*****وصفة جديدة لحلوة الملفوف روووعة و بنينة بزززاف*****

ابني نور عيني · 2017-02-04, 22:28

مساء الانوار لفراشات المنتدى سلامي ليكم كامل

اليوم جبت وصفة جديدة لحلوى الملفوف راااااائعة و تذوب في الفم و ذوقها يهبل

كنت جربت وصفات الملفوف اللي في المنتدى كلها لكن دوق هذا الملفوف مختلف عليهم
هاذ الوصفة سرقتها من عند خالتي الحبيبة كانت كل ما تديرها و تجيبها معاها ناكل نصفها
هاد الحلوى اقتصادية وتقطع بزززاف ولينا نموتو عليها في الدار عجبتنا وكل مرة نحبو نعاودوها ما تتشبعش
طلبت الوصفة من خالتي اعطاتهالي و درتها في سابع عجبت الجميع كلاو و اداو معاهم غير ذاقوها طلبولي الوصفة
بلا مانطول عليكم هاهي الوصفة:
المقادير:

مقادير العجينة البيضاء :
3 بيضات
كاس سكر ناعم
كاس زيت
2 خمارة
فرينة حوالي من الى500 غ

مقادير العجينة السوداء :
هي نفسها في العجينة البيضاء ماعدا الكاكاو:
3 بيض
كاس سكر ناعم
كاس زيت
2 خمارة
3 ملاعق كاكاو
فرينة نفس الكمية حوالي 500 غ

و للشاربات:
كاس سكر
2 كيسان وربع ماء
نصف ليمونة (اختياري)

الشاربات تكون خفيفة

شفتو مقاديرها اقتصادية ما تتطلبش بزاف

التحضير:نبداو بالعجينة البيضاء :
نضرب البيض مع السكر قلاص مليح مليح ونضيف الزيت و نخلط و ننشف بالفرينة مضاف اليها الخمارة حتى تولي العجينة طرية عينك ميزانك ملازمش تيبسيها

نفس الخطوات في العجينة السكر والبيض و الزيت و اضيفي الكاكاو ثم الفرينة و الخمارة و ضعيهم في كيس بلاستيكي ترتاح شوية

و تكوني طبعا شعلتي الفور من قبل و تكوني طيبتي الشاربات كامل تعرفو كيفاش طيبوها حطي السكر والماء و القارص في كسرونة يغلو لمدة 10 دقائق او 15 دقيقة على الاكتر و اطفي
باش نفتحو الرولي تاعنا نفرش نيلو و نحط العجينة السوداء من تحت نفتحوها مليح ونرققوها لانو راح تطلع و في مكان قريب نفتحو العجينة الليضاء مليح و نرققوها تاني و نرفدوها بالحلال لانو مستحيل ترفديها بيدك لانها طرية تتفتتلك وتنحل
و حطيها فوق السوداء و سقميها عليها و ابداي ترولي هادي علابالي كامل تعرفوها ترولي 6 دورات و تقطعي
سقمي الرولي تاعك الحواف الخارجة سقميها تولي من تحت باش الشكل يخرج انيق وشباب
وقطعي مقروطات او كيما تحبي انا درت مقروطات

و حطيها تطيب اشعليلها من تحت كي تحسيها طالت من تحت مليح اشعليلها شوية من فوق او خليها تطيب من تحت فقط حتى تشوفيها نشفت حساب الفور تاعك
و نعطيك نصيحة مهمة ما تحمريهاش ابدا لانو جي ناشفة حتى كي تشربيها تقعد ناشفة
طيبيها كيما السابلي غير تطيب نحيها ما تحمريهاش اوكي
و كي طيب مباشرة حطيها في الشاربات تتشرب و قلبيها و رمديها في النواد كوكو

