الاخوة الكرام اريد مساعدة لوجه الله انا في حيرة من امري

omarza03 · 2013-02-16, 10:35

السلام عليكم ايها الاخوة والاخوات الكرام في هذا المنتدى العزيز عليا وهذا اول موضوع لي نظرا لحساسيت واهميته بالنسبة لي :
اما بعد خرجتلى لوردابيل باش نلحق نلبس مع العلم انوا عندي ملف طبي يعني عندي فتق يعني hernie وعلى بالي بلي رايحين يعفوني اون شاء الله لاخطراش من العام ليفات وانا طالع لورقلة لاريجيوا علما انني من الاغواط ديتلهم الملف الطبي نتاعي باش يديرولي لافيزيت مي ماحبوش لاخاطر مادرتش لافيزيت في وقتي لانوا في عمري الان 27 سنة ولكن قالولي راها كي تجيك لوردابيل في مارس لي فات ديلهم الدوسي او راهم ان شاء اله يعطولك العفومي راني من المارس لي فات وانا نستنا وزيد سبتمبر مابعثولي ما والوا قعدوا يتمسخروابيا مالا كنت نجيب في السورسي نتاع شهر نورمال لانوا عندي الحق باش نديه لاخطرش ماجاتشوردابيل مالا خرجتش ارجاء شاركت فيه في كونكور نتاع سوناطراك مع العلم عندي ديبلوم ماستر في autoumatique المفيد فوت التاست نورمال في الجزائر في حيدرة بصح لي راها محيرتي انوا انشاء اله راهم رايحين يعطولي في مارس باش نخدم وفي نفس الوقت راني مانيش مسوي وضعيتي وجات معا لوردابيل لي عندي فيها فرصة ان شاء الله باش ندي الاعفاء وفي نفس الوقت فرصة العمر كيما قالولي نتاع سوناطراك ملي فوتت التاست قالولي كي يعيطوللك في مارس ماتراتيهاش لانها كاين لي مسويين وضعيتهم او ما سحتلهمش باش يفوتوا تاست برك او راكم على بالكم رانا دزاير مع العلم راني بطال اومحتاج للخدمة ليو م خير من غدوا او راها على بالي بلي راهم ليجان ياسر كيما حالتي ربي يفرج عليا وعليهم وعلبالكم فا الكزارنا ليراني رايحلها ممكن بلاك نقعد شهر او عشرين يوم باش يطلقوك او ممكن والوا كلشي ممكن في دزاير هذه الفترة لي نكونا فيها في الكزيرنا ممكن يعيطولي سونطراك واش رايح نقلهم واش رايح ندير هذي ليراها محورتني مع العلم اني مولا دعاودي من الوالدين ربي يحفضهملي وانا طفل الوحيد في الدار والواد نتاعي راجل كبير والام نتاعي فيها مرض السكر والروماتيزم ماتقدرش تمشي وعندي خاوتي معوقين وشكوا لربي سبحانوا ورايح نصلي الصلاة الاستخارة وعلابالي كلش بيد ربي سبحانوا لي كاتبهانا رايح تجينا ولي ماهيش كاتبا لوكان نديروا واش نديروا مانقدروا نديرو والوا لانه سبحانه وتعالى اعلم بحالنا وفي الاخير نشر كل الاعضاء منتديات الجلفة بدون استثناء وارجوا ان تساعدونني ولو بنصيحة او دعاء لاخوكم لما فيه خير في الدنيا وجزاكم الله خيرا واصلح احوالكم واحوال المسلمين عامة والسلام عليكم ورحمة الله تعالى وبركاته.

libanarim · 2013-02-16, 13:17

السلام عليكم
ربي يفرج علينا وعليك خويا
لو أنت ضامن بنسبة كبيرة يعيطولك في سونطراك ، روح تخدم و من بعد اذا كتب ربي سبحانو تترسم في منصبك
روح افريها مع الميليتار
أما اذا ما عيطولكش ، ادي الملف الطبي وروح جيب الاعفاء نتاعك
المهم في مارس تفريها ، يا تدي الاعفاء يا تدي الخدمة
بالتوفيــــــــق

sinopointic4 · 2013-02-16, 16:51

يا ودي لخص شويا دوختنا
هههه
+
المهم ربي يعينك خويا
+
الكنكور متراطيش خو وكي يسقسوك قولهم راني منسي وراني دفعت دوسي
ونسنا برك في لاكارت تجيني
كي تشد بلاصة إن شاء الله وتحكمها ربي يدرلها طريق
+
إستمع لرأي الخبراء

omarza03 · 2013-02-16, 21:32

يعطيكم الصحة خاوتي على نصيحة اما بالنسبة للاختصار راني حاب نفرغ قلبي مع خاوتي برك هههههههه

* عبد الجليل * · 2013-02-17, 06:33

ربي يسهللكم ويسهلنا كامل ان شاء الله

جمال الدين الأفغاني · 2013-02-17, 16:17

السلام عليكم

مرحبا بالاخ عمار معاك اخوك جمال من الاغواط وراني كيما انت 27 سنة

والعسكر جايتني في الطريق واللي كاتبهالنا ربي سبحانو مرحبا بها الخير فيما اختاره الله

وكما قال لك الاخوة ما تراتيش الكونكور هو اولى كي تضمن بلاصك والكونترا تسنيا ساعتها

ربي يديرلها تاويل انت سعيت للخدمة وراك قريب تلحق ليها مالا ديرها هي الاولوية

والعسكر من بعد سهل الحال تقدر دير كونجي من الخدمة وتروح تسوي وضعيتك عادي

المهم ربي يسهلك ويفتح عليك والعقوبة للزاوج ان شاء الله ومادامك مدعي من الوالدين

ماكان علاه تقلق روحك رضى الله من رضاهم وهوما راضين عليك مالا تهنا وريح روحك

والله المستعان

omarza03 · 2013-02-17, 20:31

السلام عليكم الاخ جمال واش راها احوالك خويا وربي يعطيع الصحة على النصيحة ورياك تسكن بالاك نعود نعرف نتلاقاو اذا حبيت ابعثلي بوات اميل ولا نميرو تليفون نتصلو بعضانا اذا حبيت وشكرا لك الاخ ليلو جليلوا وربي يوفقك انت ايضا نشاء الله .

جمال الدين الأفغاني · 2013-02-17, 22:02

واشراك اخي عمار

انا نسكن في الواحات الشمالية وراني حاس بلي راني نعرفك ههه

ماكش تخدم في الادماج في الشبيبة والرياضة في ستاد ؟؟؟؟

اذا كنت كيما راني نظنك فانا اعرفك

omarza03 · 2013-02-18, 08:31

سلام جمال انا ثاني نسكن في الوحات الشمالية عند السوق نتاع بكري والوا داير ادماج عند مقاول وراه بقيلي شهر باش تكمل العامين علابيها راني نخمم واش ندير بالاك نعود شايفك سور وشايفني ياك راك عارف لقواط قا صقيرة وناس قع تعرف بعضاها ههههههه صح ولا راني قالط.