ماني فاهما والوا

yaya41 · 2011-01-30, 15:22

عت ندخل للمنتدى نشوف غير المواضيع لخارجا على الموضوع فرزوا رواحكم ياأعضاء منتدى الجلفة أحنا نحوسوا على خدمة و لا على كونكور نفوتوه مش على نقاشات تخص الدولة ربي يسهل على كل واحد ادا قعدنا نديروا هك والله مانغيروا حتى حاجا كاين 2 حوايج باينا ناقسا الشباب تاعنا خاصة الذكور السكنة و الخدمة حاجا خلاف مانحوسوش نفهموا ديروا في بالكم أنو التغير ماعندوا ماراح يدير بالعكس رايحيين يجينا الجديد و الله أعلم كيفاه راح يكون الجديد هدا بلاك يوالي لينا فرعون

best.2b · 2011-01-30, 15:29

يا أختي ضرك نفهمك فهاذ الناس ..

هاذوا الناس ياإما تلقايهم يضربو فالنساء و كأنهم هوما ليقطعو عليهم الخبزة و يرجعو عليهم اللوم ...
و يذا قلتيلهم السبب هو سوء التسيير في البلاد و الأنظمة القمعية و الرشوة و و و و يقولولك أواه واشبيك إتق الله أحنا نحبو الوطن ....

و ضرك فهمتي

yaya41 · 2011-01-30, 15:32

ربي يهدينا كامل بصح لازم نفهموا واش يسرا مش نخلطوا كلش في بعداه

shakip39 · 2011-01-30, 15:34

الله غالب اللي عندوا شيء في قلبوا هاو يفرغ فيه هنا..."فرغ قلبك"

yaya41 · 2011-01-30, 15:35

أنا قاعدا نشوف الموضوع تاع التغيير في قداه من موضوع أنا حابا كي ندخل نلقا مسابقات توظيف مش مواضيع تخص السياسة كنت ندخل يطلعلي المورال درك العكس

Allaaa · 2011-01-30, 15:35

منتدى فرغ قلبك

best.2b · 2011-01-30, 15:37

لوكان غير يعرفو يفرغو قلوبهم ... هاذوا راهم يفرغو صح بصح ماشي من قلبهم ..تعرفو واش إفرغو

ههههههههههههههههههههههه

بلاما نقول ...

charachoucha · 2011-01-30, 15:41

c vari ya khti احنا حابين نربحو مسابقة بجهودنا بصح ماقدرناش راهي غير الرشوة و المعرفة اللي تخدم العباد و كيفاه نديرو و المشكل ماهوش في الرئيس علاه كي يروح الرئيس يحبسو تاع مديرية التربية مايدوش الرشاوي راهم خدامة عاديين و دايرين رايهم الله لا تربحهم

sabrac · 2011-01-30, 15:46

ما خصناش مسابقات توظيف تاع الخرطي 7 مناصب والمترشحين لها بالآلاف يعني 1000 على 7 مناصب مهما كان يربحو 7 ويقعدو 993 بطالين ، نحن نريد الترسيم في وظائفنا وليس عقود ما قبل التشغيل او الادماج ،كما لا نريد مسابقات من النوع الذي ذكرته سابقا فأعمارنا تمر ولا تتوقف حتى نبقى ننتظر في كل سنة 7 مناصب وعدد المشاركين في المسابقات يزداد كل عام نتيجة المتخرجين الجدد من الجامعة في السنة الواحدة ،واذا نتي ختي باغية تشاركي في هاد المسابقات من هاد النوع ولي يطبعها الغش والعرف أي المحسوبية اقعدي شاركي حتى يرث الله الأرض ومن عليها نحن لا نريد، نريد المطالبة بحقوقنا ولسنا اغبياء ولا ناقصي وعي أو ثقافة فالحياة والتخطيط لها عملية حسابية احسبها مليح في وضعنا الحالي تلقى بلي المسابقات هي ذر للرماد في العيون كما يقول المثل العربي.

fouzi merabti · 2011-01-30, 15:53

ياخوتي الاعزاء...الي عندو مشكل يروح يشكي ولا ايدير انتفاظة..هنا تتعلق الامور الا بالتوظيف..قل لن يصيبنا الا ماكتب الله لنا...رانا صابرين لله. ومن ولاه الله على رعية واهملها .حسابو يوم غدوة...بالتوفيق للجميع.

رامي بوبي · 2011-01-30, 16:00

منتدى فرغ قلبك

yaya41 · 2011-01-30, 16:09

أنا نهدر على الفوضى لفي المنتدى مانحوسش على حاجا أخرى حابين ديروا حاجا حدوا المطالب تاعكم و نحيو فكرة التغيير هادي أو لراح يجي عر من اللي كاين و لا نقعدو نتمسخروا نديروا المطالب تاعنا و نخرجوا في مسيرة سلمية هدا واش حابا مانحابا تغير لافوضى مثلا:
1- توفير مناصب شغل للشباب البطال دون استثناء
2- محاولة القضاء على مضاهر الفساد في البلاد كالرشوة و المحسوبية و غيرها
3- تغير بعض الوزراء كا أويحي و بن بوزيد
4- توفير السكن للأسر التي لاتملك منزل
5- تشديد المراقبة على الولاة و غيرهم على خاطر هوما ليفسدوا في البلاد
هدا راي و أنتم دبر راسكم لازم تنظيم مش كل واحد يغني على هوه و أني مديت مثال لا أكثر المطالب راهي ياسر و هادي و جهة نظري بصفتي خريجة جامعة و بطالة و لم أحصل على أي فرصة عمل حتى الكونكور مافوتش

qasseml2003 · 2011-01-30, 16:09

أختي...
أولا: موضوعك هذا كالمواضيع التي تتحثين عنها ... شبه خارج عن السياق

ثانيا: إذا أردت البحث عن مسابقات التوظيف ... فتجاهلي المواضيع التي تتحدثين عنها

ثالثا: أختي الكريمة .. لا يوجد جديد ... لا توجد مسابقات ... الله غالب ... كليكي على fermer ولا رجع للفايسبوك شاطي

رابعا: أختي الكريمة ... إخواني الكرام ... خليو الناس المظلومة والتي تحس بأنها مقهورة تعبر عن رأيها ... ربما حالكم أفضل من حالهم

خامسا: شكرا

yaya41 · 2011-01-30, 16:16

عابالي بلي موضوعي كالمواضيع الأخرى بصح حبيت نوضح الصورة أكثر و شكرا خويا على كل حال

Allaaa · 2011-01-30, 16:17

أنا قلتلكم نردوه منتدى فرغ قلبك