عسكري مصري بسيط..

[قلم : داعية]

عسكري مصري بسيط ما فهمش في التخطيط
على معبر رفح محطوط أراقب الأسلاك
عيني ورا الأسلاك وروحي في غزة هناك
شايف ضلام دامس ورا كل شيش شباك
غزة يا نور عيني ظلمك على عيني
خدي من نور عيني بس البيوت تنقاد
عسكري مصري بسيط مافهمش في التخطيط
كل اللي بفهم فيه أنا برضه ليا ولاد
عسكري مصري بسيط بموت في مصر وناسها
واوهبها دمي وروحي وفلذة الأكباد
مافهمش آه في سياسة ولا حتى في الحسابات
قالولي خليك واقف وإن الوقوف دا جهاد
أصل الصهاينة هناك هيهاجموا لما تنام
هيفجروا في بلادك ويزرعوا الألغام
وشوية جالي اخواتي من غزة قالوا سلام
وقالولي عدينا بتأشيرة الإسلام
إزاي أقول لاه وأنا لسه فيا حياه
في أي شرع ودين معقول ياناس دا كلام ؟
سامحوني ماتظلمونيش وبلاش تزقوا الباب
بلاش ما تحرجونيش خلوا الغضب بحساب
يا أمي أنا غلبان يا أختي أنا إنسان
حاسس بطعم العار وبإني شخص جبان
عسكري مصري بسيط وزيي مصر بسيطة
مصر اللي هيا الناس في الحبس ليها زمان
مصر اللي هيا الحواري والزوايا والشقا
مش مصر اللي ع الشاشة في نشرة أو أفلام
على نن عين مصر في الضلمة غزة تبات
مصر اللي كانت الحضن في الخوف وفي الأزمات
على نن عين مصر غزة تموت م الجوع
نهار عيالها بكا وليل حريمها دموع
عسكري مصري بسيط مجبر أكون سجان
دمعي ورا الخوذة وقلبي فيه بركان
يا غزة أنا آسف ياغزة أنا عارف
لا دين ولا عروبة تقبل بدا الخذلان
هانت خلاص هانت ريحة الخلاص بانت
مهما الجراح كانت مهما الهوان كان
موعودة من ربنا بالنصر والتمكين
صبراً خلاص فجرك ونهاية السجان