مشكلة أختي

[مشكلتي]

السلام عليكم
أنا صاحبة هذا الموضوع
https://www.djelfa.info/vb/showthread.php?t=1887151

المهم حبيت نخبركم على الوضع المزري لي لحقت ليه أختي باش تقدرو تعاونوني بنصائحكم

أختي ما قدرتش تشد روحها و قالت لزوجها أنها فاقتلوا و هو قاللها أنو هذيك الفتاة كانت صديقتو و من بعد خلاتو و راحت دارت علاقة مع شخص آخر و ضرك حبت ترجع ليه مي هو راهو غير يلعب بيها و يحوس يذلها و أكيد اختي دارتلو حالة وز عمة وعدها باش يبطل و نحى كامل لبنات ملفايسبوك تاعو .
لكن المشكلة أنو هدأ برك يامات و من بعد رجع يعامل أختي معاملة جدا سيئة و دايما فتانات و عياط و لحق حتى يضربها و هي تقولوا ضرك نلحقها لدارنا و نفضحك قدام خاوتك مي ما دارتهاش .
و هو كي شافها مادارت والو زاد تمادى و رجع يسهر بزاف برا و مايقعدش نهائيا معها و كي تهدر معاه يبدا يعيط و يضرب
و المشكلة الثانية هي مع أمو لي طلعت واعرة بزاف و من النوع لي تحب تسيطر على عرايسها و هذو اليامات فاتنت أختي و قالتلها و علاش رحتي لداركم بلا ما تشاوريني بالرغم من أن أختي ساكنة وحدها لكن قدام عجوزتها و كي قالتلها راني شاورت راجلي بدات تعيط و قالتلها ضرك نلم كامل خاوتك و يماك و نشكيك ليهم و الطامة الكبرى أن راجلها ملي سمع بلي يماه راهي زعفاانة و هو يفاتن في أختي و يهددها بالطلاق و يقوللها لازمك تشاوري يما في كل خطوة ديريها و يما ماراهيش شيفونة عندك و كلااااااام بزاف و قال نفس كلام يماه ضرك نلم كامل خاوتك و نطلقك على خاطر ما حبيتيش تمشي على طوع يما و كي قالتلو ضرك نفضحك على واش درت قاللها أنا أصلا ماحبيتكش و ضرك نردها فيك و نقوللهم بلي هي لي خانتني و نطلقك ......و أكيد دار مشكلة يماه سبة برك للطلاق .
و كلامو على الطلاق رجع بصفة يومية من نهار لي فرا مشكلة السكنة مع خوه و ضمن بلي خلاص عندو سكنة على خاطر كان طامع في اختي تبنيلو قاللها كي تبداي تخدمي نبنيو فوق دارنا و اختي تخرجت غير كيما من المدرسة العليا للأساتذة .لكن خوه بنى ملفوق و زعمة حب يعاونو قالو نتنازلك على حقي في السكنة زيد ظمو لدارك و أنت كل شهر اعطيني مليون حتى تكمل تخلصني . مع العلم الدار لي ساكنة فيها اختي ضركا فيها غير غرفة نوم و مطبخ برك

المهم أختي ضرك راهي تخمم جديا في الطلاق لأن هذا ماهوش زواج و كاين بزاااااااف موافق ما حكيتهمش و لوكان نحكيهم تحيروا كيفاش راهي مازالها معاه ......لكن المشكلة راهي خايفة يلم خاوتها و يتهمها في شرفها و يوسخ صمعتها ......و من جهة أخى راهي حابة تصبر حتى تبدا الخدمة ان شاء الله و ترجع عنها دخل باش تقدر تصرف على روحها بلا مزية خاوتها لي أكيد ماراعمش رايحين يوقفوا في صفها .


.

[bello angel]

قلها تطيش عليها لخمااااااااج -----حاشاكم=====

الرجال يضالو يحكو على النسا و هم كامل عفن الا من رحم ربي

هاديك مرتك مش يماك لا فوتتلك مرة ع جال دارها راهي عاملة فيك مزية ماكش محتم عليها تبقا تربي فيك عمرها كامل و تزيد تحمل يماك و خاوتك

و النسا ربي يهديهم حيموتو ع الزواج ياو لوكاااان نعرف روحي نقعد بايرة و منديش واحد مازالو دري و حاب يلعب بالفايس هم

