الوقت راهو يجري

[مشكلتي]

السلام عليكم
انا طالبة جامعية، مشكلتي تكمن في سرعة انقضاء ايامي.. بطريقة غريبة ..اصبحت في صراع مع الوقت ..نشفى على روحي نضت الصباح نصلي الصبح نفيق نلقى روحي نوجد باه نرقد وطاح الليل..الساعات تتطاير .. مثلا انا نروح للجامعة غير العشية( Tp..Td) يعني من 12 الى 4 تقريبا مع اخذ وقت الحافلة .... كي نروح من الجامعة الساعات منعرفش وين تضيعلي.. احيانا تمضي ايام مندير فيها والو .. صح والو .. ايام ضائعة من عمري رايحة هكاك.. وانا هنا لا اتحدث عن الدراسة والمراجعة فقط..لا .. انا اتحدث عن كل شيء : العلاقات الاسرية / الاجتماعية / وحتى باه نثقف روحي دينيا وشرعيا .. بالكاد في النهار اجد وقت لقراءة صفحات القران او حتى الجلوس مع اسرتي.. الوقت طاير .. حتى كي نطيب الغداء والعشاء تلقاني عين على الماكلة وعين على صفحة كتاب ولابوليكوب ،، والصلوات وراء بعضا احيانا نتوسوس نصلي الظهر نبقى فترة صغيرة خلاص نسمع اذان العصر وهكذا.. المشكلة المفروض استغل وقتي جيدا.. لكن صدقا احيانا تمضي ايام وانا ثابتة في مكاني واحدق في سرعة الايام.. في حين كاين الناس وطلبة ( الله يبارك وماشاء الله ) اللي نديرو انا في شهر يديروه هوما في سمانة -و اللي نديرو انا في 4 ايام يدروه هوما في يوم واحد فقط.. الله يبارك يعني كل يوم يكفيهم ويفضى ويخدموا فيه قداه من خدمة... قادر يقولي واحد راهي (( البركة في الوقت )) هيه قريت قداه من موضوع ونصائح ليبارك لنا الله في وقتنا ... لكن يا خاوتي بلا جدوى والله... الاسبوع يجري وراء اسبوع....وانا ...
اتمنى ان تظهروا هذه المشكلة راهي قلقتني نفسيا واصبحت اقارن يومي بايام الاخرين واتحسر على كل دقيقة اضيعها بعدها اندم.. وكل يوم هكذا..
واتمنى ان يرد علي واحد من جماعة تاع في نهار واحد يدير قداه من حاجة ويكفيه الوقت ويفضى وساكون ممتنة
جزاك الله خيرا