عفسة رائعة للنسيان و اخرى للتحفيز ، 😏

الاسكندر الاكبر · 2018-11-10, 00:24

السلام عليكم ، علابالي رانا كامل في ضغط ، ، التاخر العجيب ، و تاع القسم راهم فايتينك بوحدة وديت تحت المعدل في الفيزياء او العلوم او..، ، مكش فاهم الكهرباء و مدرستش دوال لوغاريتمية ، و خايف من العلوم و النصوص العلمية و الوضعيات الادماجية تاع المناعة و. و . و

رغم اني لست فعليا و دون مبالغة في حالة جيدة نفسيا و كذلك انتم ، الا انه و انا اطبقها هنا في المنتدى و هي فعالة ، اذا ساعدت شخصا ما ستشعر بالسعادة حقا حقا ، لذا ها انا اكتب لكم آخر ما توصلت اليه من جانب التنظيم

، ما يجي خلص الباك نكون كتبت كتاب على مساراتي و محاولاتي الانهائية لاكتشاف الاكسير السحري للتنظيم ، فعلا مهمة واعرة كثر من دراسة دالة مثلثية و ناطقة في نفس الوقت هه

اولا النسيان :

ببساطة اكتشفت ، اني منيش مجبر نتعب مخي و ننذكر كلش او بالاحرى منيش مجبر اني نشفا على اي حاجة لازم نديرها انا مطالب برك اني نشفا على القواعد و الدروس و..

خديت كراس ، و شريط لاصق ورقي (هاداك الاصفر) ، لانو نظيف و لا يترك اثر ،
الرياضيات ،
ورقة كتبت فيها الدوال العددية ، كتبت في ثلاث اسطر ، * مسائل دالة صماء
* مسائل دالة قيمة مطلقة
*مسائل دالة ناطقة

و في الاسفل كتبت اسماء الكتب ، كيما الكتاب المدرسي ،المغني ، المراجعة النهائية

و اسماء السلاسل ، مثل الاستاذ زروقي و مباركي وو (تلقاوهم في غوغل)

ورقة اخرى ، خصصتها لتمارين الكتاب المدرسي ، اللي ملاح بزااف و لازمني نحلهم (كتبتهم على شكل مجالات باش تكفي الورقة ، من تمرين كذا الى كذا صفحة كذا )

ورق خصصتها لدالة الاسية ، مثلا تتخلطلي النهايات الشهيرة لازمني نتدرب عليهم ، لازمني نشوف فيديوهات الاستاذ نور الدين تاع حساب نهاية دالة اسية و معاهم تاع التبسيط ، مثلا منعرفشالمناقشة البيانية تاع الدالة الاسية ...

كتبت فيها النقائص ، اما السلاسل و الكتب فهي نفسها في الورقة السابقة

الفيزياء :

ورقة واحدة تكفي ، تكتب فيها نقائصك المهمة (مالازمش تعمم مثلا انا ناقص في الوحدة الفلانية لا بل مثلا مفهمتشالعنصر تاع الحصيلة الطاقوية ، منعرفش هاذ النوع من الاسئلة و هكذا

مثال يتخلطولي معادلات الجسيمات بيطا و غاما و الفا ، مثال مازالني ناقص في قراءة منحنى استون ، ... )

و ايضا جزء من الورقة يكون فيه التمارين اللي لازم تحلهم، مثلا التمارين كذا و كذا من الكتاب المدرسي ، مثلا تمارين المغني ، سلسلة ليكور

العلوم

مثلا علق على ورقتك :
* النصوع العلمية في الترجمة الاستنساخ مننساهمش

* التدرب على الرسومات التخطيطية تاع الوحدة الاولى

* مننساش نكمل الملخص تاع الانزيمات

* مننساش نطل على الاسئلة الشائعة في زوج الوحدات الاولين
* لازم نحل من سلسة الاستاذ بوريش ، و الكتاب المدرسي

و هكذا

مثلا علق وريقة صغيرة ، اكتب فيها زوج ارقام حابهم يكونوا علامتك في الفرض الثاني تاع العلوم او تاع الفيزياء ، و كن عقلانيا ، مثلا 15 16 17.5 كاقصى تقدير ، (متحطش عشرين )

علقها في مكان دراستك ،

هناك شيئ آخر ، غير مكان دراستك كل اسبوعين ، اذا استطعت راح تشعر بالتجديد و تكسر الملل ، ليس شرط مكان جديد مثلا عندك زوج اماكن في البيت تقدر تقرا فيهم كل اسبوعين انتقل الى احدهما (ابن بطوطة )

التحفيز الآن :