و زيد هدا اللي يهدد فيها باه يطعنها في شرفها بالكدب واش بقات معاه من معيشة؟؟؟؟
قلها مدرسة عليا و صغيرة علاه عليك ؟؟ تطلقي و ادي سيد سيدو ماخصها والو
قلها تخليه ليماه و صحاباتو يتربا في عزهم

[سفيان31]

نصيحة لبى يحطو ردود من بعدي حاولو تحطوا رحمة ربي

ادفع بالتى هي احسن

[خالد عنابي2]

بالنسبة لاتهامها في شرفها لازم هي لي تبادر وتفضحوا
لانه لو سبقها بالادعاء رح يصدقوه وخصوصا المجتمع تاعنا ونظرته للموضوع

طبعا هذا انسان لا يستحق العيش معه طالما ان امه تحكم فيه

[Basketteuse]

حسبي الله ونعم الوكيل، ان شاء الله ربي يجعل كيده في نحره، قولي لأختك واحد مايقدر ينفعها غير ربي سبحانه ، دير قيام الليل، وتدعيه ليل ونهار ، يبعد عليها كيد الظالمين، وماتنساش أذكار الصباح والمساء، وتقول: بِسْم الله الذي لا يضر مع اسمه شيء في الارض ولا في السماء، وهو السميع العليم،

[nanoua7]

اللّٰه يجيبلو ضربة في هاد العيد و العواشر دايرلها هاك قوليلها تخبر خوه ولا كاش واحد من العيلة قبل لا يتهمها بالكذب و تحكم عليه ادلة و يا اختي ربي دار الزواج و الطلاق ماهي مجبورة تكمل حياتها مع واحد كيما هاك ضرك خير من غدوا و لا قدر اللّٰه يكون فيه دراري رايح تصعاب عليها و تاني ما يستحقش يكون اب و ريي يفرج عليها و توكل عليه ربي

[طاعة زوجي ..]

لا حول ولا قوّة إلّا بالله العليّ العظيم
أختك تأخرّت بزّاف في طلب الطّلاق ، ماعرفتش علاه صبرت عليه رغم معاملتو السّيئة ليها هو وأمّو
صحيح أنّو الطّلاق أبغض الحلال عند الله عزّ وجلّ ، لكن هنا الأمور تعدّات الخطّ الأحمر ، الرّجل هذا إذا كان بالمواصفات اللّي ذكرتيها ، راه كاااارثة ، أعتذر ولكن يوصل وين يهدّدها أنّو يتّهمها في شرفها ويهددها بالطلاق ظلما وبهتانا ، هنا كان عليها تحط نقطة نهاية معاه ، مع الأوّل كانت في مركز قوّة لوكان أغتنمت الفرصة في هذاك الوقت وتنفذ بجلدها وربي هو الرّزاق اللي خلق مايضيّع
وزيد علاه حتّى تستنّى حتّى تتوظّف ، ماراحش تموت بالشّر إذا قعدت بلا خدمة صحيح بعض الإخوة الله يهديهم مايحملوش اختهم ترجع مطلقة ومايرفدوهاش ولكن أحسن من معيشة الذّل مع شخص بهذي المواصفات ، وتاني قبل ماتحمل لاقدّر الله وتتأزّم الأمور

نصحتك نفس النّصيحة اللي كنت راح ننصحها لأختي لا قدّر الله لو كانت في مكانك ، لأنّو لو كان زوجها ناس ملاح وفقط مشاكل العجوز ومشاكل أخرى نقولوا الصّلح خير ، ولكن أنّو تلحق الأمور لهاذي المواصيل فالطّلاق أحسن قبل لا تجي منّو وتتمرمد ويشوّهلها سمعتها


ربي يفرّج عليها ويفتحلها بيبان الخير

[kaderr09]

السلام عليكم ورحمة الله وبركاته
المنتدى يعج بالمصلحين الإجتماعيين
طلاق ........طلاق .......... طلاق
هذا ما زاد نسبة الطلاق بنسب خيالية في مجتمعات المسلمين
أين النصح بالصبر و الدعاء وتحكيم العقلاء من العائلة ومحاسبة النفس والحث على ذكر الله؟؟؟؟؟؟
ربما هنالك من قرأ القرآن في رمضان وختمه مرات عديدة ولكن دون التدبر في آية من آياته!
هنالك خطوات تسبق الطلاق و مشاكل عدة قد تترتب عن الطلاق نعيشها يوميا مع الإخوة والأقارب والجيران لا نتمناها لأي أحد
عليكم بالنصح والدعاء واتباع ما أمر به الشرع والله يقضي بما يشاء.
اللهم اهد هذا الزوج وزوجته وجميع المتخاصمين كي لا تقر عين إبليس بالإيقاع بين المتحابين

