدة المرة، جبتلها 3 اوراق فيها قاع الكوارث لي كان يدريها هذاك الانسان لي هو سبتي معاها، و قتلها شوفي واش راه يدير، قاتلي روح عندو و يقلو يصححهم، تتقاعد بي.
المهم كان بقى شهر على التنقيط نتاع العمل، عطاتلي 3 من 10 يعني كارثة، روحت عندها على جالها، و قاتلي كي ترجع تخدم مليح تما تستاهل 10 من 10.
المهم من تما و انا معنديش المحفز باش نعمل، شحال مرة هممت باش نستقيل، لانني الدراهم لي راني ندي فيهم علابالي حرام، منكذبش عليكم منيش نتقن في العمل، حولت شحال من مرة، لكن كي نشوف هذاك الانسان، نولي كيما كنت. رحت ليها، و قتلها، راني مش مرتاح هنا في هدي المديرية، قتلها اذا ديري مزية حوليني الى مديرية اخرى، قاتلي خلاص كمل الاعمال لي راهي في يدرك و تما تروح، المهم كملتها، قاتلي منقدرش نخليك تروح، لانه كان عمل اخر يسنى في، قتلها مزال موالاش نتاعي باش نكملو، قالتلي داخل في البرنامج نتاعك بالكذب.
زادت قلقتني، كي وعهدتني و خلفت الوعد نتاعها. و زادت قاتلي طاي طاي التحويل مكاش، اذا حاب التروح، استقيل، و نتوما تعرفو البلاد نتاعنا ما فيهاش العمل بزاف, راني نبحث عن العمل و في نفس الوقت راني خدام في الشركة هاذي، لكن الدراهم لي راني ندي فيهم، منيش عارف كيفاش، اذا ماصبتش عمل، كيفاش ندير، نستقيل، او اذا بقيت كيفاش نكون محفز، مع انه عندي الوازع الديني لكن التطبيق، الله يكون معايا، مقدرتش يا خاوتي
كل يوم نزيد نعيا مورالمو

بارك الله فيكم، علابالي رايحين تعياو في القراءة، تديلكم الوقت بزاف، مي ان شاء الله ربي يبارك فيكم و في اوقاتكم