غراتان المعكرونة بالجريوات بنين بنين

اميريم19 · 2016-12-28, 22:38

السلام عليكم

الكثير من الاطفال يحبوا المعكرونة ومايحبوش الخضر فاذا خلطنا خضر مع المعكرونة نشجعوعم على تناولها ومنها ننوعوا في اطباق المعكرونة ما نطولش نخليكم مع الوصفة وكالعادة سهلة وماتحكمش بزاف الوقت

المقادير

250غ معكرونة اي نوع انا نستعمل اللوالب
قطعة صدر دجاج
حبة بصل
3او4حبات جريوات حسب حجمها
جبن ابيض
جبن مبشور
1 م ك زبدة
1 م ك فرينة
كاس حليب
ملح،فلفل اسود، ثوم بودرة

التحضير
نغلي المعكرونة في الماء مع ملح وزيت كالعادة ومانخليهاش حتى تطلق روحها
في هذا الوقت نقطع البصل ونقليه مع 2م ك زيت ثم نضيف الجريوات مقطعة مربعات ونكمل نقلي ثم نضيف صدر الدجاج ونحط بعدها ملح فلفل اسود وثوم بودرة ونخلي الدجاج يطيب بلا ما نمرق وانا نحرك مرة على مرة

لما يطيب الدجاج نضيف المعكرونة بعد ما نكون صفيتها من الماء ونخليها عدة دقائق تتشرب البنة ونحرك مرة على مرة ثم نطفي النار ونضيف جبن ابيض مقطع قطع صغيرة

في الوقت لي يطيب فيه الدجاج نحضر البيشاميل نذوب ملعقة الزبدة ثم نضيف الفرينة ونحرك نفرغ الحليب ونكمل نحرك حتى تثقال شوية ومانخليهاش تعقد بزاف لازم تكون شوية جارية. نتبل بالملح والفلفل الاسود
نفرغ خليط المعكرونة في اناء يمشي للفرن، نضيف فوقه البيشاميل وننهي بالجبن المبشور ونحطها في الفرن 10دقائق باش يذوب الفرماج
نقدمها ونستمتع بذوقها وبالصحة