انصحوني لوجه الله الوسواس من جهة و زوجي من جهة

[مشكلتي]

السلام عليكم و رحمة الله تعالى و بركاته
اخواني اخواتي ارجو من كا من يقرا مشكلتي ينصحني لوجه الله و يدعيلي
انا شابة تعرفت على شاب قبل سنوات كانت بيننا حب و رحمة و احترام خطبني هذا الشاب و الحمد لله كان كل شيئ بخير يعاملني احسن معاملة يحبني يخاف عليا و يحترمني يتصل يي كل دقيقة يهتم بي .. الخ
قبل 3 سنوات عمل حادث و في ذلك الحادث خسر كل امواله و اضطر للبداية من الصفر قدرت ظروفه وقفت معه شاءت الاقدار ان يجد رزق ماله خارج الولاية يعني بعيد على ولايتنا
وهنا بدا المشكل
قبل هذا زوجي هو الابن الاكبر تحمل مسؤولية كل شيئ باعتبار ابوه عصبي متحكم وواعر بزاف يعني مسيطر و قد ما نحكي ما نوصفش يعني زوجي كان عايش تحت ضغوطات والده
المهم كي بدل العمل رجع يعمل عند واحد و مع مجموعة من الرجال اصبحت عقليته مثلهم
اصبح لا يهتم بي
بعد هذا الحمد لله تزوجنا عندنا سنة و نصف زواج و راني بالحمل
زوجي يجي كل 15 يوم
وانا حكمني وسواس قهري من جهته كل دقيقة نتصل بيه نعمله ضغوطات لا ابالس اذا كان يعمل او مشغول او مع الرجال المهم اتصل في كل وقت حتى صار الهاتف مشكل بيننا و عملنا بزاف مشاكل رجع يقولي كرهتيلي حياتي ف التلفون و نستعرف انا صح كرهتلو حياتو ف التلفون
كي يجي للبيت يعاملني احسن معاملة يحطني فوق راسو ما يعز عليا والو ويساعفني بزاف
و كي يروح يخدم يولي مقلق و يقرغ زعافو كامل فيا
وانا رجعت ندير حوايج تافهين و يقلقوه و نستعرف لوكان راجل اخر راه طلقني و هنا راسو
مانعرف نحكي معاه دايما التوسويس مسيطر على كلامي مايعيطليش نقولو كرهتني وراك تخدع فيا ما يبعتليش في المواقع الاجتماعية نقوله راك لاتي تكونيكتي مع كاش وحدة
اصبح الشك مسيطر عليا
حياتي رجعت ظلمة وواحد ماراه فاهم الوضعية ديالي
ومؤخرا اكتشفت انه اصبح يتعاطى
و اول مرة نشوف دموع الزوج ديالي خاصة كي قالي بلي رجعت نتعاطى بسبتك نتي باش ننسا مشاكل دارنا ومشاكلك تزوجتك تنحي عليا زدتي عليا لوكان تفرج عليا اول واحد نحطه فوق راسي انتي بصح مراكيش واقفة معايا كامل راكي تزيديلي و دايما يهدر على الانتحار يقولي نخمم نسويسيدي و نهمل
نستعرف صح راني غالطة انا من جهة بيته من جهة الديون المتراكمة من جهة و ضغط العمل بصح هو تان راه غالط في حقي راه هاملني و كي نقولو علاه متعيطش يقولي مراكيش تخليلي وقت كل دقيقة تعيطيلي
منقدرش نتخلى عليه وهو في هاذ الظروف كان معايا راجل وعمل المستحيل باش تزوجنا ومنيش قادرة نحمل حاسة روحي راح نهبل
تعيشو انصحوني لوجه الله منيش حابة نخسر بيتي و زوجي خاصة بقالي شهر على الولادة
حاسة كل يوم زوجي يبعد عليا بعد ماطان يعشقني و الوسواس راح يؤدي بيا للانتحار
ونتمنى متجرحونيش بكلامكم
و عندي طلب لاخواني الرجال لي راح يقراو مشكلتي تعيشو قولولي اذا الرجل كي يكون يحب وحدة و يضمنها ينقص الهدرة فالتلفون

[هـــدوء]

السيد راه يتعاطى و عندو ميول انتحارية و نتي قاعدة تعسي فيه مع من يحكي و كيفاه يهتم بيك؟؟؟
يا الأخت نظمي أولوياتك و عالجي من الأهم للمهم... هذا إذا كان صح مقصر.
تعاطي زوجك مافيهش خطر عليه برك راه فيه خطر عليك نتي ثاني و على أي إنسان يدور بيه.
ماذابيك أول حاجة ديروها مع بعض هي السعي في علاجه و التأكد من ذلك.
و باش السيد يقدر يتعالج راه لازمو دعم معنوي و مادي ماشي ذبابة طنانة تزيد عليه.
كي يتعالج و يولي إنسان طبيعي, ساعة هذيك ديري جلسة حوارية معاه على وش خصك.
و إذا ما حبش يتعالج و بقى يتعاطى هزي كابتك و روحي لدار باباك و قلبي صفحة جديدة.

