#كيكة_المقلاة :لي عندها مقلاة ماتلصقش تتفضل

[*أم ثازيري*]

السلام عليكن حبيباتي
جبتلك اليوم كيكة المقلاة ... اقل مايقال عنها انها هاااااايلة و تحمر الوجه
بصح لازملها الصبر في التحضير
#كيكة_المقلة
#المقادير:
#الخليط:استعملت نفس المقادير لي دارتهم حبيبتي زوجة أبو أويس الجزائرية

4بيضات
كاس متوسط سكر
نص كاس حليب
نص كاس عصير ليمون
كاس زيت
وحدة خميرة كيميائية
فاني
فرينة تقريبا زوج كيسان

#طريقة_التحضير:

ضربي البيض و السكر جيدا حتان يتضاعف الحجم ،اضيفي الحليب ثم الزيت ثم عصير الليمون و ضربي
اضيفي الخميرة و الفاني و الفرينة رايحة تتحصلي على عجينة تشبه عجينة الپان كيك
في مقلاة لا تلتصق و تكون مدهونة بالزيت صبي مغرف او غراف نتاع الخليط و اعدليه على شكل دائري
نقصي للنار و خلي الخليط يتماسك
بواسطة سپاتيل حاولي تنزعي الحواف من المقلاة باش تسهل عليك عملية القلب
كي تجي تقلبيها استعيني بسپاتيل اخرى (وحدة من تحت و وحدة من فوق و قلبي)
خليها تحمار و نحيها و كملي طيبي الخليط بنفس الطريقة حتان تكملي الكمية كامل (انا تحصلت على تسعة دوائر لآني صغرت الحجم)

#السيرو :

كاس سكر فنجان ماء و قشور قارص وحطيتهم فوق النار هادية

#الحشو:

استعملت فريز و مانغا و بنان

#الكريمة1

:
4ملاعق كريم شونتيي
باط ياووغت ناتيغ
صاشي كريمة فانواز ذوق فاني(اختيارية)
حليب او ماء باااارد
ونخلط جيييييدا حتان نحصل على كريمة ملساء
#الكريمة2:
باط دانيت ذوق شكولاطة
اربع ملاعق كبار كريم شونتيي
ماء او حليب باااارد
و نضرب الكل جيدا حتى نتحصل على كريمة ملساء
#المونتاج:
حطي قرصة و شربيلها بالسيرو ومن بعد أطيلها بالكريمة الاولى و حطي كمية من الفاكهة و كملي بنفس الطريقة مع القرص الخمسة المتبقية
كي تكملي ادهني السطح و الجوانب بالكريمة الثانية و زيني بودرة الكاكاو و حطيها تبرد و تشد روحها
بالصحة و الهنا
#اي_سؤال_انا_في_الخدمة