واش بيك ما جيتش البارح؟ ما تنساش بلي راك خدام عندي؟

[elsaker]

عقود الإدماج مقبول عموما، كحل استثنائي، لكن السؤال المطروح:
ما هي عدد ساعات العمل، أو بعبارة أخرى ما هو الحجم الساعي المقابل لهذه المنحـة المقدرة ب 12000 دينار؟
أنا شاهدت بعض الشباب العاملين في هذه العقود تحسبهم والله موظفين رسمييـن، يبدؤون العمل على الساعة 08:00 إلى غايـة 16:30 طبعا مع وقت الراحـة.
فعدد ساعات العمل يجب أن يتوافق مع الأجرة الممنوحـة.
لذلك اعتبرتُ شخصيا أن عقود الإدمـاج ما هي إلا فرصـة استغلال الشباب من طرف المسؤولين منهم العاديين ورؤسـاء المصالح وغيرهم..، فمنهم لا يمتلك ادنى مستوى وتجده يتكبر - يتكسل - على هؤلاء، وكأنه في مؤسسته الخاصـة، فتجده يتعامل معه بطريقة لم أجد الكلمة المناسبة التي أصفها بها إلا أن أقول بالدرجة بعض ما يورد على لسان هؤلاء المسؤولين، عفوا: المسعولين:
واش بيك ما جيتش البارح؟ ما تنساش بلي راك خدام عندي؟
وقادر نحبسك؟
متعاودش تغيب بلا ما تقولي؟
واش هذا التخلاط، تقول عمرك ما خدمت؟!!!
واش بيك أنت حابس، واش قريت في الجامعة؟ كنت تاكل وارقد؟؟؟
شكون قالك دير اهضر معاه؟ أنا مسؤولك المباشر، مكان ما دخلك، كلش هو أنا، دير واش نطلب منك أنا؟
ويجيب المسكين وخايف على خبزتو: بصح أنت عندك شهر ما جيتش؟
- واش دخلك راني خدام عند بوك؟ ما خص يقول عند أمك؟ وبالاك قالها؟!!! وما تعرفش تتصل بيا، لواش اعطيتك الرقم تاعي؟ ولا تعرف غير تبيبي؟
- يجيب المسكين: والله ما عندي الزينيتي، راك تعرف حالنـا. ما خلصوناش ؟.......
هذا هو واقع شبابنا في عقود الإدمـاج، وحتى الأستاذ المؤقت في قطاع التربية يتعامل بالمثل من طرف بعض المدراء والمفتشين والكاتبـة والحارس........راك غير كنترا برك.....
وخلاصة القول أن عقود الإدماج هي عودة لاستغلال الإنسـان التي عرفها التاريخ في وقت بعيد، أي نظام العبوديـة.... بمعنى أنهم عبيدا، يستغلونهم وقت ما شاؤوا، وحتى حقوقهم مهضومة، ما عندهم الحق في المردوديـة، ولا في النقابـة ولا أي شيء آخر.
فلا حول ولا قوة إلا بالله العلي العظيم.
يستثنى مما كتبته المسؤولين والمفتشين والمدراء و....المخلصيـن، لأنه مهما يكن فإنه يوجد من الناس من هو مخلص لوطنه، بعد إيمان عميق، وفهم دقيق للفكرة( الهدف من الخَلق هو عبادة الله تعالى) .
عذرا على الإطالة.

[عاشقة السكـون]

صح
واحنا ماصدقنا مضينا على العقد دون حتى ان نقراه ماعندهاش بزاف جابلي المراقب العام العقد وقالي شوفي ماكانش تحديد ساعات العمل تخدمي كي انتي كي المرسمين " وان لم يكن اكثر"
صح ماكانش في العقد والقانون ماشي معانا لكن المفروض هناك قانون اخر اسمه "رحمة ربي " المفروض منهم اروحهم يفهموا لكن.............الله غالب
بل في بعض المؤسسات لا يوجد حتى العطلة للمستفيدين من هاته العقود.
لا اعرف ان كانت غلطتنا نحن ام من؟؟؟؟

[geld]

ششششششششششششششششششششششششششششككككككرااااااااا

[BAROUD]

انا كنت نخدم في مديرية حوالي شهر و نص وقفت العمل و قتلوا هايليك حاسبني نخدم مرسم ....رودوا بالكم افرضوا رواحكم راكم الله يبارك جامعيين و تعرفوا اكثر من هذوك الحابسين اللي دايرين رواحهم فاهمين و هم والله ما كان حاجة في الراس ...و لازم تعرفوا انو معظم المسعولين يخافوا من الجامعيين و المتخرجين .........تعرفوا علاششششش خاطر يفضحوهم بسهولة
و انا نقولكم اخدموا قيس 12.000 تاع وجوه الشر ( اقصد وجوه الشر تاع السيستام الوزير و المدير و الجماعة اللي تنزغ الداب و تتخبئ وراء البردعة )

