مشكلتي وسواس مرانيش فاهمة

[مشكلتي]

السلام عليكم خاوتي حبيت نطرح عليكم مشكلتي انا فتاة 27 سنة عاملة وحمد الله ، المهم أنا كنت مخطوبة من ثلاث سنوات وحبست بسبب خطيبي هدا لي كان حبي الأول وكنت نية ومأمناتو وهو انسان متلاعب وانا منيش نتاع علاقات وهكا وكانت خطبة تقليدية المهم الخطوبة مادامتش بزاف ، كنت نخرج معاه مرات وهو كان يطلب اللإذن من أبي وأمي لانو كنا مفتحين وخاتم وكان مبرمج نتزوجو بعد 06 أشهر من الخطبة برك
أنا تعلقت بيه وكلش مشكلتي أني تصورت معاه وهو صورني بصح بحجابي عادي مثلا سيلفي معاه أو في منطقة هكا عامة يطلب مني نصورو ويصورني وحدي مش معايا هو
نهار لي حبست صارحت ماما ماما عيطت لامو قاتلها يمحي تصاور بنتي خلاص ويفكنا أمو قاتلها واش عليه وكانت متفهمة وهو حبس الخطوبة لأسباب تافهة وانا ذليت روحي كنت نعيطلو ونسقسي عليه لاني تصدمت الله غالب المهم حمد الله حتى هو برغم انو متلاعب لكن مفكرش ولا مرة يلمسني
المهم من لي حبست معاه والخطابين لي يجو يروحو منهم اخر واحد صاحب خويا جاو وتفاهمنا وهو عيط لبابا وخويا قالهم هد نهارات نجيب بابا والرجال باش نقطعو الشرط.......تصورو حتى انقطع تماما كامل فدار استغربنا
خاوتي تعيشو هاني خايفة ادا الخاطب الاول ورالو صوري وكذب عليه كاشي حاجة ؟ حكيت لماما وجها تبدل وحسيتها محبتش تقلقني قاتلي لالا راح في حالو؟ خايفة ادا كاش ما كدب عليهم حاجة ومانيش حابة نظلم لانو الشك ظلم
خوتي زعما أنا موسوسة ولا وشنو للعلم اني كنت نرقي حمد الله تعيشو اني خايفة وش رايكم زعما راه يديرها من تحت لتحت طمنوني قتلني الوسواس وليت نخاف كي نسمع كلمة خاطب؟؟؟؟؟ ونرتاح كي زعما ابي يرفضو ولا ميكونش مناسب مررت بزاف بتجارب فاشلة من بعد الخطبة الاولى
تعيشو علاه علاه

[walido_star]

الله يهنيك أختي ، الله يوفقك في قادم الأيام
وأكثري من الدعاء ، الله يرزقك الزوج الصالح والذرية الصالحة

ربي يوفقك

[faty05]

ما عندو ما يدير
هذا كيعاد هو بطل ما تخافيش زعما راح يجيبها وراك وراك و يفسد عليك !!
هذا كله وسواس
رقي ديما روحك و اكثري الدعاء

[إنسانة بسيطة]

يعني يخطب ويفتح ويصورك ويفسخ ويقعد يبعد في الخطاب عليك ..
اما انت موسوسة فوق الحد اما هو صح -جايح-
ممكن الناس تسمع انك كنت مفتحة وفسختي على هاذي لي يجي ميرجعش

[محمد جديدي التبسي]

الزواج رزق ليس له علاقة بتدبير البشر ابدا
توكلي على الله والجئي اليه ولن يضرك بشر ابتعدي عن الوساوس وخلي ايمانك قوي وابتعدي عن تجاوز الحدود مع من يخطبك فالعلماء لما حرموا التصوير والصور التذكارية بالأخص كانوا على حق..ربي يرزقك زوج صالح

[مصطفى_س]

السلام عليكم و رحمة الله

انت قلت انه لم يفكر حتى في لمسك معناه لن يفضحك ان شاء الله و لا تدعي وسوسة الشيطان تاثر عليك و ادعي الله دائما ان يسترك
توكلي على الله و انسي امر هذا الخطيب و ابدئي حياتك من جديد بصفحة بيضاء و لا تكرري قضية الصور حتى تكونين في بيت زوجك

الله يوفقك و يرزقك الزوج الصالح

[امل ضائع]

تاكدي اختي انو ماكيش رايحة تدي الا واش كتبلك ربي.. الدنيا مكاتيب..

[نسيم الريح ش]

مازالا مكتوبك ما جاش ادعي ربي باش يرزقك ولد الحلال

[Golden Princess]

مادامك كنتو مفتحين يعني كان حلالك ,,,,,,, ما عندك علاه تخافي باسكو مادرتيش حاجة تغضب ربي
ما تقلقيش روحك كلشي بالمكتوب
الله يرزقك ولد الحلال

[فراشة الجلفة]

راكي امسوسه برك افتحي صفحه جديده وخلاص وشوفي راجل في اغرب وقت وممكن خطيبك ازوج علاش راكي اتخمي اتكلي على ربي ومن هدا اللحضه شوفي راجل صالح