وقدميها

امممممم تمتعي بالبنة روعة

والله ننصحكم تجربوها راهي بنينة تقتل انا عن نفسي نحبها بزاف وكلما تخلاص نزيد نديرها خاصة كامل عايلتي يحبوها
و نزيد نقوللكم الحلوى هاذي اقتصادية انا بهاذ المقادير قطعتلي تقريبا 55 حبة يعني زاكية و اقتصادية مافيهاش مقادير بزاف
ايا جربوها بنينة و تدوب في الفم و ذوق الكاكاو و النواد كوكو تخيلو جربوها وردولي بالخبر و ادعولي دعوة في ظهر الغيب والى اللقاء

sandibal · 2017-02-04, 22:49

Rawwwww3 baraka elajho fiki

adorablbissan · 2017-02-05, 00:06

والله تحفة ماشاء الله
سخفتيني .... غدوا ان شاء الله نديرها
يعطيك الصحة

أم يوسف2 · 2017-02-05, 07:11

وين كنت مخبيتنا قاع هادا والله يعطيك الصحة تبان بنينة وهاد الحلوىكل مرة نقول نجربها ومانجربش هاو ربي بعثلي وصفة ساهلة واقتصادية ومن عند من من حبيبتي ابني نور عيني مشكورة

om obaida · 2017-02-05, 08:10

ya3tik saha khasni hazak tabsi lakhar yla matahtajihech hhh sakhaftini m3a sbah

شمس الملوك · 2017-02-05, 08:28

يعطيك الصحة

ام هدول · 2017-02-05, 08:30

يعطيك الصحة ..الوصفة اقتصادية وببنية ..خاصة من تحت يييديك .....نجربها كي تسمح الفرصة ونردلك لخبر.....لانو عندي بزاف لي يسنو نجربهم
بارك الله فيك ...ويسلم يييدك ويحفضلك كل عزززيز

fofol · 2017-02-05, 08:42

salam 3ayakom hiya wasfa mliha lakin

lokan nkhaliha bla charbet khir

ya3tik saha okht

fleur de lili · 2017-02-05, 09:01

تسلم الايادي

ام هاديل وياسين · 2017-02-05, 09:05

يعطيك الصحة تبان هايل رايحة نجربها ان شاء الله

RIMA.87 · 2017-02-05, 09:20

السلام عليكم ،
بارك الله فيك اختي
قاطو اقتصادي و باين بنيين ،
جعل الله هذا الجهد في ميزان حسناتك
و الشكر موصوول لخالتك صاحبة الوصفة الاصلية

ابني نور عيني · 2017-02-05, 10:18

اقتباس:

المشاركة الأصلية كتبت بواسطة أم يوسف2

وين كنت مخبيتنا قاع هادا والله يعطيك الصحة تبان بنينة وهاد الحلوىكل مرة نقول نجربها ومانجربش هاو ربي بعثلي وصفة ساهلة واقتصادية ومن عند من من حبيبتي ابني نور عيني مشكورة

الله يسلمك والله ماتقدريش تعرفي شحال فرحت بمرورك انتي وام عبيدة و ام هدول لموضوعي شرفتوني ونورتوني عينيكم اللي شابين

ابني نور عيني · 2017-02-05, 10:19

اقتباس:

المشاركة الأصلية كتبت بواسطة om obaida

ya3tik saha khasni hazak tabsi lakhar yla matahtajihech hhh sakhaftini m3a sbah

شكرا حبيبتي شرفتي موضوعي

ابني نور عيني · 2017-02-05, 10:20

اقتباس:

المشاركة الأصلية كتبت بواسطة ام هدول

يعطيك الصحة ..الوصفة اقتصادية وببنية ..خاصة من تحت يييديك .....نجربها كي تسمح الفرصة ونردلك لخبر.....لانو عندي بزاف لي يسنو نجربهم
بارك الله فيك ...ويسلم يييدك ويحفضلك كل عزززيز

يعطيك الف صحة على المرور حنونة جربيها والله بنينة تهبل

ابني نور عيني · 2017-02-05, 10:21

اقتباس:

المشاركة الأصلية كتبت بواسطة fofol

salam 3ayakom hiya wasfa mliha lakin

lokan nkhaliha bla charbet khir

ya3tik saha okht

شكرا اختي لكن الشاربات هي اللي تعطيها بنة خاصة درتها خطرة بلا ماشربتها بصح جات ناقصة الشاربات تعطيها ذوق روعة