علاش هكا

[مشكلتي]

السلام عليكم خاوتي واش راكم ان شاء الله بخير
مشكلتي كالاتي انا فتاة عمري 24 سنة وانا اكبر اخوتي ...مشكلتي مع والدي ابي يعاملنا في المنزل بتمييز كبييير جدا جدا بحيث عندي اخ اصغر مني 22 سة واختي 17 سنة و تحتها بنتين صغيرتين
اختي دات 17 سنة فتاة لا تحترم اي احد في المنزل ..لا تعرف كبيرا ولا صغيرا لا عمة ولا خالة قليلة الادب في كلامها وفي تصرفاتها تفعل كل ما يحلو لها وبالرغم من كل هدا والدي يميزها عنا في التعامل فهي الحبيبة وهي الاولئ في المنزل والله يا اخوتي بدون زياادة احدثكم ...ابي يحبنا كلنا و يربينا دائما علئ التقدير والاحترام والحمد لله و يراقب جل تصرفاتنا هو وامي ولا يقبلون باي خطا صغير يصدر مننا ..دائما يتوقعون منا الافضل في التربية وفي العلم ولكن حين يصل الامر لاختي هده ابي ينسئ كل شئ ولا يرئ اي شئ خطا تفعله بعينه هي الافضل .... صدقوني حتئ عندما تعاقبها امي عئ اخطائها ياتي بسرعة فائقة الئ غرفتنا ليصالحها ويضع اللوم علئ امي تخيلووو !!!!
ابي راح يجننا والله اختي دايرة الي ما يدار في البيت وممنوع علينا نكلمها حتئ اصبحت متكبرة بشكل غريب خاصة وهي في هاد السن لانو عارفة انو وراها ابي ..
انا و واخي الحمد لله من المتفوقين بالدراسة والله لطالما اتييت الاولئ في الجامعة وارجع المنزل فرحانة حتئ نفرح والديا امي تفرح وابي عادي يقولي '' يعطيكي الصحة '' و اما اختي لو تجيب واش تجيب ابي يديرلها الي ما يدار كل معدل فصلي بجائزة كل مكان يفوخ بيها وبنتي و بنتي وكاننا حنا مش ولادو وعلاش هكاا ربي قولولي !
مرة كنا مجمعين نضحكو مع بعض انا واخي واختي ...جاء هو سمع حديثنا عن الاساتدة ونحكو علئ المدرسة ونضحكو فرحانين عادي قالنا اصلا احسن واحدة في اولادي كلهم والافضل في القراية وفي كلش هي اختكم هده ...جرحنا بشكل مش طبيعي يعني بعيدا عن كل التصرفات اليومية الي نحسوها يجي يصرح بيها وعلاش ربي والله انا واخي مش مقصرين الي يطلبها تجيه بلا ما ينادي لا اسمي ولا اسم اخي ولكن وعلاش ما يحبناش نفس الحب علاش يميز بيناتنا ويخلينا نحقدو علئ بعض و يخليها تولي متكبرة علئ اخوتها وعلئ امها وعلاش ربي علاش مش حرااام المييز بين الابناء !!!
واحد ماراه حاس بالي نحسوه والله توجع والله ...اختئ مستواها مثل مستواي انا واخي ونفس المعدلات الي تجيبها كنا نجبوها وبصح هي الافضل في كلش ...اختئ لو تطلب واش تطلب لازم تصرا ابي ميعرفش يدير معاها اي حد وهاد الشئ خلاها تولي ما تعرفنيش بلي اكبر منها تردلي الهدرة وكاني انا اختها الصغيرة ما تمسعش كلام امي ..خوياا محاال يحكم فيها ولا يقدر يهدرلها لانو الي يهدرلها يجي والد تقولو برك ياويلنا ...يعني كاين شخص يحب ولد اكثر من الثاني معقول يعني ....

