الاب ينسى اولاده ؟!

[loulou88]

السلام عليكم

حديث شريف (ابغض الحلال الى الله الطلاق)

سؤالي إلى الرجال و الامهات ذوات التجربة عموما، هل يمكن أن ينسى الرجل أولاده بصفة نهائية بمجرد أن يطلق أمهم أو يتزوج بأخرى ؟

هل ينسى فعلا اولاده ام يتناساهم تهربا من المسؤولية ام انه يريد ان يبدأ حياة جديدة و اولاده يذكرونه بطليقته؟


قال الله تعالى: {لِيُنفِقْ ذُو سَعَةٍ مِّن سَعَتِهِ وَمَن قُدِرَ عَلَيْهِ رِزْقُهُ فَلْيُنفِقْ مِمَّا آتَاهُ اللَّهُ لَا يُكَلِّفُ اللَّهُ نَفْسًا إِلَّا مَا آتَاهَا سَيَجْعَلُ اللَّهُ بَعْدَ عُسْرٍ يُسْرًا} [الطلاق 7].
***********
يقول النبي ـ صلى الله عليه وسلم-: " كلكم راع وكلكم مسئول عن رعيته"



تفاعلكم يفيدنا

[nihal159]

نتمنى الرجال يجاوبونا كيفاش يعطيه قلبو ينسى ولادو؛ لأن الظاهرة لاتخص فرد أو إثنين راهي منتشرة بكثرة في المجتمع؛ بمجرد ما يطلقو الأبوين، الأب ينسى أولادو لا مصروف لا كسوة في العيد يولو تقول يتامى مساكين؛ لماذا؟؟؟؟؟؟؟؟؟؟؟حتى النفقة يدفعها لولاده بطلوع الروح تقول راح يمدها لعدوه؟؟؟؟؟؟

[عثمان الجزائري.]

الحقيقة سؤالكم موجه لأصحاب الخبرة و لكن لي أصدقاء في مثل هذه الحالة:
أولا: لا يمكن مقارنة حب الأم بحب الأب أبدا، فالأم منبع الحنان و الرجل مهما كان حبه قويا لأولاده لا يصل لحب الأم.
ثانيا: بعد حالات الطلاق الكثير إن لم أقل الأكثر يفضلن العيش مع الأم، و يبقى الأب بعيدا، غير أن الآباء عموما لا يفرطن في ابنائهم تفريطا كليا بل يتابعون من بعيد و أينما سنحت لهم الفرصة للتدخل تدخلوا، مثلا في فك النزاعات في الأمور المادية في الزواج أمور مثل هذه، أما الحنان فقليلا ما تجده عندهم...
ثالثا: عند زواجه من أخرى فغالبا ما يكون تأثير الزوجة عليه سلبيا حتى تجعله ينسى إن كان له أولاد....و الله المستعان

[أم سلمى عائشة]

أنا شخصيا لو كان بيدي الإختيار حينها لإخترت الأب على الأم لأنه ليس دائما الأم مصدر الحب و الحنان ففي بعض الأحيان الأب أحن على الأم.و الله غالب .

[لامْية]

نظن زوجة الاب هي لي تخلي زوجها يكره اولاده بشكواها منهم وتذمرها تحاول كفاه تكرهو لاولادو وتبعدو عليهم وتخلي نظره منصرف لها ولاولادها فقط الا من رحم ربي القلييييل القليييييل لي تلقا الرحمة في قلبها

[أم عبد الكريم]

اطن انها الانانية .....فاغلب المتطلقين يتركون ابناءهم مع االام و يتهربون من المسؤولية .......انا السؤال لي حيرني كاين حالات الام هي لي تخلي الابناء و تتركهم والله حكايات عجيبة يتخلاو عن الابناتء نهار يولد تقول لطليقها هزوا .....الطفل محتاج لحنان الام اكثر من الاب ؟

[@رنيم الأمل في الحياة@]