نعلم ان التحفيز الرئيسي الذي يجب ان يحركنا هو تخيل فرحة والدينا الكريمين اولا ، و تخصصك الجامعي الذي تريده ثانيا ، لكن:

الم تلاحظوا اننا فعلا لا نشعر بالخطر الحقيقي للباكالوريا لاننا لازلنا بعيدين عنه ، قليلا! ، مازال متضغطناش تاع الصح ،لهذا مناش نجبدوا و نحلوا تمارين بهديك الجدية المطلوبة للمعدلات اللي نريدوها ، لكن مادخل هذا ؟

حسنا دعني اشرح ، نفس الشيء تماما ، فرحتهما بالمعدل و تخصصنا الجامعي لازال ايضا بعيدا قليللا (7 اشهر)

اذا لابد من محفز يكون اكثر قربا منا (من ناحية الزمن)

حسنا ، اليك الخطة ، انتِ و أنتَ ، تحبون الملهيات كثيرا ، لحظة ، لا تفهما مواقع التواصل ، فالملهيات هنا ، ماكنت تحبه فعله حقا سابقا

و معظكم كان يحب الكتب ، افلام الخيال العلمي و الفيزياء ،(مثلي) مثلا ، يحب دارنا شو

يحب لعب كرة القدم بشدة ، يحب مشاهدتها بشدة ، تحبين الروايات بشدة ، و بما ان الفيديوهات التحفيزية و المواضيع التحفيزية هنا خطة فاشلة تعطيك في هادوك الخمس دقائق بعد قرائتك للتحفيز او مشاهدتك له ، جرعة كبيرة هائلة ، و تزول بعده دقائق مخلفة فشل نفسي و كآبة ان صح العبير ، (و علابالي يصح)

و عليه ، نحن لم نستسلم بعد ، و عرفنا انو لازمنا محفز متجدد ..

حسنا اليكم الخطة يا محاربين ، بما انها لم تعد حرب تمارين و اسلحة و اللي يفهم و اللي يحل و.، بل اصبحت حربا داخلية مدمرة ، فنحن لها :

سنستغل كل ما سبق لصالحنا
اظنك فهمت

بحثت عن مشكلة التحفيز و القنوط اثناء الدراسة و وجدت مقالا يقول ، اتريد ان تحفَّز للدراسة و تتفوق ، اذن عليك ان تكافئ نفسك
معناه :

مثلا راك متاخر ، تاع القسم دخلوا المناعة و نتا مازالك محليتش تمارين على انزيمات ، ولا مثلا اليوم لازمك تحفظ الزوج دروس تاع التاريخ باش ميتراكموش و تحل معاهم مسائل في الدالة الاسية

و انتِ و انتَ نفسيا ماكش قادر تحل ، راك تشوف في هاذ المهام كالجبال ، تشوف فيهم غول ههه

اذن عليك بوضع مكافئة لك اذا اسطعت انجاز تلك المهام
تحذير ،

على قد المهام تكون المكافؤة ، مشي تحفظلي زوج دروس تاريخ ، تديها عشية كاملة و انتي و انت مستريح و نائم لا!

حسنا بالمثال يفهم المقال

قال اليوم السبت ، لازمني نحفظ التاريخ كامل معا المصطلحات (نعلم انو كاين ليكور) و نحل 10 تمارين نووي و اذا قدرت 3 مسائل دالة اسية

و في نهاية اليوم راح تكون مكافئتي ....
ضع مت تشتهيه نفسك حقا مثلا ، ان تشاهد انمي تحبه كثيرا ، ان تقرا جزءا من الرواية التي كنت قد بداتها و لاسباب اعلمها و تعلمها لم تكملها

ان تشاهد الفلم الذي طالما اردت ان تشاهده ، ان تخرج لتلعب كرة القدم او تلعب مع اختك او اخيك في المنزل و تمرحوا معا

ان تناااام ههه

لكن تذكر لازم تحس روحك صح تعبت فعلا ، لاجل المكافؤة و صدقني ستنجز المهمة مهما كانت لانك تعلم ان هناك مكافؤة لذلك

ان رايت ان الطريقة غريبة صدقني جرب لن تخسر شيئت

لكن تذكر ، لازم يكون تعبك= او يستحق تلك المكافؤة ، جرب لن تخسر شيئا

اخبروني ما رايكم ،

bis kou · 2018-11-10, 12:18

السلام عليكم
بكل صراحة لم اتوقع ان يكون هكذا التحضير للبكالوريا صراحة خاب ظني
إنها ليست المعركة الساخنة التي عهدنا ان نجتازها دون استسلام ودون كسل ولكن ااااااااه اااااااه
اظن ان برنامج الليالي البيضاء سيبدأ من الآن فلم أعد احتمل المماطلة والجو السلبي كرهت منه!!