[nidabaize]

هو شيئ عادى بالنسبه لا تحترم لا عمه ولا خاله ولا كبير و لا صغير فى بعض الاحيان الوالدين يربو اولادهم على حسن الخلق وانتى كبيره لازم تكونى مؤدبه و رزينه و ما يخرج منك الكلام لى مش معقول و هى والديك دايرينها سلاح دو حدين اى ممكن تبرد قلب يماك مين ترد فى وجه العمه و تبرد قلب باباك مين ترد على الخاله ومرات يكون نقاش لى الكبير ما لازمش يهدر و بالتالى تاتى دور البنات ولازم تكون مصيبع باه حتى واحد ما يهدر

هده وجهت نظري اراها فى بنات عمى ام واب يسكتو وتنوض شطاحه غير تكرفس فى الهدرة ومين تشوف الكبير زعف يجو يقوللك هاديك صغيره ديرو عليها مهما بلغت عندها 23

[مُحمد رازي]

و عليكم السلام و رحمة الله
على الأقل قولي الحمد لله على كل حال بصح أنك تقولي و علاش ربي هكا !!!! هاد الشي مشي مليح
راح نرجع إدا لقيت فرصة حتى نرد أكثر

[- بصمة خير -]

كل واحد بمشكلته و كل واحد يعاني و كل واحد يشوف معاناته اكبر شيء في الدنيا و ماكنش اللي اكثر منه يعاني
لان الله سبحانو يعطي لكل واحد مشاكل على حساب قوته و صبره
ما يعطيلكش مشكل ما تقدريش تصبري عليه
و في نفس الوقت يمتحن ايمانك بالله
اللي راكي فيه قولي الحمد لله
قولي الله سبحانو اسمه الخير العادل
اللي راكي فيه و المشاكل كااااااااااامل راه كاين الخير فيها لكن انتي و حنا البشر ما نشوفوهاش
يوما ما تعرفي الخير وين راه و تقولي الحمد لله و تندمي لانك تقولي علاش هكا يا ربي
تقولي الحمد لله من قلبك
مازالك تتعلمي و تفهمي الامور كيفاه تمشي
و الضربة اللي ما تقتلكش تقويك و تكوني شخصية قوية
و المؤمن القوي خير من المؤمن الضعيف
صح مشكلة اللي راكي فيه
لكن كاين اكثر منها بزااااااااااااااااااااااااااااااااااااااااااااف
بزاااااااااااااااااااااااااااااااااااااااااااااااا اااااااااااااااااااااااااااااااااااااااااااااااااا ااااااف
قولي الحمد لله من قلبك
و توقعي الخير فقط من الله

قد ما راكي مش مليحة كاين اللي اكثر منك

الله يفرحك و ييسر امورك

و اكثري الدعاء في السجود

[حية بذكر الله]

صراحة ختي دخلت باه نعاتبك علغŒ العنوان
هذا يسمغŒ قنوط من رحمة الله
و الخير فيما اختاره الله
و نزيد نأكد علغŒ كلام الأعضاء
احمدي ربي كاين الي أسوء منك حالة احمدي ربي عندك بابك و أمك عندك إخوة و أخوات
و الله الواحد ما يحس بالنعمة حتغŒ تزول شوفي غير الي راه صاري في الدول سوريا أطفال مشتتين
اسمحيلي بلاك خرجت عن الموضوع
ربي يفرج عليك

[مُحمد رازي]