أغلب الآباء لا يتخلون عن أولادهم بعد الطلاق و أيضا زوجة الأب لا تكون دائما سيئة و تحاول التفرقة بين الأب و أولاده
اذا نجحت في هذا فإن الأب هو السبب لأنه لو كان يحب أولاده لن يسمح لها بهذا
أيضا يمكن للأم التخلي عن أولادها من أجل الزواج و زواجها تأثيره يكون أكثر من تأثير زواج الوالد

[loulou88]

مشكورين على المداخلات و منكم نستفيد ....
و الله يهدي كل اب تخلى عن اطفاله

[مواطنة]

ادا كان اب يعرف المسؤولية لا يكتفي بالزيارة من وقت لوقت و انما يظل متابعو في الدراسة او المسجد و الزيارت العائللية اما الاب غير المسؤول يبداء بتسهيل اجراءات الطلاق و يتزوج ليثأر و يتناسا ابنه
الطلاق غالبا ما يكون الوالدان غير متفاهمان لدلك لتجنب الاصطدام مع اهل الزوجة خصوصا ادا حلفو فيه طبيعي يبتعد و يلقي اللوم على اهلها او على الام كي يجد حجة تخدم ضميره عندما يستيقظ من حين لاخر
و كاين اب معندوش حنانة بتاتا عادي ميشوفش اولادو لا يعني له الامر شيئا
الحقيقة هي ان احتياج الطفل لابيه كبير ولا تعوضه الام فهناك ناس كبرو بوالدين مطلقين عندما يتكلمون عن الاب الدي تركهم يبكون رغم سنهم
الام يبقى عليها الدور احتى تربي في اولادها االقيم الاسلامية وتربيهم تربية حسنة حتى تجنبهم الوقوع في مشاكل نفسية

[كاميلا]

بعد الطلاق ؟
يا اختي منهم من ينسى اولاده وهو متزوج صدقيني مش غير بالمصروف بل بالرعاية ايضا وكي يطلق يكملها ماديا بعد ميكون خلاها من الناحية المعنوية وهذا يا اختي مش لطبيعة الرحل علاش ديما نظلموا الراجل علاش منسلطوش الضوء على من تسبب في هاد الشي التربية الخاطئة اللي تجفي الولد الرجل هو ايضا انسان لازم يحمل في قلبه الرحمة والمودة ربي يهديهم بعض الوالدين بصح هوما يجنيو ثمار هذا قبل متجنيه الزوجة والاولاد يفرط في والديه عادي قبل ولاده

[nihal159]

المشاركة الأصلية كتبت بواسطة كاميلا

بعد الطلاق ؟
يا اختي منهم من ينسى اولاده وهو متزوج صدقيني مش غير بالمصروف بل بالرعاية ايضا وكي يطلق يكملها ماديا بعد ميكون خلاها من الناحية المعنوية وهذا يا اختي مش لطبيعة الرحل علاش ديما نظلموا الراجل علاش منسلطوش الضوء على من تسبب في هاد الشي التربية الخاطئة اللي تجفي الولد الرجل هو ايضا انسان لازم يحمل في قلبه الرحمة والمودة ربي يهديهم بعض الوالدين بصح هوما يجنيو ثمار هذا قبل متجنيه الزوجة والاولاد يفرط في والديه عادي قبل ولاده

والله عندك الحق 100٪ ؛ هناك خلل في نفسية الرجل آلجزائري باش ما نظلمش الأم و نقول في طريقة تربية الرجل الجزائري، راه مسكين مايعرفش يعبر على حنانه حتى لولاده.

[كاميلا]

المشاركة الأصلية كتبت بواسطة nihal159

والله عندك الحق 100٪ ؛ هناك خلل في نفسية الرجل آلجزائري باش ما نظلمش الأم و نقول في طريقة تربية الرجل الجزائري، راه مسكين مايعرفش يعبر على حنانه حتى لولاده.