[سومية88]

ياختي تقل راكي تحكي عليا درك راني في طلاق انا ضريت خاصة كي تهمني في شرفي بصح الحمد الله نعرف روحي ارميت هدرت ودرك تنسي اا عام وراني نبكي حتي عيني وجعني انا ننصحك اخت تنساه وترمي كلش موراه لي يطعن مرتوا في شرفها ماشي راجل الله غالب رانا في زمان صعيب لي مافيه والو رجع فيه والعس صحيح نيحة تستغفر وتخلي ربي يسرلها حياتها لي فيها الخير ربي يسرهالها

[Lorena Carmen]

المشاركة الأصلية كتبت بواسطة kaderr09

السلام عليكم ورحمة الله وبركاته
المنتدى يعج بالمصلحين الإجتماعيين
طلاق ........طلاق .......... طلاق
هذا ما زاد نسبة الطلاق بنسب خيالية في مجتمعات المسلمين
أين النصح بالصبر و الدعاء وتحكيم العقلاء من العائلة ومحاسبة النفس والحث على ذكر الله؟؟؟؟؟؟
ربما هنالك من قرأ القرآن في رمضان وختمه مرات عديدة ولكن دون التدبر في آية من آياته!
هنالك خطوات تسبق الطلاق و مشاكل عدة قد تترتب عن الطلاق نعيشها يوميا مع الإخوة والأقارب والجيران لا نتمناها لأي أحد
عليكم بالنصح والدعاء واتباع ما أمر به الشرع والله يقضي بما يشاء.
اللهم اهد هذا الزوج وزوجته وجميع المتخاصمين كي لا تقر عين إبليس بالإيقاع بين المتحابين

و لكن يا سيد ما تحكمش غي تاليا و ما تنساش قالها نتهمك بالخيانة يعني يطعنها في شرفها و هذا ما ذكر في القرآن و هو قذف المحصنات و الذي يتدبر القرآن الكريم يعلم أن حد قذف المحصنات هو الجلد 80 جلدة يعني ماتجيش تقولي الناس راها توقع بين المتحابين أين الحب في هذا

[Lorena Carmen]

ياك عندها الصور و تزيد تصور المحادثات ب capture d'écran و لتبادر بالطلاق و تبين السبب و الى كاش ما قال عليها تقوله جيب الدليل و الشهود و ما دام ما دايرا والو ما عندها واش تخاف ربي كاين و هو لي ينصرها
يا ربي انصرها على هذا الظالم و إن شاء الله المرة الجاية تجي تخبرينا بلي أختك ربي فرج عليها الله يفرحها و الله راني ندعيلها من قلبي

[kaderr09]

المشاركة الأصلية كتبت بواسطة lorena carmen

و لكن يا سيد ما تحكمش غي تاليا و ما تنساش قالها نتهمك بالخيانة يعني يطعنها في شرفها و هذا ما ذكر في القرآن و هو قذف المحصنات و الذي يتدبر القرآن الكريم يعلم أن حد قذف المحصنات هو الجلد 80 جلدة يعني ماتجيش تقولي الناس راها توقع بين المتحابين أين الحب في هذا

السلام عليكم ورحمة الله
شكرا على الرد
و لكن التهديد لم ينفذ بعد إن كانت الحالة كما روتها الأخت تماما , و المشكل بعد الطلاق إن وقع فقد يقوم بتشويه سمعتها بين الناس فتكون المضرة أكبر.
وهل هناك أفضل من الدعاء والنصيحة أيتها الأخت الكريمة!!
ربما هناك الكثير من الذين ينصحونها بالطلاق مع أنه لم يسبق لهم الزواج. ففي التأني سلامة ولعل الله يحدث بعد ذلك أمرا
فليس كل من طلق أو تطلقت ضمن مستقبلا أفضل والأمثلة كثيرة في مجتمعنا
و عذرا إن أسات التقدير

[حاملة المصحف]

للاسف رجع الطلاق مودة في مجتمعنا الي يعيط عليها راجلها تقوا نطلق الي متجيبلوش مرتو كاس ماء مرة في الخمس عوام يقول نطلق
اكيد كاين حلول من غير الطلاق مفهمتش القصة مليح لكن من بين الحلول تدخل اشخاص كبار فاهمين و رزان في العقلية و تتناقش الامور و ان شاء الله تسلك على خير دون اللجوء للطلاق