حــوجي انا قـداش انعاني

[ramzi nassim]

حــوجي انا قـداش انعاني***من هـالطفله اللي ما بـغات

واش ابـــلاني واش اداني***نـعشق أنـا مـيرة البـنات

نـحلف انتوب و نولي ثـاني***اعييت نداوي الكية ما بـرات

ولفي راني في غرامك فـاني***البـقاء لله هـذي هي الحياة

كل يوم نقول اذا الزهـر واتاني***نمشي لموعدنا نلقاها جات

نلقى غي المكان خالي يسنناني***نقعد كالغريب كثير التـلفات

لاه تنامي انتي و قلـيبك هاني***و انا قـلبي محير وين نبات

نسهر مـع صورتك و احزاني***و يدينا الحديث تلحقنا الصلاة

زاهد في الدنيا بـلاش امـاني***راح سعدي حاجة ما احـلات

نـتونس بعـذابك كيـما جاني***بعساكر قويا نستغفر و فرات

زعمه درتك ورده في جـناني***نشم طيبك اللي يرجع الحـياة

جـاء الريـح اداك وخـللاني***هايم مهموم و الصحه رشات

خليتني ملهلج اسمك في لساني***من نار الوحش الدمعه جرات

عيطت الاولى للمولى الفوقاني***أرحمني ياحنين العمرليه ميقات

وعيطت الثانيه للنبي العدناني***أشفع فـينا يا سيد المـخلوقات

عيطت الثالثه لولفي لي بلاني***بـغيته و نـبغيه و نحبه للممات

صبرت صبرت حتى الصبرنساني***بعدك ما وليت عارف الاوقات

راه بـعد فـراقك توقف زمـاني***مثل الشمس الضوايا كتمسات

راني حاير غرامك ذا منين جاني***وانا بيني وبينك جبال ومسافات

كون ما هو المكتوب عليك رماني***ما تملكي مكنوني يا تاج الخودات

قداش لازمني نصاحب احزاني***باش تحسي بيا يا كحل الرمقات

قداش لازمني نهجر اوطاني***باش تحـني و ترجعينا للي فـات

قداش لازم انا تقدي نيراني***باش تـقولي توحـشتك سـويعات

قداش آلعمر يعدي من زماني***باش تفيقي بلي فرقـتنا الممات

[ramzi nassim]

الله يبارك فيك أخي ابو عامر

يا تــهوالي و يا تــــلهافي*** عـلى الزيــــــنه مـاـني صبار
تـــخـلطت عـــليا القـــوافي*** و ذا القلــب جـــاب لي العـار
حبيت اللـي قــلبها جاـــفي*** تـنام هـي ونـبات انا ســهار
كون تندهني نمشي حافي*** و نــكون عــندها شـاو نــهار
رانـي مـخبي حبها خـافي*** عايش مـعايا مـا طالت لعمار

اسعدني مرورك استاذنا الشاعر