قصيدة الشيخ الحسني منقولة

[medcherif03]

يقول الشيخ الحسني - رحمه الله - في إحدى قصائده...

راح الخير ودارت الساعة بالخف ---- لا فطنة حتى اصبحنا في لغبان
يا سامع لقصيدتي كلش خرف ---- غير الذكرى و المراسم كان وكان
خلات الارض من العباد الله يلطف ---- و تجملت و تلايمت تحت الحيطان
لا دنيا لا دين ثابت لا موقف ---- لا غيره لا نيف قوتهم خيان
لا حشمه لا جود لا من طاق و عف ---- لا قناعة بالعقل لا ناس احنان
من تلقاه يقول لك ذا وقت الهف ---- شوف لنفسك لا تراعي للجيران
ذاك يسمسر ذاك يربي ذا يحلف ---- و الرشوة و الكذب و حديث البهتان
من قلة ليمان و الراي التالف ----شفينا في نفوسنا حتى العديان
تلف الميز على العبد اللي يعرف ---- الزور اصبح فايده والحق تهان
يا راجل حتى الحيا على الناس اتلف ---- رانا مغلوثين رجال و نسوان
رانا مغلوثين في شوفه تكشف ---- بعد اتخطينا الشرع عدنا حيوان
ماتت كل اقلوبنا لا من يزعف ----و الشباب امخمره كيف و دخان
هاذي هي ثقافة الجيل القاصف ---- و هاذي هي حياة تاخير الزمان
وين تصيب اللي يميز و يقيف ---- تلقى واحد في الميه لا وين يبان
مول الغيره خاطرو راه امزيلف ---- يتنهد ما صاب طاقه لا عوان
طال عليه الحال في الوقت ايساعف ---- و يرجى وعدو لا غناش الحق ايبان
و المسلم من عادتو ما يتكلف ---- ياك احنايا دينا خير الاديان
سمحو فيه و غربو هاذ المحلف ---- حارو وانشغلو بصنع الماريكان
ما يدرو بمصايب الله كي تهدف ---- قدرة ربي خف من رمشة لعيان
حاشى ناس الخير ما دخلو في الصف ----ناصرهم ربي على حزب الشيطان
يا من فيك الخير يا عظيم ألطف ---- يا قاوي يا كريم يا عظيم الشان
نزل عنا رحمتك يا ربي عف ---- رانا في شده و ضيقه و امتحان
ضاع الصبر ادموعنا لا بات اتجف ---- من غيرك لا وين نشكو يا رحمان
ليك الملجى و النجا عبدك خايف ---- ما نفعك طاعه و لا ضرك عصيان
لاه اتحافينا بعبدك كان اتلف ---- و انت قادر خالق الملك و لكوان
بيك الخير و بيك تدي ولا اتعف ---بيك العز و بيك تتسالك لديان
بينا يا رحمان يا رحيم ألطف ---- نجينا من هول تاخير الزمان
بفضلك و سماك و سورة يوسف ---- و النساء و الكهف و أل عمران
أغفر للسامعين و اللي مؤلف ---- و الشيخ الحسني اللي نظم لوزان
و الصلاة على احمد مول الشرف ---- محمد حبيبنا فارق لديان