أنت راكي تقولي على أختك بأنها قليلة الأدب و تفعل ما يحلو لها و رغم ذلك والدك يميزها عليكم
لكن أنا نقولك أنها مين شافت والدكم يعاملها معاملة خاصة و يميزها هاد الشي لي خلاها تعمل واش تحب
و نظن أنه شي طبيعي أن الوالد يميل لواحد من أولاده و خير دليل قصة سيدنا يوسف عليه السلام
مين شافو خاوته أن والدهم راه يميز خوهم يوسف عليهم و و قعدو يفكرو كيفاش يتخلصوا منه حتى يرجع والدهم يشوف ليهم تانيك هوما
حتى وصل بيهم الأمر أنهم رماواه في البير و هو صغير و قالو لوالدهم بلي الذيب كلاه
و حذاري ترمي أختك تاني نتي في بير هههه فقط أمزح معك
لكن نرجع و نقول أنت الله يبارك راكي الكبيرة في خاوتك و و ناجحة في دراستك و والديك راضيين عليك
حتى أنك قلتي بنفسك : ابي يحبنا كلنا و يربينا دائما علئ التقدير والاحترام والحمد لله
فاحمدي ربي راكي في نعمة كبيرة
و إدا راكي تقولي أن والدكم يبغي أختكم أكثر منكم هدا ما يعنيش أنه ما راهش معتبركم نتوما تاني أولاده
و المفروض أنك و أخوك تفكرو في مصلحة أختكم و تحبولها الخير حتى ما تضيعش بهاد الدلال و لي تسموه نتوما تمييز عليكم
و الوالد لازم في معاملته مع أختكم يكون اعتدال ما يرخي الحبل كلية ما يشده كله
و هاد الحساسيات لي راهي تعشعش في راسك اتجاه اختك خلّوها أكوتي نتوما إخوة كامل و عايشين في بيت واحد
و غدوة كي تكبرو كل واحد وواش راه كاتبله ربي لي كاتبلها تتزوج و تعيش و حدها و لي يخدم في كاش بلاصة
و راح تشتاقو في دوك الأوقات لوالديكم و خاوتكم و لمّاتكم
خلاصة الكلام مالزامش تخلي هاد الأفكار و الحساسيات يأثرو عليك حتى ترجعو تحدقو على بعضكم و تكرهو بعضكم البعض
و ربي يألف بين قلوبكم و يصلح الأحوال

[ام رضوان]

السلام عليكم
ربي يهديك يااختي
قولي الحمد
علاش ياربي هكا راهي كلمة مش مليحة هذا راهو عدم رضى بقضاء الله
استغفري ربك وادعيه يفرج كربك
اما والدك ربي يهديه التفريق بين الاولاد يولد الكره والضغينة
حاولو تحكو لامكم وتقولو بانكم مش راضيين
وثاني اعذروه يمكن لو تعودو للماضي تلقاو اختكم مرت بمرض او صرالها حادث خلا باباكم يعززها هكذا راهي تصرا بزاف
وانتم حاولو تحبو اختكم واجبديها ليك وخليها تكون صديقة لك وحاولي تكسبيها وتنعتيلها الصح من الغلط
وانت اكثري من الاستغفار وسيبدل الله حزنك افراح باذن الله

[- بصمة خير -]

https://www.youtube.com/watch?v=MauW5Axcglw

الله يفرج عليك
و علينا
كل واحد فينا يعاني
الله يصبرنا

[فاطمة شلف]

السلام عليكم
الله يهدي اختك
ولا تابهي لتميز انت كبيرة ورزينة وعاقلة تحلي بالصبر واكثري من الدعاء
واحمدي ربك على هذه النعمة بالنسبة لمشكلتك لو قارنها بمشكلة اخرة تنساي
روحك وربي مافيه غير الخير
وهذا خطاء ابوك لزم اذا حب واحدة عن الاخرين مايبينش كلكم اولاده
مزية جاء الهم متقسم لو جاء في شعبة كون خلاها
كبري قلبك واذا مسك الغيظ توضئي وصلي ركعتين وقرائي بعض الصور القرانية
كا المعذتين واية الكرسي وصورة المزمل
كوني رزينة بنيتي

[ramiusma26]

ربي يفرج عليك

[زبدة ذايبة]

أنا أشم رائحة الغيرة بين الإخوة

وأشم رائحة الحساسية الشديدة من طرفك

وقبل هذا وذاك

عنوان مشكلتك غالط 100%

والبداية تاع المشكلة خطأ

بديتي برب العالمين تقوليلو وعلاش هاكا !!!!!!!!!!!!!!!!!!!!!!

ودخلتي في تصرفات والديك علاش هاكا

ثم تصرفات اختك علاش هاكا

وانت في رايك ماتغلطيش نهائيا

احتمال هي تتصرف تصرفات قدرت تكسب محبة أبوك وأمك

وهي ذكية بدرجة وين قدرت تكسب قلوبهم

وهذا عادي جدا

وإذا كانوا يحبوها هي هذا مايعنيش يكرهوك انت واخوك !!!!!!!!!!!!!!!!!!!!