[ليلى الجزائرية1]

المشاركة الأصلية كتبت بواسطة عاشقة السكـون

صح
واحنا ماصدقنا مضينا على العقد دون حتى ان نقراه ماعندهاش بزاف جابلي المراقب العام العقد وقالي شوفي ماكانش تحديد ساعات العمل تخدمي كي انتي كي المرسمين " وان لم يكن اكثر"
صح ماكانش في العقد والقانون ماشي معانا لكن المفروض هناك قانون اخر اسمه "رحمة ربي " المفروض منهم اروحهم يفهموا لكن.............الله غالب
بل في بعض المؤسسات لا يوجد حتى العطلة للمستفيدين من هاته العقود.
لا اعرف ان كانت غلطتنا نحن ام من؟؟؟؟

إيه أختي عاشقة السكون.كيما انا دايرة إدماج في متوسطة الخدامة المترسمين يدو عطلة مع التلاميذ واللي متعاقدين يروحو يقعدو على سعدهم مع العساس يونسو فيه

[mira27]

wach ngolkom, rabi khir
kolch yfout, mais un jour on aura notre place
ntèklou 3la rabi bark

[melouk82]

السلام عليكم
اخواني انا راني خدام في عقود الادماج صدقوني راني مداير فيهم رايي
ماعلابالي لا بالمدير لا بالدواب لي يخدمو معاه
واحد المسعول ايحوس ايدير كيما قال صاحبنا
قالي راني شتك غير اليوم والبوانتاج تاعك مايعقبش
علابالكم واش قلتلو لوكان مايفوتش لبوانتاج راني نشعلك بيك بالسيارة نتاعك راني حلفتلو بلي نحرم عليه الدخلة للمؤسسة
المهم صاحبنا راه مضاه بخط يدو البوانتاج اوراه عاد ايقولي واش راك الشاف
المهم راني نقولكم خاوتي اخدمو قيسكم قيس دراهمكم ولي زاد اعليها راهم ايديرو فيه لعجب
سلام

[simson]

meme nous on fait pareil on nest pas obliger d'alle travailler comme les titulaire pour le travail il cherche apres nous mais pour les postes non donc quils aillent jouer ailleurs

[rimadima]

hasbona allaho wani3ma lwakil

[faridddz]

هذي منحة بطالة ماتروحوش

[mohamed888]

يا خاوتي انا راني غير كيما عيطولي
واش تنصحوني ولبلاصة لي حطوني فيها شوي خدمة ماشي كيما صاحبي يخدم كيما يحب

[عاشقة السكـون]

إيه أختي عاشقة السكون.كيما انا دايرة إدماج في متوسطة الخدامة المترسمين يدو عطلة مع التلاميذ واللي متعاقدين يروحو يقعدو على سعدهم مع العساس يونسو فيه

احنا هاد السمانة برك داروونا كل 2 نهار زعما علاجال الدعم اللي داروه لطلبة السنة الرابعه " شخصيا ماسكتش هدرت لكن ههه لقيت روحي وحدي وليت انا اللي ماشي مليحة الاخريات "انعم حاضرر سيدي" فسكتت قلت بالاك كل واحده وظروفها انا ماعنديش عليمن نخاف بالاك هو ما ظروفهم خير والمشكل يحصلو فيك كلش
مرة اعترضت على حاجة قالونا كامل ارفدوا صيكانكم وسهلوا ههههه يعني زعما انا قطعت الخبزة للجميع شخصيا ارفدت صاكي ورحت لكن كي قوات الخدمة على المرسمين "والحق يقال هوما بزاف ملاح معانا . المشكل في المراقب العام اللي متالبنا " هدروا مع المديرة مازادوش نهار تيليفوناولي نرجع للخدمة...
ايييييييييييييييه الله غالب
حاسبين روحهم خلاص ملكوا الدنيا يتحكموا في مصير العباد

[رابح ش]

قال تعالى : وفي السماء رزقكم وماتوعدون... الحمد لله مسلمين ومؤمنين اما هؤلاء المسؤولين ربي وكيلهم على اعمالهم وحقرتهم

[زكريا ضياء الدين]

في البلدية تاعنا صحابي تع العقود يخدمو من 8.00-------16.30


و في الثانويات و المتوسطات قسموهم الئ فوجين فوج يخدم الصباح و فوج يخدم مساءا

[hatem_alg]

شكرا اخي على هذا الموضوع ، وهناك العديد من هذه الحالات في بلد غني بالثروات مثل الجزائر، لكن الله غالب شجع مع عدم رافة المسؤولين بالمدمجين وكان هذا الراتب هو يعطيه من جيبه الخاص