اين نجدها له تلك الزوجة

[مشكلتي]

اهلا بكم اخواني اخواتي حاب نسالكم بخصوص موضوع زواج شقيقي الصغير حبينا نزوجوه وطبعا خصوصا انو والدتي ووالدي ربي يحفضهم راهم في حالة جد حرجة امي عندها مرض تقريبا عقلي للاسف وهي تعاني من اختلالات عقلية وعايشة في عالم اخر عندها مرض من زمان وهو انها عايشة في الخيال الخاص بها ومؤخرا حوالي عام مع التقدم في السن والعمر حالتها تدهور اتمني ان الله يشافيها لانو حرنا فيها قلنا ليها روحي عالجي ماتحبش للاسف امي من نوع ماتحبش تتهلي ابدا في نفسها سادجة للغاية ونية كثير المهم خويا راه بقي وحدو وهو يعمل عند روحو كان يعمل في شركة خاصة وشركة حبسو حبسوه من داك منصب هو تقني سامي في الصيانة اجهزة الحاسوب والبرمجة والان فتح محل عندو مدة قصيرة اي تجارة والحمد لله هو انسان والله عاقل بزاف بزاف ومن خدمة للدار ومايخالطش صراحة ويحشم وحبينا نشوفولو وحدة لكن هو نوع معقد شوية يحبها ولازم تاع دار ودار فقط ويكون مستواها المهم تكون حتي ثالثة ثانوي او باك فقط وماتكونش وحدة لي خدمت يعني لي خرجت من مدرسة وريحت في دار او حتي لي عملت وخدمت يشترط عليها شرط اول تريح في الدار للرعاية اولا به وباولاده والمنزل وطبعا الوالدين لتتكفل بيهم ونضن كاين بنات من هدا نوع اكيد لي ماتعملش وقاعدة في الدار فقط للعلم عندنا احد من العائلة مقرب جدا راح يتزوج بوحدة من نفس منطقة تقريبا وهي ماكثة من بكري في الدار وشفناها لاباس بيها ومتخلقة وعاقلة ومن عائلة بسيطة
سؤالي ون نروحو نشوفولو وحدة بمثل هاته المواصفات اين ندهل اماكن واحد لي يروح ليهم باش يخطب

[زبدة ذايبة]

تلقاوها في البيوت البسيطة

والبيوت اللي عندهم بزاف لبنات وماتزوجوش.

والبيوت اللي بناتهم متوسطات الجمال.

بالوضع اللي حكيتي عليه ماتقدر عليه غير وحدة ظروفها صعبة نوعا ما.

وتكون حياتها بسيطة.

ويكون كل همها هو تأسيس أسرة

بالتالي يا أختي حاولي يكون توجهك بسيط.

ومايكونش مرتكز على البحث عن شروط صعبة أو متناقضة.

هذا رأيي وممكن الأعضاء يعطوك أفكار أخرى

[toulay]

السلام عليكم
ربي يفرج عليكم ان شاء الله
بالتوفيق

[مراد سابقا10]

انا عندي رد عليك في قضية لازم العروس تهز والديك المرضى بصراحة هذا شرط تعسفي ان تشترطوا على الزوجة ذلك فهي تزوجت لتقيم مع زوجها حياتها وليست لخدمة الأباء

[nihal159]

الحل موجود في مشكلتك؛ قلتي أنو قريبك تزوّج بواحدة بنفص الشروط لي شرطهم خوك؛ إذا الحل بسيط؛ شوفولو أخت لعروسة أو قريباتها؛ أكيت تلقاو فيهم نفس المواصفات.

[ورود عطرة]

لازم تسمحو شوي في حقوقكم الوغ تسمحو في الجمال مثلا

[محارب الحمق]

خوك ماهوش معقد خوك راجل ونص. قوليلو ينقص برك من شرط الجمال وبربي يلقى بالعرام. هناك الكثيرات من متوسطات الجمال القانعات المتدينات العفيفات بنات العايلة. أما إن كانت عينه كبيرة كيما حالتي ماشكيتش رايحين تلقاوها.

