شرشم

cerinecerine · 2013-12-30, 15:58

SALAM ALIKOM MAN YATINE RECETTE SHERSHEM DIROHA FI BISKRA AVEC LE BLE
SAHA
شرشم
r

mordia · 2013-12-30, 16:36

حنا نديرو المرقة كما البركوكس مع كثير من الفول اليابس وحمص منفخين...
لكن القمح نفخوه شوية ونفرشخوه بالمهراز حتى تنزع القشرة نتاعه ويطيب بسهولة ...لكن هده العملية واعرة قليل اللي يعرف لها...

أم ماجد · 2013-12-30, 19:48

كون عندي القمح في البيت كون درتولك الان اختي
احنا الشرشم تاعنا نديره كي ينبت الطفل الاسنان
نشمخوا القمح في الماء ليلة ونطيبوه في كوموت مع الحمص ونصفيوه فقط
تحوسي علة هذا او وصفة اخرى ؟

Kaito · 2013-12-30, 20:18

احنا الشرشم ت نديره كي ينبت الطفل الاسنان
نشمخوا القمح في الماء ليلة ونطيبوه في كوكوت مع الحمص +ملح ونصفيوه و نقدمه (هذا فى قسنطينة)

ام اناهيد · 2013-12-31, 09:19

حنا في بوسعادة نديروه في رأس العام نتاع لقبايل 11 يناير
نشمخو القمح وحدو والحمص وحدو والفول وحدو والبشنة اي المجبار وحدو وفي صباح نتاع 10 يناير
نحطو كل واحد يطيب على جهة وراهم يطولو ما يطيبو بلاك نهار كامل وكل ماينشفو زيدي عليهم الماء الساخن عندك تزيدي الماء بارد
وفي الاخير خلطيهم مع بعض وخليهم يغلو شوية ولوحي فيهم سنة نتاع ثوم ومتنسايس الملح ديريه في البداية نتاع الطياب واذا شفتيه مخصوص زيدي
وحنا نديروه باش نقول يجي العام زين

والدة طه · 2014-01-01, 14:15

حنا الشرشم نديروه كي ينبت الرضيع اول سن نشمخوه في الليل و الصباح نطيبوه مع الحمص و نوزعوه على الأحباب والجيران وعندي صديقتي يديرولو المرقة ويطيبوه فيها و يبوس شويه تاع الدقيق و يديرونه على شكل دوائر مبسطين و حطوهم فوق الشرشم و خليوهم حتى يطيبو

red lina · 2014-01-02, 22:08

انا اندير القمح يتشمخ ليلة كاملة ومن بعد انديرو في الكوكوت في ماء بارد لمدة نصف ساعة ومن بعد انحلها و انشوف اذا طاب و على الاغلب يكون مازال
في هاد الوقت انزيدلو الملح و نعاود انبلع اعليه حتى لوقت مايطيب انا نعرفو من الريحة اتاعو انت شوفي على حساب الماء لي درتيه
انا نخدمو بزاف في داري على خاطر راجلي يبغيه
و اذا بغيتي حطيلو اي اظفات مع الاخير حتى ايكون طايب في الاغلب يكلو زوجي وحدو ما نجي انحو من الكوكوت ايكون كمل نصو
وخطرات انديرو مع الروز في الماسيدوان يجي شباب

ندى خليل · 2014-01-05, 11:48

تاخذي القمح تنقيه و تشمخيه في الماء ليلة كاملة . و من بعد تطيبيه كيما البركوكوش يعني في مرقة حمراء مع اللحم و الفول و الحمص و زرودية مقطعة رقيقة و كليلة و الفرماس و حبات حلبة