[عزيف]

ابحثي عن علاج لوساوس الشك* اولا وبشكل مستعجل ثم حاولي انقاذ زوجك من هذا المستنقع....... العودة الى الله هي اول الخطوات.... فما اصابكم جميعا لم يأت الا من بعدكم عنه....... فتسلط عليك بالوسوسة وعليه بالمعصية*
فرج الله همكما وهداكما الى صراط سوي* ورزقكما العافية*

[نُـون]

سلام ورحمة
إذا شككت أنه تغير تأكدي أنه فعلا تغير!
مما يعني أن هناك أخرى أو أخريات!
خسارته أمواله كانت بسبب تعاطيه المخدرات أو الخمر أو كلاهما!
أصدقاء السوء يفعلون أكثر من ذلك وكلما سحبوه حولوه لأسوأ من ذلك!
الوسواس ليس وسواسا ولكن حقيقة تحاولين مداراتها!
كلما شعر الانسان بالانحدار اعتقد
أن الهوة هي الخلاص!

____

لنتصور أن ما قلته أعلاه هو الحقيقة
ما الذي يمكنك فعله حيال ذلك؟
مواصلة الصراخ!
حياتك ستصبح في خطر أيضا!
لا أدري هل تستطيع امرأة مراقبة زوجها!؟
لا أظن أن ذلك ممكنا ولكن بمقدورها معرفة إن كانت هناك أخرى فعلا!
ولكن أظن أنه يمكن تدارك بعض الأمور
أن تنتقلي للعيش معه حيث يعمل.
ومحاولة كف الأذى عنه (امساك اللسان) احترامه
تصديقه فيما يقول شكليا وإن لم يكن ضمنيا
العمل على خلق جو مناسب للحوار
نسيت .. الحمل يؤثر على نفسية المرأة وصحتها
ضعي ذلك في الحسبان أيضا
وربي يوفق

[تاج الوقار16]

ضغوطات الحمل عليك
بالاك كي تولدي ونقص وبالاك تدخلي في اكتئاب
الحياة الزوجية ماشي ساهلة ومع لولاد صعيبة
حاولي تبسطيها
كون راجلك يخونك ممكن عايش معاك وما تفيقيش
بعدو ماشي سبب للخيانة
وزيد انت روحي عالجي على الوسواس
ما تنسي راح تولي ام وتختلف أولوياتك
تولي مشغولة بزاف
جربي الرقية ممكن تفيدك
يا اختي الزواج باش زوج يتعاونو على الحياة
ربما راجلك مضغوط ما تكونيش سبب في تعاسة
ربي يفرج عليك ويسر والدتك
ويهديك للصواب
احمدي ربي راجلك راه يتعب ويخدم
نسا راهم يخدمو ورجالهم قاعدين

[yassefe]

حاولي متزيديش علي راجلك لي فيه يكفيه وهي مجرد وسواس صدقيني لوكان راجلك من نوع الخائن سيخونك حتي لو كان معك كل يوم

بالفعل يكره من حديت الهاتف كل دقيقة وكل ساعة ...... عيطي في اوقات مناسبة وكي تعيطي اعرفي واش تهدري موش تبداي تلومي فيه وتشككي فيه معامن تحكي وواش قاعد دير لاتحاولي السيطرة عليه الراجل يحب يرتح كي يخلص من الخدمة ولازم يلقي الجو الملائم موش مع يوصل للدار تبداي تشكي ووووووو

[نون.]

اختي اول حاجة هذا وسوس اقري سورة البقرة يومي تقضي على واسوس وبعد شوفي

[didoinps]

الله يهديك هذا واش نقولك نهار ينتحر تولي تندبي تهلي في راجلك و الزمي الصمت الايجابي

[المانجيكيو]

سلام طيب ..

أختي الكريمة ..
لكل [ تصرفات و سلوكيات ] أسباب نفسية - كما يسرد لنا علماء و أطباء نفسانيون -

و مشكلتك هذه لديها [ عدة تفسيرات ] ..
انصحك بكتاب رائع جدا - إن كنت من المهتمين و الشغوفين بالمطالعة -

عنوان الكتاب : لماذا من حولك أغبياء ؟ دليلك الشخصي لخلق تواصل فعال مع من لا يفهمونك / للدكتور : شريف عرفة
إليك رابط تحميل الكتاب بصيغة pdf - تسهيلا عليك - : https://www.saaid.net/book/21/15287.pdf

و إن كنت تفضلينه [ مسموعا ] - فهو كذلك متوفر بشكل كتاب مسموع عبر يوتيوب -

و أقول بخصوص استفسارك :

اطمئني فزوجك يبدو من النوع الطيب و أراه مخلصا لك و لا أرى - من منظوري - ما يدعوك لكل تلك الحساسية و الوسوسة ..
و عصبية زوجك غالبا - هي سمة موروثة عن والده العصبي - ناهيك أيضا عن ضغوط العمل و حتى الضغوط التي تحمّلينه إياها ..

فهو بالطبع بحاجة الى أن يزيل عن نفسه بعض الحمل / لذلك يلجأ قهريا الى اتباع ذلك الأسلوب / و نيته سليمة تماما ..
بل لعله يراك سنده الوحيد // لذلك كوني داعمة له اكثر / ولا تثقلي عليه بالاتصالات و اثارة الشكوك و زعزعة الثقة بينكما ..

و كان الله لكما مرشدا و معينا.

.
.