الخلل النفسي يا اختي لا ياتي من فراغ لا يجب ان ننسى ان مصدر كل مشكلة نفسية هو البيئة اللي تربى فيها الولد او البنت الرجل كاين في قلبه الرحمة والمودة بصح العديد من اباء خصوصا تاع بكري تعمدوا طمص هاد الجزء تحت ما يسمى لازم يكون راجل والعامل الثاني المجتمع لان المجتمع راه يساعد في هاد التربية يقولك الام والاب رباو مساكن لا مرباوش ورح يتحاسبوا على كل صغيرة وكبيرة تجاه ابنائهم ومش معناتها ولدوهم يعني راهم عبيد لهم راهم امانة عندعم من ربي لازم يحسنوا تربيتهم

كمثال بسيط العديد من الاخطاء في التربية من والديا الان كي كبرت وعيت ليها ارتاكبوها في تربيتنا اثرت على نفسيتنا وعلابالي بيهم صحيح هوما والديا بصح هذا لا يمنعني اني نشوف ونقارن تربيتهم ونتعلم من اخطائهم باش نستفاد منها في المستقبل
لهذا لازمنا نبذلوا مجهود اكثر في فهم اسس التربية والمعاملة الطيبة للاولاد خاطر درك هاذي اللي ربات ولدها على الجفا والقسوة فهميني برك كي يكبر واش يولي حنين ؟ مستحيل وهذا رح ينعكس عليها وعلى والده بالدرجة الاولى قيل عايلته يعني نهار يطيشها في دار العجزة متستغربش علاش رباته جافي باش يحكم مليح في المرا كي سع دار فيها هي الاولى
بالمختصر حبيت نقول منظلموش بزاف الرجل

[nihal159]

كمثال بسيط العديد من الاخطاء في التربية من والديا الان كي كبرت وعيت ليها ارتاكبوها في تربيتنا اثرت على نفسيتنا وعلابالي بيهم صحيح هوما والديا بصح هذا لا يمنعني اني نشوف ونقارن تربيتهم ونتعلم من اخطائهم باش نستفاد منها في المستقبل

صباح الخير؛ النقطة هذي نوافقك فيها100٪.

[KARIO]

انا والديا اطلقوا لما كان في عمري 6 اشهر, الوالد ( مع انه لا يستحق هذا اللقب) عمره ما تفكر باللي عنده بنت , كنت نشوفه فقط فالمناسبات العائلية بحكم انه ابن عم امي فقط و الا منعرفش كمارته كيفاش دايرة, و زيد اذا تصادفت و شفته فالشارع يا اما يدور وجهه يا اما يبدل الطريق, تقول جايبني فالحرام, تزوجت مكلفش نفسه يسال عن الخاطب و تخيلو محبش يحضر العقد حتى حضر خالي كولي امر, و راني متزوجة في ثلات سنوات للان زوجي ميعرفش وجهه, و نزيدكم هو استاذ و مربي اجيال و عامل نفسه مصلح اجتماعي قاعد يحل في مشاكل التلاميذ اللي عنده, لوكان نحكي منكملش بصح حسبي الله و نعم الوكيل فيه كنت زمان نطلبله الهداية و لكن الان نتمناله موتة الكلاب انشاء الله

[nihal159]

المشاركة الأصلية كتبت بواسطة KARIO

انا والديا اطلقوا لما كان في عمري 6 اشهر, الوالد ( مع انه لا يستحق هذا اللقب) عمره ما تفكر باللي عنده بنت , كنت نشوفه فقط فالمناسبات العائلية بحكم انه ابن عم امي فقط و الا منعرفش كمارته كيفاش دايرة, و زيد اذا تصادفت و شفته فالشارع يا اما يدور وجهه يا اما يبدل الطريق, تقول جايبني فالحرام, تزوجت مكلفش نفسه يسال عن الخاطب و تخيلو محبش يحضر العقد حتى حضر خالي كولي امر, و راني متزوجة في ثلات سنوات للان زوجي ميعرفش وجهه, و نزيدكم هو استاذ و مربي اجيال و عامل نفسه مصلح اجتماعي قاعد يحل في مشاكل التلاميذ اللي عنده, لوكان نحكي منكملش بصح حسبي الله و نعم الوكيل فيه كنت زمان نطلبله الهداية و لكن الان نتمناله موتة الكلاب انشاء الله

وكلي ربي والله حكايتك قطعتلي قلبي؛ هو يصطنع الحنان و الرعاية مع التلاميذ تاعو وبنتو ماعلابالوش بها المسكينة؛ ربي يهديه و يغفر له.