[visa uk]

شفت مشكلتك اختي انتي ربما وشقيقك او انتم وشقيقكم طبعا مختلفين تماما في العقلية والتفكير وطريقة العيش وانتي تعرفين احسن من شقيقك انا فهمت نواياه وتفكيرو كما كاين بنات تاع مستوي جامعي وحياتها كامل مدلة ومفشة وووو قارية مستواها جامعي الخ كاين بنات مستواهم كما يحوس اخوكم يعني مستوي ثانوي او حتي اقل من ثانوي وهادو طبعا ماكثات بالبيت كثر اختي وكاينات وعايشين كما يقولو في عائلات بسيطة وعامرة وطبعا هي موالفة بديك العيشة والعقلية الخ اكيد تقبل وتاتي عاد لانها موالفة تماما نعرف ناس خداو بنات متوسطات الجمال الخ وعايشين لاباس نفس مستوي دراسي وتفكيري واجتماعي ايضا وثقافي هكدا يكونو متساويين بزاف لدا ماتقلقوش بانين ون تلقايهم

[نجاة^^]

السلام عليكم
الاقتراح الاول: ممكن تشوفولو اخت او وحدة من العائلة اللي جاب منها قريبك تكون العقلية متقاربة.
الاقتراح الثاني:شوفو بنات الريف،او القرى بالاكم من بنات المدينة (ليس الكل ولكن الاغلبية الساحقة) نظرا لشروطكم والله يتمرمد خوك ويدوه للمدينة ويخليو والديك .
اضافة ختي شبه مستحيل تلقاي بنت تهز العايلة بكل (نقصد الوالدين) يعني كيما فهمت نتوما متزوجات (هذا اذا عندك اخوات) حاولوا تقسمو الخدمة على والديكم والله نتوما الصح واحد ما يرفد واحد هذا الوقت ،(هذا اذا كنتو قريبات من بيت العائلة) على الاقل تنحو عليهم لغسيل والتنظيف،. ....يبقى فقط الاطعام قادر تخليوه للعروس ولا اذا كانت الظروف تسمح اتقاسمو الايام واديوهم(الام خاصة للبنات والاب للذكور) عندكم هكا تخففو شوي على خوك الصغير لانو اكيد هو تان يحب يعيش حياتو
وربي يفرج عليكم ويوفقكم ان شاء الله

[إينَاس]

أنا أوافق الأعضاء فيما قالوه إلا ,,,,
موضوع أنكم تجيبولو وحدة من العايلة تع الطفلة يلي تزوجها قريبكم
صدقيني والله في العايلة الوحدة الإخوة و ممكن حتى التوأم تلقاي الفرق بيناتهم الفرق بين المشرق و المغرب
عن تحربة أتحدث عن شاب تناقلت الألسن سيرة صلاته و قيام ليله و حسن ادبه و سلوكه
و أخوه الأكبر (الأكبر الذي كان كوالده ) لا داعي لأفسد صيامي و صيامكم بذكر ما افتعله من فواحش

أستغفر الله العظيم

[kacimo.samy]

السلام عليكم
كاين و غير هم
وربي يسهل ليكم
بصح بالعقل عليها برك انا تبانلي هذي جايبينها خدامة ليكم موش زوجة ليه حسب المقدمة تاعك

[صُبح الأندلس]

أرجو أن تستعملي المصطلح المناسب،تبحثون عن زوجة صالحة مصلية محجبة...أم زوجة خادمة ؟كما أنك تقولين إن أخاك معقد شوية وهذا بشهادتك فاتقوا الله في بنات الناس ولازم توضحوا للمخلوقة شخصية الأخ.
أمر مهم أمك أنتم مسؤولون عنها و عن رعايتها و أنتم من تحاسبون عليها و ليس زوجة الأخ.

[صُبح الأندلس]

المشاركة الأصلية كتبت بواسطة kacimo.samy

السلام عليكم
كاين و غير هم
وربي يسهل ليكم
بصح بالعقل عليها برك انا تبانلي هذي جايبينها خدامة ليكم موش زوجة ليه حسب المقدمة تاعك

والله صح و أمر مؤسف يعني لازمهم خدامة ولادة ما تعرف من الدنيا والو حتى لا تعترض إذا ضربت أو أسيء إليها و أكيد يا ليت تكون يتيمة

[om_hadil]

يا اختي انت تبحثين عن خادمة و ليس زوجة
كيف ستتكفل هاته الزوجة بوالديك المريضين ربي يشافيهم ؟؟؟
انت مسؤولة عن والديك و ليست زوجة اخيك ،،،،

[الباحث السعيد]

ان شاء الله تلقاوها