ثقافة_التبليغ

[محمد علي 12]

ثقافة_التبليغ
أنت كي تبلغ على بائع المخدرات والحبوب المهلوسة والخمور وكذلك تبلغ على مرتكبي الجرائم والمعتدين والسارقين
صدقني فأنت لا تعتبر لا بياع ولا قوا.د ولا حاب تباصي ولاد الناس بل بالعكس أنت تحمي أهلك وأولادك وجيرانك.
أنت تساهم في نشر الأمن والسلام في محيطك أنت إنسان واعي و تفكيرك سليم ، أنت تقوم بما يمليه عليك دينك وضميرك ، بالعكس أنت كي ما تبلغش على هذاك الإنسان المجرم اليوم يعتدي على جارك غدوة تلحق دالتك ، غدوة هذاك بائع المخدرات لي ما تبلغش عليه بحكم أنه غاضك و ماشي حاب تباصيه ولا تبكيلو والديه...
هذاك الشخص بالذات غدوة يبكيك أنت كي يدخل ولدك ولا خوك في متاهات المخدرات. ثقافة_التبليغ هي السبيل الوحيد باش نقيو المحيط تاعنا من الخماج لي طغى علينا ، بصراحة الأمن ما يقدروش وحدهم يحاربو هذي الظاهرة إذا كان المواطن يتستر على المجرمين..التبليغ واجب وطني وديني ، ماشي لازم تبين روحك بلغ في السر وأحمي روحك وعائلتك ، كذلك الشرطة لازم يحفظو إسم لي يبلغ إذا حابين صح يحاربوا هذي الظاهرة فمن غير المعقول أن هذاك المجرم يعرف شكون لي بلغ عليه وهنا المسؤولية راح تكون على الأمن ،
الكلام هذا علابالنا ما راحش يعجب الناس لي راهم في الميليو ولكن الله غالب سلامتنا وسلامة أهلنا و أولادنا أولى منكم لأنكم ما حبيتوش تحشموا و طغيتوا علينا ، لوكان راكم تبيعو زبلكم في الغابة مكاش لي يبرونشيلكم لكن نتوما جبتولنا المرض تاعكم لباب الدار