ماعرفتش وين راهي مشكلتك غير في الشيء اللي كتبتهولك لفوق

احمدي ربي

عندك باباك ويماك على قيد الحياة

يخرج أبوك يخدم عليكم

دارلكم دار راكم عايشين فيها

رباوك وعلموك

وكي زعمة وليتي تعرفي تكتبي وتقراي

جيتي تشكيهم بلي مايعرفوش يديروا العدل ؟؟؟؟؟؟؟

ضرك لازم انت اللي توريلهم كيفاش التربية !!!!!!!!!!!!!!!!

ولاو مايعرفوش يربو بعد ما كبرتي انت وليتي 24 سنة !!!!!!!!!!

اختك 17 سنة خليها تتدلل على والديها في حياتهم

عندها لهبال تاع المراهقة خليها تتمهبل عليهم

إذا كان معدنكم طيب دور وتولي كيما انت

وإذا راكي تشكي اختك راكي غالطة هذي اختك مهما كان

وماتستنايش منا نقولوك عندك الحق هي مجرمة وماشي متربية هيهات هيهات تقراي هذ الرد

وإذا راكي تشكي والديك فهذا والله من العقوق

وإذا راكي تشكي ربي العالمين فنحن أهون من هذا

يعني

الخطأ راه راكبك من ساسك لراسك

استغفري وتوبي إلى الله

ماعندك في دراكم حتى مشكل

واختك صغيرة اعذريها وكي ماتعرفش وريلها


قد ماكنا ناس ملاح مانكونوش كيما اختك

عاودي راجعي نفسك وتصرفاتك

راكي كبيرة وخلاص سن المراهقة بالنسبة ليك

[um hajar]

السلام عليكم
الأخت استعملت هذا اللفظ لأننا احنا الجزائريين كبرنا ونحن نسمعه في الاسره وفي الشارع وحتى في المدرسه .ولا اضنها كانت تنوي الغضب على الذات الالهيه
وليعلم الجميع ان لدينا اخطاء عقائديه جمه نتفوه بها دوما ولا نلقي لها بالا .
ربي يسر امرها وامرنا ويفرج كروب الجميع

[.kiki]

السلام عليكم و رحمة الله
أتفهم ألمك اختي، من الصعب جدا أن يسعى الواحد منا لإرضاء والده و لكنه لا يلقى منه الحب الذي يحتاجه.. نحن مهما كبرنا سنظل في حاجة إلى حنان الابوين (اللهم صل و سلم على من عاش يتيم الأبوين و لكنه كان مدرسة في العطف و الحب و الحنان)
و لكن يا ّّأختي يبقى هذا والدك.. و مهما فعل فإنه لا يزال يتحق منكم التقدير و الاحترام والامتنان ... فإن له عليكم جميعا فضلا عظيما. و لابأس لو كلمت أمك في هذا الشأن ربما تكلمه حتى لا يظهر محبته الزائدة لأختك امامكم.
ولكنه لن يستطيع التحكم في قلبه.
يحبكم جميعا.. و يحبها هي أكثر.. لا يد له في ذلك. أنا لا أبرر تصرفاته بأي حال من الأحوال لأن العدل بين الأبناء واجب.. لكني فقط أوضح لك ما قد يغيب عنك.

و فوق كل شيء أختي.. كوني شاكرة لله على أنك لست يتيمة. و استغفريه على العنوان الذي اخترته لمشكلتك. فالله تعالى يحمد على كل شيء. سواء النعمة ام الابتلاء.

وفقك الله و جعلك فخرا لوالديك و رزقك برهماو رضاهما.

[محارب الحمق]

ليس لدي الكثير لاقوله سوى بعض الملاحظات:
علاه ربي هكذا: قنوط وسوء ادب مع الله
التمييز بين الابناء والغيرة ليس امرا هينا بسببهما رمي يوسف في الجب (ملاحظة يعقوب عليه السلام لم يظلم ابناؤه بالمعاملة لانها كانت متساوية وانما كان مفاضلته قلبية اي ان قلبه يحب يوسف اكثر من الاخرين وهو لا يملك ان يغير ما بقلبه)
مشكلتك ليست نهاية العالم وهناك من يعاني من مشاكل لا يصفها لسان