يدور الزمان - بالعامية-

[الحسيني]

يدور الزمان وتتصرم الايام
وانايا راني في مْكاني حابس
نلوم الدْهر ونقول زماني ظلام
وجبيني مقطوب وْ بصْري عابس
لكن راني نشوف مانيشي خدام
واقراني على الخير والبر تتنافس
بين ضلوعي راهي شاعلة نيران
ومن نيل المطلوب دايما نتوجس
****************************
علاش عليك الخوف من غدر الايام
ورحْمة مولانا عْظيمة لا تيأس
هذا الشوك اللي راكْ تْراه اليوم
وهذا الغيم اللي في سْمانا حابس
لازم ييجي نهار تتبدد لهْموم
وتتبدل الاشواك بورد ونرجس
علاش راك تلوم الدنيا و تقول
من الخير في الدنيا أنايا آيس
عمر الخير زْمان في الدنيا مأمول
ياويح الجهول بحْياتو تاعس
ربي راه اعطاك من زين الصفات
وافضاله علـيك بيها تتبرنس
علم وعقل وعافيه والكلمــــــات
وقلب يحب الخير على الحب متأسس