خربت بيتي بيدي ساعدووني

مجنونة بخيالي · 2010-08-13, 16:37

السلام عليكم

اخواتي في الله ضاق صدري ومنيش قادرة نتحمل وبغيت نخرج واش كان في قلبي راني محتاجة ليكم عاونوني وقولولي واش راح ندير
انا متزوجة عندي شهرو زوجي انسان خلوق ويحبني والحمدلله
كي زوجنا قعد معاي 15 يوم وسافر قالي بللي راح يروح بعد شهر
كان يعيطلي ديما في التيلفون نحكي معاه ومقاليش بللي راهو مروح
وقعدت سمانة في دار بابا ومنبعد رجعت لداري
البارح نضت من الرقاد رحت ديراكت فتحت النت من 8 نتاع الصباح حتى ل 4 نتاع العشية ومنكذبش عليكم حتى وجهي ماغسلتوش وحتى القش مغسلتوش والدار خامجة منين رحت لدارنا مادرتش ميناج لداري

قلت العشية وندير كلش نضت باش ندير الفطور وحتى شعري ماممشطوش والدار مهولة

طبطب الباب رحت باش نحل لقيتو راجلي روح

وماقاليش بللي راهو راح يروح اليوم

وانا حالتي حالة ريحة البصلة والثوم في و شعري مامشطوش القندورة خامجة وهو عمرو ماشافني هكا

ديما يشوفني قايمة بروحي وحتى هو من قبل كان يقولي نكره المرا اللي مش قايمة بروحها

المهم هو دخل وقاعد يشوف في حتى التسلام سلم تسليمة خفيفة يبان مهوش مصدق بللي انا هي مرطو ونقولكم الصح راجلي عمرو ماشافني بلا ماكياج منين زوجنا منحيتوش

المهم خليت الماكلة طيب ورحت للشامبرا على الاقل نمشط شعري

مشطت شعري مشطة خفيفة

بصح حالتي لازملها اومو وجافيل ومنعرف

ورحت نكمل الفطور

و وبعد كي وصل وقت الفطور حطيتلو الفطور وماهدر والو قعد ساكت

وحسيت بللي راهو يشنف علي غاضتني روحي رحت للشامبرا وقفلتها على روحي

زمان قعدت نسمع فيه يعيط خرجت قتلو واش كاين صمتني وهذي اول مرة يديرها

لقيتو يحوس على القش يبدل لقا قشو اللي خلاه كامل خامج وهو ناض قلق ومنبعد قعد يدور في الدار ويشوف الدربج وانا عييت وين راح نحط وجهي

جا عندي للشامبرا سقساني قالي واش كنتي ديري نهار كامل القش خليتو منين رحت ورجعت لقيتو مزالو خامج

قعدت انا نبدل في الموضوع ونقولو واش بيك تبدلت علي واش كاين

قالي لالا راني روحت غلبان ماتلومونيش

ومنبعد قربت انا ليه هو بعد علي وشنف علي

قالي اخطيني روحي نظفي روحك وارواحي

والله قاستني هاد الكلمة بزاف بكيت بكيت حتان شبعت

وغاضتني هاد الكلمة

ومابغاش يهدر معاي اليوم

قتلو اديني لدارنا قالي وجدي روحك بلا ماحاولني وزاد من الفوق قالي روحة بلا رجعة انا كنت حاسبة كي نقولو اديني يسقسيني وعلاش

المهم جابني هاد الصباح وراني درك في دار بابا

عييت نعيطلو مابغاش يهز علي

قلت لخوي يعيطلو كي عيطلو قالو منجيش ندي المرا اللي تقعد 24 ساعة في النت واقعد يشكي لخوي

دارنا ردو علي كلش

قولولي واش ندير

قعدت نبكي وقريب يخلصو دموعي

ومنبعد

اتخطفت وقلت في نفسي الحمدالله راني نتخيل ماشي صح

صح راجلي راهو مسافر ومزال مايرجعش علاهذيك راني نتخيل لوكان يصرا معاي هكا

تخيلو صرات معاكم انتوما قولولي واش راح ديرو؟؟؟؟؟؟؟

لكم من سيرينا اجمل تحية

القذافي999 · 2010-08-13, 16:45

قلقتيني

كنت راح نقلك أقطعي الكابل تع الانتارنات

الحمد لله

thorpe · 2010-08-13, 16:47

هههههههههههههههههههه
درتيها بيا وانا قاعد نخمم كيفاش نقدر نعاونك ههههههههههههههههههه بصحتك
موقف صعيب بزاف على الزوجة سيرتو اذا كانت جديدة كي حالتك والله حاجة صعيبة بزاف
المهم الحمد لله الي سلكت على خير
صح من بعد الفطور وصح رمضانك
سلام

بنت الحجاج · 2010-08-13, 16:48

خلعتيني يا اختي ...

