كرهت الخدمة

[مشكلتي]

السلام عليكم
أنا معلمة في مدرسة إبتدائية منذ 9 سنوات متزوجة بدون أطفال
مشكلتي تكمن في أني كرهت عملي مؤخرا لأني حاسة بضغط رهيب و ارهاق يعني ملي نوض على 6 صباحا و انا نجري و في المدرسة ملي نبدا الخدمة قبيل 8 و انا واقفة و ندور على التلاميذ حتى لوقت الغداء نرافقهم للمطعم و لازم حراسة و بعد تناول غدائي بفترة وجيزةيعاودوا التلاميذ يدخلوا للساحة و ثان لازم حراسة و بعدها نعاود ندخل للقسم و تعب ثان حتى للمساء نجي للدار في قمة التعب مع العلم أني أحقق نتائج جيدة في عملي .
يعني خلاصة القول ملي نوض على 6 صباحا و انا نجري بدون توقف حتى للرابعة مساءا باش ندخل للدار و تبدا بعدها أشغال البيت طبعا .
و الله بكل صراحة كرهت هذا الوضع و حاسة حياتي تجري و انا نجري موراها و مالحقتهاش فكرت نحبس لكن المعوقات كثيرة أكبرها زوجي راني حاسة أن الفكرة ماشي عاجباتو هو صح خدام لكن عندو مبلغ شهري يعطيه كل شهر لدارهم يعاونهم و طبعا هو مبلغ يعتبر كبير مقارنة بالراتب تاعو علابيها شهريتو تاع الصح ما تكفيناش وحدها لولا راتبي لي راني ندير بيه في السكنة
و المشكل الثاني أني بدون أطفال و الدنيا ما فيهاش لامان نخاف نحبس خدمتي وفي المستقبل إذا عيشني ربي نندم .
ساعات نقول نكمل السكنة ونبطل و ساعات نتراجع على الفكرة .
و انتوما واش رايكم ؟