قاطو الوسادة

أم_فراز · 2017-06-20, 11:53

راح نحط الصور والعشية انشالله نحط المقادير
المقادير
عجينة الصابلي لتشكيل القاعدة . كل وحدة تستعمل العجينة الي متعودة عليها.
250غ زبدة طرية. 2 بيضات.نص كاس سكر رطب. نص كاس نشاء (يخفف القاطو روووووعة) 1 خميرة. 1 فاني. ونشيح بالفرينة.
1 كغ شوكولا بيضاء او سوداء حسب الرغبة. انا استعملت شوكو دادا chocodada قدرت نشكل بيها 60 حبة تاع الوسادة.
1 علبة نستلي . كاوكاو مرحي متوسط. 60 حبة كابريس . كريات فضية. لماع غدائي تاع غبرة.
الطريقة
نخلط المقادير تاع الصابلي على حدى . نحل العجينة ونشكل بالطابع تاع الوسادة ونطيبهم. تقدري توجديه من قبل .

بعد مانطيب الصابلي نذوب الشيكولا في حمام مائي دون اية اضافات ونحكم ريشة تاع المطبخ او البانسو ونطلي مول السيليكون كي نطلي الفراغات تاع المول كامل نحكم سباتولا ولا سكين ونمررو من فوق باه نحي الزوائد تاع الشيكولا الي كنت نطلي فيها . لانو كون ما تنفذيش هذ العملية كي تنحي الحبات راح يتشققو ويتكسرو ومايلصقوش على بعضاهم مليح . ونحطهم في المجمد قيس ما تجمد ااشوكولا نعاود نجبدها ونكرر الطلية على مرتين .
ذرك نذوب الكابريس فوق حمام مائي ونضيفلها شوي حليب باه تخفاف ونضيفها للنستلي ونخلطهم في بعضاهم ونلوح الكاوكا بالشوي حتى يتجانس الخليط . مايجي خفيف يسيح و مايجيش عاقد يابس
نفرغ الخليط الاخير في جهة تاع الحبة تاع الوسادة الي بالشيكولا ونغلق عليها بواحدة اخرى . حتى نكل الحبات الي عندي. بمانو سخون الحال نحطهم في الثلاجة باه ماتذوبش الشيكولا. وبعد ما يشدو الحبات في بعضاهم نجيب فرشاة تاع مكياج و نمسح باللماع الحبة كاملة ونلصق من الفوق كريات فضية بالمعجون
نجيبو حبات الصابلي ونحطو فوقهم شوي معجون ونحط الحبات تاع الوسادة من الفوق كيما في الصورة.
بالصحة والراحة.
انا ماصورتش المراحل بكل لانو كنت مزروبة. اسمحولي على الاطالة بصح حبيت نوصل الفهم مليح.