حسبتك تهدري بالصح ....

باهي جمال · 2010-08-13, 16:50

كل هذا كان حلم
انت ذكية تفكرين في المشكلة قبل ان تقع
التوازن في كل شيء هو الحل

مصرية من الجزائر · 2010-08-13, 16:51

ياالله!
حقيقة رغم انني بعض الكلمات لم افهمها
ولكن خفت عليكي جداا
كنت هقلك أيضا
لا تدخلي النت مرة ثانية
زوجك أهم من كل شيء
وان شاء الله حبيبتي
لا يحدث معك اي شيء من هذا
رمضان مبارك حبيبتي

هبة الله اريج · 2010-08-13, 16:51

السلام عليكم
والله اختي اول مرة غظتيني
ههههههههههه مي الحق عليك مخليا دارك و قاعدة 24 ساعة عند النت
الله لا يفرق بيناتكم ان شاء الله ويا ربي يرجع بالسلامة
كي يجي قولي ليه يقرا هاد الموضوع
هههههههههه
صح فطورك

سومية1 · 2010-08-13, 16:53

و الله غيــــــر خلعتيني عندك واحد الخيـــــــــــال... صح فطوركـــ

صفاء · 2010-08-13, 16:54

أه يا ختي و الله طيحتيلي قلبي و غدتيني تاع صح
ؤبي يؤجعلك راجلك بالسلامة
بصحتك يا ختي خلاعتيني ................... بصح معليش المهم ما كانتش صح أه
عندك ما تنظفيش دارك ........ ههههههههههههههه
صح فطورك ختي

مجنونة بخيالي · 2010-08-13, 17:07

اقتباس:

المشاركة الأصلية كتبت بواسطة دريسي عبد الله

قلقتيني

كنت راح نقلك أقطعي الكابل تع الانتارنات

الحمد لله

غير الكابل منقدرش نقطعو
ان شاءلله متصراش يارب

مجنونة بخيالي · 2010-08-13, 17:11

اقتباس:

المشاركة الأصلية كتبت بواسطة بنت الحجاج

خلعتيني يا اختي ...

حسبتك تهدري بالصح ....

ماصراتش الحمدالله
بصح لازم ديما نديروالاحتياط
شكرا على مرورك

مجنونة بخيالي · 2010-08-13, 17:13

اقتباس:

المشاركة الأصلية كتبت بواسطة باهي جمال

كل هذا كان حلم
انت ذكية تفكرين في المشكلة قبل ان تقع
التوازن في كل شيء هو الحل

عندك حق التوازن في كل شيء هو الحل خاصة بالنسبة لوقتنا الحال ومع عصر التكنولوجيا
مشكور على ردك
مرورك زين الصفحة

مجنونة بخيالي · 2010-08-13, 17:15

اقتباس:

المشاركة الأصلية كتبت بواسطة مصرية من الجزائر

ياالله!
حقيقة رغم انني بعض الكلمات لم افهمها
ولكن خفت عليكي جداا
كنت هقلك أيضا
لا تدخلي النت مرة ثانية
زوجك أهم من كل شيء
وان شاء الله حبيبتي
لا يحدث معك اي شيء من هذا
رمضان مبارك حبيبتي

صح زوجي اهم من كل شيء
شكرا على كلامك الحلو اختي المصرية
رمضان مبارك وصحا فطورك
نورتي الصفحة

مجنونة بخيالي · 2010-08-13, 17:19

اقتباس:

المشاركة الأصلية كتبت بواسطة هبة الله اريج

السلام عليكم
والله اختي اول مرة غظتيني

ههههههههههه مي الحق عليك مخليا دارك و قاعدة 24 ساعة عند النت هذا منتدى الجلفة واش دار فينا
الله لا يفرق بيناتكم ان شاء الله ويا ربي يرجع بالسلامة امين يارب

كي يجي قولي ليه يقرا هاد الموضوع
هههههههههه
صح فطورك

ايه فكرتيني كي يجي نخليه يقرا الموضوع
قوليلي واش كنتي راح تنصحيني لوكان صرات صح؟؟؟
صحا فطورك حنونة
نورتي موضوعي يا حلوة

مجنونة بخيالي · 2010-08-13, 17:21

اقتباس:

المشاركة الأصلية كتبت بواسطة سومية1

و الله غيــــــر خلعتيني عندك واحد الخيـــــــــــال... صح فطوركـــ

متخلعيش لوكان صرات صح ماتلقاينيش هنا
صح فطورك
مشكورة على المرور العطر