كرنب على طريقة الكانيلوني

اميريم19 · 2016-11-08, 10:37

السلام عليكم
اذا كان افراد عائلتك مايحبوش الكرنب ننصحك بهذه الكيفية اللذيذة لي جربتها مع ناس مايحبوش الكرنب كلاوها عجبتهم وطلبوا الوصفة

المقادير
بالنسبة للصلصة:
حبة بصل صغيرة
2 سنينات ثوم
ملح، فلفل اسود
2 م ك زيت
1 م ك زبدة
1 م ك فرينة
علبة جبن طازج انا نستعمل فرماج الامير ممكن تعوضيه بجبن ابيض تاع الميزان

بالنسبة لكانيلوني الكرنب:
اوراق كرنب كبيرة او متوسطة
250غ لحم مرحي
حبة بصل صغيرة
حبة جزر
حبة جريوات
1 م ك ارز نغليوه في الماء نصف طياب
كمشة معدنوس مقطع
2 سنينات ثوم
قطعة جبن ابيض او مثلثات
جبن مبشور

التحضير
ننزع الجزء العلوي لاوراق الكرنب لي يكون خشين بزاف كيما في الصورة
ونحطهم يفوروا حتى يطراو ويسهل تشكيلهم

نخلط اللحم المرحي مع الارز، البصل المقطع، الجريوات مرابية في الخشين والجزر مرابي في الرقيق، الثوم مقطع، الجبن والمعدنوس ونتبل بالملح والفلفل الاسود ونعجن شوي
ماتخافوش من الجزر والجريوات راهم يزيدوا في كمية الحشو وفي البنة بلا ما يبان الذوق تاعهم
نحضر مرق ابيض نقلي البصل والثوم مع الزيت، ملح، فلفل اسود وقطعة صغيرة من عود قرفة اذا حبيتي ونمرق غير شوي
نحضر الكانيلوني نحط ورقة الكرنب نضيف حربوش صغير من الحشو ونلوي كيما البوراك ونحطهم يطيبوا في المرق انا حطيتهم في الكوكوط 20 دقيقة

بعد ما يطيبوا ننحي كانيلوني الكرنب ونستفهم في بلا تاع الفور

في مرميطة نذوب الزبدة ونضيف الفرينة نحرك شوية ثم نضيف المرق ونحرك حتى تثقال شوي نضيف الجبن ونطفي ونحرك حتى يذوب
نفرغ الصلصة ونضيف الجبن المبشور والى الفرن 15 الى 20 دقيقة
قدميه وبالصحة

ملاك ملاكي · 2016-11-08, 10:59

امممممم باااارك الله فيك اختي عجبتني الفكرة لانه كي قلتي بزااااف مايحبوش الكرنب.....وزيد تخيلته يجي بريزونتابل ياااامي ياااامي
مشكووووورة

nihal159 · 2016-11-08, 11:43

طريقة روعة بارك الله فيك؛ نفس الطريقة أنا معتمدتها لكن بصوص حمراء؛ نستفهم في بلا تاع الفور ونمرقهم بصوص طوماط؛ يجيو بنان تحفة؛ سخفتيني؛ إن شاء الله نجرب طرقتك بالصوص البيضاء و نردلك لخبر.

اميريم19 · 2016-11-08, 11:47

اقتباس:

المشاركة الأصلية كتبت بواسطة ملاك ملاكي

امممممم باااارك الله فيك اختي عجبتني الفكرة لانه كي قلتي بزااااف مايحبوش الكرنب.....وزيد تخيلته يجي بريزونتابل ياااامي ياااامي
مشكووووورة

بارك الله فيك اختي ان شاء الله تجربيه بنين وخفيف شكرا

اميريم19 · 2016-11-08, 11:50

اقتباس:

المشاركة الأصلية كتبت بواسطة nihal159

طريقة روعة بارك الله فيك؛ نفس الطريقة أنا معتمدتها لكن بصوص حمراء؛ نستفهم في بلا تاع الفور ونمرقهم بصوص طوماط؛ يجيو بنان تحفة؛ سخفتيني؛ إن شاء الله نجرب طرقتك بالصوص البيضاء و نردلك لخبر.

الله يبارك فيك اختي بالصوص الحمراء اكيد بنينة زيدي جربيها بالصوص البيضاء بالفرماج ذوقها مختلف وبنين ايضا