لم اعد احتمل يا جماعة الأمر لم يعد يطاق !! أهكذا خنا اهدافنا وما كنا مبرمجين انفسنا عليه ؟؟ ان نشعل النار ونشعل التنافس فيما بيننا اهكذا اهكذا ؟؟؟ !!

من اليوم فصاعدا لن أسامح أي شخص يتعمد بعث السلبية في نفوس الآخرين ويسعى لتثبيطهم
يا جماعة يلا نستحملوا ألم اليوم باش ميتضاعفش ممبعد
يا جماعة والله مهي كيما قراية ولا عزيمة هذو كلو خداع لانفسنا

لكن......فلنجعل من كسورنا وبعثراتنا الى لوحات فنية
فلنضف الحطب للنار لنشتعل
فلنتحمل الام اليوم افضل من نتالم على خسارة هذا الوقت الثمين
نحن لها وأقولها مرة أخرى .........نحن لها

قد يكون تأخرنا عن السباق حتى ننطلق من جديد انطلاقة قوية اخرى وتبا لمن يخاف هذا السباق
اما الآن ......فلنستجمع قوانا ولنقف من جديد

وبدون اي حسد ولا حاجة يا جماعة يلا نبعثو جو التنافس بيناتنا ونشوفو رواحنا فاه رانا لاحقين (يلا نحاولو قدر الامكان تعويض الكوارث)

والام من ذلك يا جماعة نتعلمو اننا نديرو اليد في اليد وندعو لبعضانا وانفعلها فلنحقق المستحيل ما دام الله معنا

من يوافق فليتفضل وتبا للجبان من يعترض

نحن لها

!!we can do it

الاسكندر الاكبر · 2018-11-10, 12:39

نعم القول ، نعم كرهت انا من جو الشكوى لذا اتيت بحلول عملين للنسيان و اخرى لتحفيز النفس

ملزمناش نقعدوا نشكو من العلامات الكارثية و التاخر
،
طحنا و راح نوضو و راح نزيدو نطيحو ...

رانا متاخرين و العام كامل راح نبقاو نعانيو من هاذ المشكل فبلاما نبقاو نعاودو في الشكوى ، لان هذه المعوقات لن تبتعد عنا

نعم ، نقدرولها ، و مزال الفصل الاول قدامنا و مزال الفروض و راح نعوضو و متنساوش المهم راه في الاختبارات ، و راح جيبوا معدلات مليحة الفصل الاول اذا قدرتوا جيبوا 15_16 راكم هااااايلين و قمة

نزيروا روحنا و نبركاو من التمسخير تاع راني متاخر و علاماتي كاارثية ، بل سنبقى كل فصل نواجهو علامات مليحة و علامات كاارثية ماراحش نتخلصوا منها لان هذا ما يسمى بالمعوِّقات ،

محاربوا بكالوريا 2019 ،

bis kou · 2018-11-10, 12:48

احسنت القول

حسنا المنافسة ستشتعل من هنا
قبل نهاية الاسبوع اتحداك بحفظ 5 مصطلحات تاريخ وجغرافيا + 5 شخصيات

5تمارين كهرباء (ونظن نحل في النووي بسكو بديت ننسى شوي)

5تمارين مناعة + مراجعة للوحدة الولى مع حل تمارين ان امكن
والرياضيات بحل 3مسائل اسية ولوغريتم للاستاذ مصطفاي

يوم الخميس سنرى مدى التقدم ايها المحارب (ومرحبا بأي عضو )

يوم الخميس سنتناقش أما الآن دعواتكم لي عندي فرض غدوة في الرياضيات

ربي يسهل

وبالتوفيق للجميع

mehdidada · 2018-11-10, 12:48

مشكور على المجهود

* آناء الليل * · 2018-11-10, 16:21

اقتباس:

المشاركة الأصلية كتبت بواسطة bis kou

احسنت القول

حسنا المنافسة ستشتعل من هنا
قبل نهاية الاسبوع اتحداك بحفظ 5 مصطلحات تاريخ وجغرافيا + 5 شخصيات

5تمارين كهرباء (ونظن نحل في النووي بسكو بديت ننسى شوي)

5تمارين مناعة + مراجعة للوحدة الولى مع حل تمارين ان امكن
والرياضيات بحل 3مسائل اسية ولوغريتم للاستاذ مصطفاي

يوم الخميس سنرى مدى التقدم ايها المحارب (ومرحبا بأي عضو )

يوم الخميس سنتناقش أما الآن دعواتكم لي عندي فرض غدوة في الرياضيات

ربي يسهل

وبالتوفيق للجميع

نفس التحدي
ملتقانا يوم الخميس ان شاء الله