حبيت نقدملكم مجموعة من النصائح بلاك تفيدكم 👍

[〆 بٰٰاولو 乄]

- اول حاجة الباك مهما كانت الشعبة تاعك ساهل و ماراحش يخرج على اطار واش قريتو
- الباك 70 % من الاسئلة مكررة يكفيك انك تحل الباكالوريات السابقة تدي مليح
- عن تجربة شخصية كي تشوفو واحد داير برنامج يقولك ديت بيه 16 ماشي بالضرورة ادا طبقتو نتا تدي 16 لانو كل واحد و القدرات تاعو و كل واحد و المواد لي ضعيف ولا مليح فيهم
- الاستيقاظ باكرا مفيد بزااف بصح كل واحد و على حساب مايقدر ماتقولوش مانقدروش انا شهر تاع سبتمبر كنت نوض نطفي تيليفون و نكمل رقادي خخ في افريل وليت نوض قبل مايصوني قضية توالف برك
- جانب مهم في التحضير للباك و مهم بقدر الدراسة هو الراحة . لازم جسمك يرتاح و نتا ثان ادا شفت روحك نصف ساعة في الفايس بوك يوميا تريحك و تخليك تقرا مليح ماتحرمش روحك منها بصح ماتمرقوهاش بزااف
- مهما كانت الشعبة تاعك مواضيع الباك من 2008 حتى 2017 لازم تكون شايفهم و تحل ما امكن منهم و تشوف الحل لانو منهجية الاجابة راهي تلعب دور كبير
- ادا شفتو بلي طريقة المراجعة لي طبقتوها ماهيش تفيدكم بدلوها و على هدا لازم تبداو من الشهر الاول باش يكون عندكم وقت
- ماتطيحوش في فخ اهمال المواد الثانوية لانو قادر تهبطلك المعدل و ماتديش الباك ولا ماتديرش تخصص لي راك حابو لا قدر الله
- تفكر بلي لي جابو 19 و 18 ماعندهم حتى حاجة زيادا عليك غير شوي جهد برك
- في ما يخص الناس لي تجوز للمرة الثانية او اكثر سواء ماجبتوهش او جبتوه و ماعجبتكمش العلامة كل حاجة فيها خير مالازمش يعجزو
- و اهم حاجة التوفيق من عند ربي ان شاء الله تكونو قاع ناجحين

بوون كوغاج 😇💚👌...